मंगळवार, 6 ऑक्टोबर 2026
Supreme Court Shiv Sena Hearing
मुंबई : शिवसेना पक्ष आणि धनुष्यबाण चिन्हावरून सुरू असलेल्या कायदेशीर लढाईत आज सुप्रीम कोर्टातील युक्तिवादावरून राजकीय वातावरण पुन्हा तापलं आहे. शिवसेनेचे सहप्रवक्ते डॉ. राजू वाघमारे यांनी शिवसेना उद्धव बाळासाहेब ठाकरे पक्षावर जोरदार निशाणा साधत ठाकरे गटाचे दावे कायद्याच्या कसोटीवर टिकले नसल्याचा दावा केला आहे. मुंबईत आयोजित पत्रकार परिषदेत ते बोलत होते. (Shivsena Symbol Case)
निवडणूक आयोगाने आणि विधानसभा अध्यक्षांनी संविधानातील तरतुदींनुसारच निर्णय घेतल्याचे वाघमारे म्हणाले. अपात्रतेचा खटला प्रलंबित असताना निवडणूक आयोगाला पक्ष आणि चिन्हाबाबत निर्णय देता येत नाही, हा ठाकरे गटाचा दावा असल्याचे त्यांनी सांगितले. मात्र, सुभाष देसाई प्रकरणाचा दाखला देत हा मुद्दा शिवसेनेचे वकील नीरज किशन कौल यांनी खोडून काढल्याचे वाघमारे यांनी म्हटले. कलम ३२४ अंतर्गत निवडणूक आयोगाला निर्णय घेण्याचे अधिकार असल्याचा युक्तिवाद करण्यात आल्याचेही त्यांनी सांगितले.
आमदाराच्या अपात्रतेबाबतही शिवसेनेकडून महत्त्वाचे मुद्दे मांडण्यात आल्याचे वाघमारे म्हणाले. एखादा आमदार विधीमंडळातून अपात्र झाला तरी त्याचा परिणाम थेट राजकीय पक्षाच्या सदस्यत्वावर होतोच, असे नाही, असा मुद्दा मांडण्यात आल्याचा दावा त्यांनी केला.
MLC Election 2026 : पुणे ते संभाजीनगर… पाचही जागांवर राजकीय आखाडा तापला; पाहा कोण कुठून लढणार!
फक्त अपात्रतेचा खटला दाखल झाला म्हणून संबंधित आमदार अपात्र ठरत नाही. त्याची अपात्रता सिद्ध होणे आवश्यक आहे, असेही वाघमारे म्हणाले.
दहाव्या अनुसूचीतील तरतुदींचा दाखला देत राजकीय पक्ष आणि विधीमंडळातील पक्ष यांच्यात फरक असल्याचे घटनापीठाने स्पष्ट केल्याचा दावा वाघमारेंनी केला. त्यामुळे दोन्ही बाबींना सरसकट एकच नियम लावता येणार नाही, असा युक्तिवाद शिवसेनेकडून करण्यात आल्याचे त्यांनी सांगितले.
दरम्यान, निवडणूक आयोगाने शिवसेना पक्ष आणि धनुष्यबाण चिन्हाबाबत घेतलेल्या निर्णयावरही वाघमारेंनी भाष्य केले. बहुमत आणि पक्षाची संघटनात्मक रचना लक्षात घेऊन आयोगाने निर्णय घेतल्याचे ते म्हणाले.
२०१८ मध्ये उद्धव ठाकरे यांनी पक्षाच्या घटनेत बदल केले; मात्र ती सुधारित घटना निवडणूक आयोगाकडे सादर करण्यात आली नसल्याचा आरोपही वाघमारेंनी केला. त्यामुळे आयोगाने पक्षाच्या घटनेऐवजी बहुमताचा आधार घेत शिवसेना आणि धनुष्यबाणाचे चिन्ह एकनाथ शिंदे यांच्या नेतृत्वाखालील गटाला दिल्याचे त्यांनी सांगितले.
वाघमारेंनी याच मुद्द्यावरून ठाकरे गटावर आणखी टीका केली. पक्षांतर्गत लोकशाहीऐवजी सर्व अधिकार एका व्यक्तीकडे केंद्रित करणारी रचना तयार करण्यात आली, असा आरोप त्यांनी केला. त्यामुळे सुप्रीम कोर्टातील आजच्या युक्तिवादानंतर शिवसेना ठाकरे गटाच्या दाव्यांवर पुन्हा राजकीय चर्चा रंगण्याची शक्यता आहे.
