येरवड्यातील तीन मंदिरातील दान पेट्या चोरट्यांनी फोडल्या

बंद फ्लॅट फोडण्यासोबतच आता मंदिरातील दान पेट्या फोडणाऱ्या चोरट्यांनी चांगलाच धुमाकूळ घातला असून, विश्रांतवाडीनंतर येरवडा परिसरातील वेगवेगळे तीन मंदिरातील दान पेट्या फोडण्यात आल्याचा प्रकार समोर आला आहे.

पुणे : शहरात (Pune City) बंद फ्लॅट फोडण्यासोबतच आता मंदिरातील दान पेट्या फोडणाऱ्या चोरट्यांनी चांगलाच धुमाकूळ घातला असून, विश्रांतवाडीनंतर (Vishrantwadi) येरवडा परिसरातील वेगवेगळे तीन मंदिरातील दान पेट्या फोडण्यात आल्याचा प्रकार समोर आला आहे. या तीनही मंदिरातून चोरट्यांनी रोकड चोरून नेली आहे.

विश्रांतवाडीत नुकतेच दोन मंदिर फोडण्यात आले होते. त्यामुळे भाविकांमध्ये तीव्र संतापाची लाट पसरली आहे. यासोबतच कोथरूड भागात दोन फ्लॅट फोडले गेले आहेत.याप्रकरणी चंद्रकांत उर्फ बाबा मोहराव नायडु (वय ५७, रा. गणेशनगर, येरवडा) यांनी तक्रार दिली आहे. त्यावरून येरवडा पोलीस ठाण्यात अज्ञात चोरट्यांविरोधात गुन्हा दाखल केला आहे.

[read_also content=”जुन्या वादातून टोळक्याचा तुफान राडा; परिसरात फिरून माजवली दहशत https://www.navarashtra.com/maharashtra/a-gang-storm-from-an-old-dispute-there-was-panic-in-the-area-nrdm-326616.html”]

पोलिसांनी दिलेल्या माहितीनुसार, चोरट्यांनी कामराजनगर येथील दत्त मंदिर, जयजवान नगर येथील दुर्गा माता मंदिर आणि मथुरा हॉस्पीटलच्या समोरील दुर्गा माता प्रतिष्ठानच्या मंदिरातील दान पेटीतील रोकड चोरली आहे. चोरट्यांनी प्रत्येकी ४०, १५ आणि ५५ हजारांची रोकड चोरून नेली आहे. या घटनांमुळे मोठी खळबळ उडाली असून, पोलिसांच्या कामगिरीवर प्रश्न चिन्ह उपस्थित केले जात आहेत.

चोरटे दुचाकीवरून आल्याचे समोर आले आहे. या चोरट्यांचा माग काढला जात आहे. परंतु, अद्याप तरी त्यांचा थांगपत्ता लागलेला नाही. दरम्यान, तीनच दिवसांपुर्वी विश्रांतवाडी येथील दोन मंदिरातील दान पेट्या फोडून प्रत्येकी २२ आणि ७ हजारांची रोकड चोरून नेली होती. या चोरट्यांचाही पोलिसांना अजून थांगपत्ता लागलेला नाही.