बुधवार, 21 ऑक्टोबर 2026
उरुळी कांचन : उरुळी कांचन जवळील शिंदवणे घाटातून चाकण या ठिकाणी कोंबडी खाद्य घेऊन निघालेला ट्रक पलटी होऊन झालेल्या अपघातात चालकाचा जागेवरच मृत्यू झाला आहे. तर त्याची मैत्रीण गंभीर जखमी झाल्याची घटना रविवारी (ता. २६) रात्री साडेअकरा वाजण्याच्या सुमारास घडली आहे. (Truck overturned in Shindwane Ghat near Uruli Kanchan)
रामेश्वर लक्ष्मण शिंदे (वय- २१, रा. शेलू, ता. परतूर, जि. परभणी) असे मृत्यू पावलेल्या ट्रकचालकाचे नाव आहे. पायल शेख, (वय- २३, रा. मिरज, सांगली) असे अपघातात जखमी झालेल्या त्याच्या मैत्रिणीचे नाव आहे.
स्थानिक नागरिकांनी दिलेल्या माहितीनुसार, ट्रकचालक रामेश्वर शिंदे हे फलटणवरून चाकणला कोंबडी खाद्य घेऊन निघाले होते. या ट्रकमध्ये त्याची मैत्रीण पायल ही देखील त्याच्या सोबत होती. रविवारी संध्याकाळी साडेअकरा वाजण्याच्या सुमारास शिंदवणे घाटात आले असता शिंदे यांना घाटात असलेल्या वळणाचा अंदाज आला नाही व त्यांचा वाहनावरील ताबा सुटला. त्यामुळे ट्रक हा रस्त्यावर पलटी झाला होता.
सदर घटनेची माहिती मिळताच ,कदम रुग्णवाहिकेचे वैभव कदम, कस्तुरी प्रतिष्ठानची रुग्णवाहिका, लोणी काळभोर पोलीस ठाण्याचे पोलीस हवालदार रमेश गायकवाड, बाळासाहेब पांढरे, आदींनी जखमींना मदत केली.
दरम्यान, ट्रकचालक शिंदे व पायल यांना उरुळी कांचन येथील एका रुग्णालयात उपचारासाठी दाखल केले असता उपचारापूर्वीच शिंदे यांचा मृत्यू झाल्याचे डॉक्टरांनी सांगितले. तसेच शिंदे यांची मैत्रीण पायल शेख हिच्यावर उरुळी कांचन येथील खाजगी रुग्णालयात उपचार सुरु झाले असून पुढील उपचारासाठी मिरज या ठिकाणी पाठविण्यात आले आहे. सदर घटनेचा लोणी काळभोर पोलीस ठाण्यात गुन्हा दाखल करण्याचे काम सुरु असल्याची माहिती पोलिसांनी दिली.
अपघाताच्या ठिकाणावरील वळणाचा टप्पा कमी करण्याची मागणी ग्रामस्थांनी केली आहे.शिंदवणे घाटात सातत्याने अपघात मोठ्या प्रमाणात वाढले आहेत. अपघाताच्या ठिकाणावरील वळणाचा टप्पा कमी करण्याची गरज निर्माण झाली असल्याचे नागरिक बोलत असून लागले आहेत. सदर ठिकाणी जड वाहने वळताना वाहनचालकाला अंदाज येत नसल्याने हे अपघात होत आहेत. त्यामुळे सासवड – जेजुरी कडून येताना वळणाचा टप्पा लक्षात येत नसल्याने हे अपघात होत आहेत. हा वळणी टप्पा काढण्याची मागणी नागरिक करीत आहेत.
