शनिवार, 8 ऑगस्ट 2026
Representative Image (Photo - Social Media)
वर्धा, ब्युरो. व्यावसायिक वापरासाठी असलेल्या गॅस सिलिंडरच्या वाढत्या किमतीमुळे अनेक व्यावसायिकांकडून घरगुती गॅस सिलिंडरचा बेकायदेशीरपणे व्यावसायिक वापर केल्या जात आहे. पुरवठा विभागाने अलीकडील काळात केलेल्या कारवाईत ४३ ठिकाणी धाडी टाकून एकूण ६७ घरगुती गॅस सिलिंडर जप्त केले, पण सध्या ही धडक कारवाई मोहीम थंडबस्त्यात पडली आहे.
हटिल, चहाच्या टपऱ्या, खाद्यपदार्थ विकणारे हातगाडे तसेच अन्य खाद्य व्यवसायांमध्ये घरगुती गॅस सिलिंडरचा मोठ्या प्रमाणावर वापर केला जात आहे. घरगुती गॅस सिलिंडरवर शासनाकडून नाममात्र का होई ना पण अनुदान दिले जाते. शिवाय, तो केवळ घरगुती वापरासाठीच आहे. मात्र, खर्च कमी करण्याच्या उद्देशाने काही व्यावसायिकांकडून त्याचा सर्रास व्यावसायिक वापर केला जात असल्याचे चित्र जिल्ह्यातील विविध भागात बघावयास मिळत आहे.
व्यावसायिक गॅस सिलिंडरच्या किमतीत झालेली वाढ हे या प्रकारामागील मुख्य कारण मानले जात आहे. पूर्वी व्यावसायिक गॅस सिलिंडरसाठी २,००० रुपये मोजावे लागत होते. मात्र, आता त्यासाठी ३,००० रुपये खर्च करावे लागत आहेत. त्यामुळे अनेक लहान-मोठ्या व्यावसायिकांनी घरगुती सिलिंडरचा वापर करण्याचा मार्ग स्वीकारल्याचे दिसून येते.
सिलिंडरचा काळाबाजार रोखण्यासाठी मध्यंतरी पुरवठा विभागाकडे जिल्ह्यात विविध भागात तपासणी मोहीम राबविली. या मोहिमेदरम्यान नियमांचे उल्लंघन करणाऱ्या विविध आस्थापनांवर धाडी टाकण्यात आल्या. या कारवाईदरम्यान घरगुती गॅस सिलिंडर जप्त करण्यात आले. शिवाय संबंधिताविरुद्ध आवश्यक ती कायदेशीर कार्यवाही करण्यात आली. घरगुती गॅस सिलिंडरचा व्यावसायिक वापर हा अत्यावश्यक वस्तू कायद्याचे उल्लंघन करणारा प्रकार आहे.
प्रभारी जिल्हा पुरवठा अधिकारी राजू रणवीर यांनी नागरिकांना आवाहन केले आहे की, “घरगुती गॅस सिलिंडरचा व्यावसायिक वापर हा प्रकार अत्यावश्यक वस्तु, कायद्याचे उल्लंघन करणारा आहे. मध्यंतरी ४३ ठिकाणी छापे टाकून एकूण ६७ घरगुती गॅस सिलिंडर जप्त करण्यात आले. कुठे घरगुती गॅस सिलिंडरचा व्यावसायिक वापर होत असल्यास नागरिकांनी पुरवठा विभागाला माहिती द्यावी. तत्काळ कार्यवाही करण्यात येईल.”
