Tur Crop Loss
शिरपूर जैन: यंदा पावसाने शिरपूर जैन परिसरात ओढ दिल्याने खरीप हंगामातील पिकांचे मोठे नुकसान झाले असून, आता रब्बी हंगामावरही दुष्काळाचे सावट गडद झाले. अत्यल्प पावसामुळे सोयाबीनचे उत्पादन घटल्यानंतर आता तूर पीकही पाण्याअभावी दैनावस्थेत पोहोचले. गेल्या दोन-तीन दिवसांपासून रात्रीच्या तापमानात घट होऊन थंडीचा जोर वाढत असला, तरी पिकांना आवश्यक ओलावा मिळत नसल्याने शेतकऱ्यांची चिंता वाढली. अनेक शेतांमध्ये पिके कोमेजू लागली असून, काही शेतजमिनी रब्बीच्या पेरणीविना रिकाम्याच पडून आहेत.
यंदा पावसाचे प्रमाण समाधानकारक राहिले असते, तर सोयाबीन आणि तूर या दोन्ही पिकांचे उत्पादन चांगले मिळण्याची अपेक्षा होती. मात्र, पावसाच्या लहरीपणाचा मोठा फटका खरीप हंगामाला बसला. कमी पावसामुळे सोयाबीनचे उत्पादन कमालीचे घटले. काही शेतकऱ्यांच्या हाती अत्यल्प उत्पादन आले, तर काहींचा लागवडीचा खर्चही वसूल होऊ शकला नाही. त्यातच आता तूर पिकाचीही अवस्था बिकट झाली आहे. पाण्याअभावी तुरीची वाढ खुंटली असून, उत्पादनावर परिणाम होण्याची शक्यता आहे. हळद उत्पादक शेतकऱ्यांनाही पुरेसे पाणी उपलब्ध होत नसल्याने या पिकाच्या उत्पन्नात घट होण्याची भीती व्यक्त होत आहे.
खरीप हंगामातील नुकसान आणि रब्बी हंगामातील अनिश्चितता यामुळे शिरपूर जैन परिसरातील शेतकरी आर्थिक संकटात सापडले आहेत. शेतीच्या उत्पन्नावर वर्षभराचा उदरनिर्वाह अवलंबून असताना यंदा हातात पुरेसे उत्पादन येण्याची चिन्हे नाहीत. शेतीचा खर्च, कुटुंबाचा उदरनिर्वाह आणि आगामी हंगामाची तयारी कशी करायची, असा प्रश्न शेतकऱ्यांसमोर उभा ठाकला आहे. पावसाअभावी दोन्ही हंगामांवर संकट ओढवल्याने शेतकरी पुन्हा एकदा आर्थिक विवंचनेत सापडला आहे.
शेतात ओलावा नसल्याने अनेक शेतकऱ्याऱ्यांनी यंदा रब्बी हंगामाची पेरणीच टाळली, ज्या शेतकऱ्यांकडे काही प्रमाणात पाण्याची उपलब्धता आहे, त्यांनी मोजक्याच क्षेत्रावर हरभऱ्याची पेरणी केली. मात्र, पुढील काळात पाणी उपलब्ध होईल की नाही, याची शाश्वती नसल्याने या पिकांच्या वाढीबाबतही शेतकरी साशंक आहेत.






