Yavatmal News: कापसाने गाठला ९,६०० रुपयांचा भाव! कापसाचे दर वधारले, मात्र शेतकऱ्यांचे उत्पादन घटले
Yavatmal News: पावसाच्या लहरीपणामुळे यंदा शेतकऱ्यांच्या कपाशी पिकाचे मोठे नुकसान झाले असले, तरी बाजारात मात्र कापसाच्या दराने जोरदार उसळी घेतली आहे. एका बाजूला पावसाच्या अनियमिततेमुळे कपाशीची वाढ खुंटली, बोंडे आणि पात गळून पडली, तर दुसऱ्या बाजूला बाजारात पांढऱ्या सोन्याचा भाव थेट ९ हजार ६०० रुपयांवर पोहोचला आहे. चांगल्या प्रतीच्या कापसाला खाजगी व्यापाऱ्यांकडून प्रतिक्विंटल ९ हजार ६०० रुपयांपर्यंत दर मिळत असल्याचे चित्र आहे. बाजारातील तेजी कायम राहिल्यास कापसाचा भाव १२ हजार रुपयांचा टप्पा गाठणार का, याकडे आता शेतकरी आणि व्यापाऱ्यांचे लक्ष लागले आहे. यंदा पावसाचे आगमन उशिरा झाल्याने पेरणीला विलंब झाला.(फोटो सौजन्य – istock)
पावसाने पाठ फिरविल्यामुळे कपाशीच्या वाढीवर परिणाम झाला. पाण्याअभावी झाडांची वाढ खुंटली, तर बोंडे आणि पात गळून पडली. त्यामुळे बागायती कपाशीचेही उत्पादन एकरी चार ते पाच क्विंटलपर्यंत मर्यादित राहण्याची शक्यता व्यक्त केली जात आहे. कोरडवाहू शेतकऱ्यांची परिस्थिती आणखी बिकट असून, एकरी एक ते दोन क्विंटल कापूस तरी हाती येईल की नाही, अशी चिंता त्यांना सतावत आहे. उत्पादनात मोठी घट होण्याची शक्यता असल्याने बाजारात कच्च्या कापसाची आवक कमी राहण्याचा अंदाज आहे. मागणी कायम असताना पुरवठा कमी झाल्यास कापसाच्या दरात आणखी वाढ होऊ शकते.
कापसाची उपलब्धता कमी पडण्याची शक्यता निर्माण झाल्याने जिनिग कारखानदार आणि व्यापाऱ्यांची धावपळ सुरू झाली आहे. कच्च्या कापसाचे दर नऊ हजार रुपयांच्या पुढे गेल्याचे सांगितले जात असून, कापूस मिळविण्यासाठी व्यापारी थेट शेतकऱ्यांच्या बांधावर पोहोचत आहेत. शेतातूनच कापूस खरेदी करण्याच्या या हालचालीमुळे बाजारातील स्पर्धा वाढण्याची चिन्हे आहेत. कापसाची आवक आणि बाजारातील मागणी यावर दरांची पुढील दिशा अवलंबून राहणार असल्याने शेतक-यांचे लक्ष बाजारभावाकडे लागले आहे.
गेल्या तीन ते चार वर्षांच्या तुलनेत यंदा कापसाला प्रतिक्विंटल १० ते १३ हजार रुपयांपर्यंत दर मिळण्याची आशा निर्माण झाली आहे. दुष्काळाच्या छायेत असलेल्या शेतकऱ्यांसाठी वाढते दर दिलासादायक ठरू शकतात. मात्र, पावसामुळे उत्पादनातच मोठी घट झाल्यास या तेजीचा फायदा कितपत मिळणार, हा महत्त्वाचा प्रश्न आहे. कापसाचा भाव दहा हजार रुपयांच्या उंबरठ्यावर पोहोचण्याची शक्यता असली, तरी वाढलेल्या दराचा प्रत्यक्ष लाभ शेतकऱ्यांना तेव्हाच मिळेल, जेव्हा विक्रीयोग्य कापूस पुरेशा प्रमाणात त्यांच्या हाती असेल.
Yavatmal News: झाडाखाली बसून शिक्षणाचे धडे! गडचिरोलीतील नेमडा येथील प्रकार; जीर्ण इमारतीचा फटका
केंद्र सरकारने यंदा मध्यम धाग्याच्या कापसासाठी प्रतिक्विंटल ८ हजार १२० रुपये, तर लांब धाग्याच्या कापसासाठी ८ हजार ६६७ रुपये किमान आधारभूत किमत (हमीभाव) जाहीर केली आहे. भारतीय कापूस महामंडळ अर्थात सीसीआयकडूनही खरेदीची तयारी असताना, खुल्या बाजारात हमीभावापेक्षा अधिक दर मिळत असल्याने शेतकरी खाजगी व्यापाऱ्यांना कापूस विकण्यास प्राधान्य देत आहेत. त्यामुळे सरकारी खरेदीपेक्षा खुल्या बाजारातील व्यवहारांकडे शेतकऱ्यांचा कल वाढल्याचे चित्र आहे.
.png "Videos"){kind=small}
