अमित शाह आणि एकनाथ शिंदेंमध्ये विमानतळावर 10 मिनिटं चर्चा; शिवसेना मंत्र्यांच्या नाराजीवर खलबतं?
मुंबईतील कार्यक्रम आटोपल्यानंतर अमित शाह दिल्लीकडे रवाना झाले. मात्र, विमानतळावर रवाना होण्यापूर्वी अमित शाह आणि उपमुख्यमंत्री एकनाथ शिंदे यांच्यात सुमारे दहा मिनिटे स्वतंत्र चर्चा झाल्याची माहिती समोर आली आहे. या भेटीमुळे राज्याच्या राजकारणात चर्चांना वेग आला आहे.
सूत्रांच्या माहितीनुसार, अमित शाह आणि एकनाथ शिंदे यांच्यात राज्यातील सध्याच्या राजकीय घडामोडींवर चर्चा झाली. विशेषतः शिवसेनेच्या मंत्र्यांमध्ये असलेल्या कथित नाराजीचा मुद्दा या चर्चेत असल्याची माहिती आहे.
गेल्या काही दिवसांपासून रिक्षा आणि टॅक्सी चालकांसाठी मराठी भाषेच्या नियमावरून राजकीय वातावरण तापले आहे. परिवहन मंत्री प्रताप सरनाईक यांनी रिक्षा चालकांना मराठी भाषा शिकण्यासाठी 15 ऑगस्टपर्यंतची मुदत दिली होती. त्यानंतर मराठी भाषेचे प्रमाणपत्र नसलेल्या किंवा मराठी बोलता न येणाऱ्या चालकांवर कारवाई सुरू झाल्याची माहिती समोर आली होती.
या निर्णयामुळे काही परप्रांतीय रिक्षा आणि टॅक्सी चालकांमध्ये नाराजी निर्माण झाली. त्यानंतर मुख्यमंत्री देवेंद्र फडणवीस यांनी या नियमाच्या अंमलबजावणीला आणखी एक वर्षाची मुदतवाढ देण्याचा निर्णय घेतला.
या निर्णयामुळे शिवसेनेतील काही मंत्र्यांमध्ये नाराजी असल्याची चर्चा राजकीय वर्तुळात सुरू झाली आहे. याच पार्श्वभूमीवर अमित शाह आणि एकनाथ शिंदे यांच्यात विमानतळावर झालेली भेट महत्त्वाची मानली जात आहे.
सूत्रांच्या माहितीनुसार, शिवसेना मंत्र्यांमध्ये निर्माण झालेल्या असंतोषाबाबत अमित शाह आणि एकनाथ शिंदे यांच्यात चर्चा झाली. यावेळी अमित शाह यांनी एकनाथ शिंदे यांना ‘चिंता करू नका’, असे आश्वासन दिल्याची माहिती सूत्रांकडून समोर आली आहे.
दरम्यान, विमानतळावरील या भेटीत नेमकी कोणती चर्चा झाली, याबाबत दोन्ही नेत्यांकडून अधिकृत माहिती समोर आलेली नाही. त्यामुळे सूत्रांकडून मिळालेल्या माहितीनुसार या भेटीकडे पाहावे लागणार आहे.
रिक्षा-टॅक्सी चालकांच्या मराठी भाषेच्या मुद्द्यावरून सुरू झालेली चर्चा आता सत्ताधारी महायुतीतील अंतर्गत समीकरणांपर्यंत पोहोचल्याचे चित्र आहे. त्यामुळे अमित शाह आणि एकनाथ शिंदे यांच्या या दहा मिनिटांच्या भेटीचे राजकीय पडसाद पुढील काळात उमटतात का, हे पाहणे महत्त्वाचे ठरणार आहे.
.png "Videos"){kind=small}
