Devendra Fadnavis on Eknath Shinde : एकनाथ शिंदेंच्या नाराजीवर फडणवीसांचं भाष्य, मुख्यमंत्र्यांनी एका वाक्यात विषय संपवला!

Devendra Fadnavis on Eknath Shinde : मंगेश चिवटे यांनी पुणे विधानपरिषद निवडणुकीतून माघार घेतल्यानंतर एकनाथ शिंदे नाराज असल्याच्या चर्चा सुरू झाल्या. यावर देवेंद्र फडणवीसांनी मिश्कील प्रतिक्रिया दिली. तसेच विधानपरिषदेच्या पाचही जागा महायुती जिंकेल, असा विश्वास व्यक्त केला.

• मंगेश चिवटे यांच्या उमेदवारी माघारीनंतर एकनाथ शिंदे यांच्या नाराजीच्या चर्चां
• देवेंद्र फडणवीसांची पहिली प्रतिक्रिया
• विधानपरिषदेच्या पाचही जागांवर महायुतीचे उमेदवार विजयी होतील, असा फडणवीसांचा विश्वास

 

Devendra Fadnavis on Eknath Shinde : महाराष्ट्रातील विधानपरिषद निवडणुकांच्या पार्श्वभूमीवर राजकीय हालचालींना वेग आला आहे. पुण्यातील जागांवरून भाजप आणि एकनाथ शिंदे यांच्या शिवसेनेमध्ये उमेदवारीवरून चर्चा रंगली होती. शिंदे गटाकडून मंगेश चिवटे यांनी उमेदवारी अर्ज भरल्यानंतर भाजपनेही उमेदवार रिंगणात उतरवल्याने महायुतीत नेमकं काय सुरू आहे, याबाबत तर्कवितर्क लढवले जात होते. त्यानंतर चिवटे यांनी अर्ज मागे घेतल्याची माहिती समोर आली. यामुळे एकनाथ शिंदे नाराज असल्याच्या चर्चांना उधाण आलं.

या चर्चांवर मुख्यमंत्री देवेंद्र फडणवीस यांनी मिश्कील शब्दांत प्रतिक्रिया दिली. बैठकीनंतर माध्यमांशी बोलताना ते म्हणाले, “शिंदेसाहेब नाराज नाहीत. तुम्ही सगळे नाराज आहात.” विनाकारण अफवा पसरवू नका, असंही त्यांनी सांगितलं. त्यांच्या या विधानाची राजकीय वर्तुळात चर्चा सुरू झाली आहे.

पुणे विधानपरिषद निवडणुकीत काय घडलं?

पुण्यातील विधानपरिषदेच्या जागांवरून भाजप आणि शिंदेसेनेच्या उमेदवारीबाबत चर्चा रंगली होती. मंगेश चिवटे यांनी अर्ज मागे घेतल्यानंतर महायुतीतील राजकीय समीकरणांबाबत प्रश्न उपस्थित झाले. मात्र, शिंदे नाराज असल्याच्या चर्चांवर फडणवीसांनी स्पष्टपणे नकार दिला.

Bhiwandi News : भिवंडीत राजकीय भूकंप! महापालिकेत स्वीकृत नगरसेवक निवडीचा वाद पेटला, समाजवादीच्या ६ नगरसेवकांची जागेवरच हकालपट्टी!

पुणे पदवीधर मतदारसंघाबाबत बोलताना त्यांनी भैय्या माने आणि शरद लाड यांनी स्मिता जाधव यांच्या पाठीशी उभं राहण्याचा निर्णय घेतल्याचं सांगितलं. पश्चिम महाराष्ट्रातील जिल्ह्यांमध्ये भाजपचे कार्यकर्ते, आमदार आणि पदाधिकारी मतदारांपर्यंत पोहोचून प्रचार करतील, असंही त्यांनी स्पष्ट केलं.

पुण्यात मेडिकल कॉलेजसाठी मंजुरी

यावेळी फडणवीसांनी पुण्यातील वैद्यकीय सुविधांबाबतही माहिती दिली. ईएसआयसी रुग्णालयाला अधिक सक्षम करण्याच्या दृष्टीने केंद्रीय स्तरावरून एमबीबीएसच्या ५० जागांसह रुग्णालयाला मान्यता मिळाल्याचा उल्लेख त्यांनी केला. यासाठी केंद्रीय मंत्री जे. पी. नड्डा आणि पंतप्रधान नरेंद्र मोदी यांचे त्यांनी आभार मानले. माधुरी ताई आणि मुरली अण्णा यांनी यासाठी सातत्याने प्रयत्न केल्याचंही त्यांनी सांगितलं.

विधानपरिषदेच्या पाचही जागा जिंकण्याचा विश्वास

आगामी निवडणुकीबाबत बोलताना फडणवीसांनी महायुतीच्या विजयाचा विश्वास व्यक्त केला. विधानपरिषदेच्या एकूण पाच जागांवर महायुतीचे उमेदवार निवडून येतील, असं ते म्हणाले. पुणे शिक्षक मतदारसंघासह अमरावती शिक्षक मतदारसंघातील निवडणुकीचाही त्यांनी उल्लेख केला.

अपक्ष उमेदवार सचिन सानप यांच्या उमेदवारीबाबत बोलताना त्यांनी भाजप, शिवसेना आणि राष्ट्रवादी काँग्रेसच्या आमदारांनी व नगरसेवकांनी निवडणुकीच्या कामात सक्रिय राहावं, अशी अपेक्षा व्यक्त केली. निवडणूक पूर्ण ताकदीने लढवण्याचे निर्देश दिल्याचंही त्यांनी सांगितलं. आता उमेदवारांचा प्रचार, पक्षांतर्गत समन्वय आणि महायुतीची पुढील रणनीती याकडे राजकीय वर्तुळाचं लक्ष लागलं आहे.

‘विरोध केल्यास खलास करू’; राष्ट्रवादीच्या आमदाराला धमकीचे पत्र, समान नागरी कायद्यावरून मोठी खळबळ!