मंगळवार, 27 ऑक्टोबर 2026
(फोटो- सोशल मिडिया)
Eknath Shinde : राज्यातील दुष्काळी परिस्थितीमुळे राज्यात मोठी गंभीर परिस्थिती उभी राहिली आहे. पावसाच्या अभावामुळे पाण्याचा मोठा तुटवडा आतापासूनच जाणवू लागला आहे. शेतकरीवर्ग हवालदिल झाला असून नापिकीमुळे शेतकरी बांधवाना मोठ्या संकटाला सामोरे जावे लागत आहे. अश्यातच कर्जबाजारीपणामुळे हैराण असलेल्या शेतकऱ्यांना कर्जवसुलीसाठी मोठ्या त्रासाला सामोरे जावे लागल्याच्या घटना राज्यात घडल्या आहे.
यावरूनच उपमुख्यमंत्री एकनाथ शिंदे यांनी मोठे भाष्य केले आहे. ‘दुष्काळग्रस्त शेतकऱ्यांच्या पाठिशी सरकार ठाम उभं असून शेतकऱ्यांची दिवाळी काळी होऊ देणार नाही,’ असं वक्तव्य त्यांनी केलं आहे. आज (मंगळवार, 27 ऑकटोबर) झालेल्या कॅबिनेट बैठकीनंतर उपमुख्यमंत्री शिंदे माध्यमांशी संवाद साधत होते.
माध्यमांशी संवाद साधताना शिंदे म्हणाले, “शेतकऱ्यांची दिवाळी काळी होऊ देणार नाही. दुष्काळग्रस्त शेतकऱ्यांच्या पाठिशी सरकार आहे. राज्य सरकार 31 ऑक्टोबरला केंद्राला प्रस्ताव पाठवणार आहे. मायक्रो फायनान्स कंपन्यांनी सक्तीची वसुली करु नये. कर्जवसुलीचा तगादा लावणाऱ्या कंपन्यांवर कठोर कारवाई करणार. सावकार, फायनान्स कंपनी कोणाचीही गय केली जाणार नाही.”
‘पिण्याच्या पाण्याला प्राधान्य देण्याचे निर्देश दिले असून चारा लागवडीसाठी हमीभाव जाहीर करणार असल्याचे शिंदे यांनी यावेळी सांगितले. तसेच, शेतकऱ्याला नडणाऱ्याला सोडणार नाही,’ असा गंभीर इशारा देखील त्यांनी दिला. शेतकऱ्यांना तातडीची 5 हजार रुपये मदत जाहीर झाली असल्याचे त्यांनी यावेळी सांगितले.
मल्लिकार्जुन खर्गे यांनी पंतप्रधान नरेंद्र मोदी यांच्यावरील केलेल्या वक्तव्याचा एकनाथ शिंदे यांनी यावेळी निषेध केला. तसेच, ‘खर्गेंना पक्षातून काढून टाका,’ असे म्हणत त्यांनी काँग्रेसला देखील इशारा दिला. ते म्हणाले, “खर्गेंना पक्षातून काढून टाका. हा नेपाळ, बांगलादेश नाही तर नवा भारत आहे. खर्गेंच्या मोदींवरील वक्तव्याचा निषेध आहे. मोदी देश जोडणारे आहेत तर विरोधक देश तोडणारे आहेत.”
एकीकडे शेतकऱ्यांच्या मदतीचा मुद्दा आणि दुसरीकडे राजकीय आरोप-प्रत्यारोप, यामुळे शिंदे यांच्या पत्रकार परिषदेत दोन्ही विषय चर्चेत राहिले. आता शेतकऱ्यांना दिलेल्या आश्वासनांचं रूपांतर प्रत्यक्ष मदतीत कधी होतं, याकडे राज्यातील शेतकरी डोळे लावून बसले आहेत.
Ans: एकनाथ शिंदे यांनी शेतकऱ्यांची दिवाळी काळी होऊ देणार नाही, असं आश्वासन दिलं. दुष्काळग्रस्त शेतकऱ्यांना मदत मिळवून देण्यासाठी राज्य सरकार प्रयत्नशील असल्याचंही त्यांनी सांगितलं.
Ans: मायक्रोफायनान्स कंपन्या आणि सावकारांनी शेतकऱ्यांना कर्जवसुलीसाठी त्रास देऊ नये, असं शिंदे यांनी बजावलं. सक्तीची वसुली करणाऱ्यांवर कठोर कारवाई करण्याचा इशाराही त्यांनी दिला.
Ans: एकनाथ शिंदे यांनी 5 हजार रुपयांच्या तातडीच्या मदतीबाबत घोषणा केली आहे. मात्र, प्रत्यक्ष वितरणाची तारीख, पात्रता आणि अर्जप्रक्रिया यांचा अधिकृत तपशील उपलब्ध नाही.
