रविवार, 25 ऑक्टोबर 2026
फोटो सौजन्य सोशल मिडिया
बुलढाणा : राज्यातील दुष्काळी परिस्थिती आणि शेतकरी आत्महत्यांचा प्रश्न चर्चेत असतानाच वंचित बहुजन आघाडीचे प्रमुख प्रकाश आंबेडकर यांनी बुलढाण्यात माध्यमांशी संवाद साधताना अनेक मुद्द्यांवर सरकार आणि राजकीय व्यवस्थेवर टीका केली. शेतकऱ्यांच्या मतदानाच्या भूमिकेपासून ते अमरावती शिक्षक मतदारसंघातील निवडणूक खर्चापर्यंत त्यांनी विविध विषयांवर भाष्य केले. त्यांच्या काही विधानांमुळे राजकीय चर्चांना सुरुवात झाली आहे. (Prakash Ambedkar)
शेतकऱ्यांसाठी प्रामाणिकपणे लढणाऱ्या नेत्यांना शेतकरी मतदान करत नसल्याची खंत प्रकाश आंबेडकर यांनी व्यक्त केली. बुलढाण्यात रविकांत तुपकर शेतकऱ्यांच्या प्रश्नांसाठी लढत असल्याचा उल्लेख करत त्यांनी निवडणुकीतील मतदानाच्या पद्धतीवर टीका केली. यावेळी त्यांनी वादग्रस्त वक्तव्य करत ‘शेतकरीच नालायक आहे, त्यांच्यासाठी लढणाऱ्यालाच ते मत देत नाहीत,” असं विधान त्यांनी यावेळी केलं.
शेतकरी आत्महत्यांच्या संदर्भात बोलताना त्यांनी अत्यंत वादग्रस्त विधान केले. आत्महत्या करणाऱ्या शेतकऱ्यांच्या कुटुंबीयांना भेटण्यासाठी पुढाऱ्यांनी जाण्याच्या पद्धतीवरही त्यांनी प्रश्न उपस्थित केला. त्यांच्या या वक्तव्यावर राजकीय आणि सामाजिक स्तरावर प्रतिक्रिया उमटण्याची शक्यता आहे.
आंबेडकर म्हणाले की ‘जे लोक स्वतःच जीवन संपवतात त्यांच्या कुटुंबियांना भेटायला कुठल्याही पुढाऱ्याने जाऊ नये. मरायचंच असेल तर 10-12 पुढाऱ्यांना मारा आणि मग मरा..’
राज्यातील दुष्काळी परिस्थितीचा उल्लेख करत आंबेडकर यांनी अन्नधान्य, पिण्याचे पाणी आणि जनावरांच्या चाऱ्याच्या नियोजनावर सरकारला लक्ष्य केले. अल निनोच्या संभाव्य परिणामांची माहिती आधीपासून असतानाही पुरेशी तयारी झाली नसल्याचा आरोप त्यांनी केला.
दुष्काळग्रस्त नागरिकांना आवश्यक मदत मिळाली नाही, तर त्यांनी मंत्री, आमदार आणि खासदारांना जाब विचारावा, असे आवाहनही त्यांनी केले. पर्यावरणाचा ऱ्हास आणि पावसाची कमतरता या दोन्ही मुद्द्यांकडे गांभीर्याने पाहण्याची गरज त्यांनी व्यक्त केली.
अमरावती शिक्षक मतदारसंघाच्या निवडणुकीबाबत बोलताना प्रकाश आंबेडकर यांनी उमेदवारांकडून मतांसाठी पैसे खर्च केल्याचा आरोप केला. प्रत्येक मतामागे पाच हजार रुपये खर्च झाल्याचा दावा करत त्यांनी या पैशांचा स्रोत काय, असा सवाल उपस्थित केला.
शेतकरी संकट, सरकारी मदतीचे नियोजन आणि निवडणुकीतील पैशांचा कथित वापर हे मुद्दे पुन्हा चर्चेत आले आहेत. प्रकाश आंबेडकर यांच्या वक्तव्यावर संबंधित राजकीय नेते आणि प्रशासन काय प्रतिक्रिया देतात, तसेच निवडणूक खर्चाबाबत कोणती अधिकृत चौकशी होते का, याकडे लक्ष लागले आहे.
Ans: प्रकाश आंबेडकर यांनी शेतकरी आत्महत्या, शेतकऱ्यांचे मतदान आणि दुष्काळी परिस्थितीवर भाष्य केले.
Ans: दुष्काळाचा सामना करण्यासाठी अन्नधान्य, पाणी आणि जनावरांच्या चाऱ्याचे पुरेसे नियोजन करण्यात आले नसल्याचा आरोप त्यांनी केला.
Ans: प्रकाश आंबेडकर यांनी उमेदवारांकडून प्रत्येक मतासाठी पाच हजार रुपये खर्च झाल्याचा आरोप केला आणि या पैशांच्या स्रोताबाबत चौकशी व्हावी, असा सवाल उपस्थित केला.
