'...तर १० मिनिटांत महाराष्ट्र बंद पडला पाहिजे’; जरांगे पाटलांचा इशारा
मराठा आरक्षणाच्या मागणीसाठी सुरू असलेल्या आंदोलनाच्या पार्श्वभूमीवर मनोज जरांगे पाटील यांनी मराठा समाजाला महत्त्वाचे आवाहन केले आहे. येत्या १२ सप्टेंबर रोजी राज्यभरातील मराठा समाजबांधवांनी अंतरवाली सराटी येथे यावे, असे जरांगे पाटील यांनी म्हटले आहे. सरकारला आपल्या मागण्यांवर निर्णय घेण्यासाठी १२ तारखेपर्यंत वेळ दिल्याचेही त्यांनी सांगितले.
जरांगे पाटील यांनी आंदोलनादरम्यान शांतता राखण्याचे आवाहन केले आहे. पोलिसांनी कितीही त्रास दिला तरी मराठा आंदोलकांनी पोलिसांना कोणत्याही प्रकारचा त्रास देऊ नये, असे त्यांनी स्पष्ट केले. आंदोलनाच्या काळात समाजबांधवांनी संयम बाळगावा, अशी भूमिका त्यांनी मांडली. मात्र, अंतरवाली सराटीकडे येणाऱ्या मराठा आंदोलकांवर हल्ला झाल्यास त्याचे तीव्र पडसाद उमटतील, असा इशाराही जरांगे पाटील यांनी दिला. “अंतरवालीत येताना कुणावर हल्ला झाला, एकाचंही रक्त निघालं तर १० मिनिटांच्या आत अख्खा महाराष्ट्र बंद पडला पाहिजे,” असे आवाहन त्यांनी केले.
जरांगे पाटील यांच्या या वक्तव्यामुळे १२ सप्टेंबरकडे आता सर्वांचे लक्ष लागले आहे. राज्यातील विविध भागांत मराठा आरक्षणाच्या समर्थनार्थ उपोषणे, रास्ता रोको आणि इतर आंदोलने सुरू असतानाच अंतरवाली सराटी येथे मोठ्या संख्येने समाजबांधवांना एकत्र येण्याचे आवाहन करण्यात आले आहे. मराठा आरक्षणाच्या मागण्यांवर सरकारने १२ सप्टेंबरपर्यंत निर्णय घ्यावा, अशी जरांगे पाटील यांची भूमिका आहे. त्यामुळे पुढील काही दिवसांत सरकारकडून काय भूमिका घेतली जाते आणि १२ सप्टेंबर रोजी अंतरवाली सराटी येथे आंदोलनाला कसा प्रतिसाद मिळतो, याकडे राज्याचे लक्ष असणार आहे.
मराठा आरक्षण आंदोलन आता महत्त्वाच्या टप्प्यावर पोहोचले आहे. आपल्या विविध मागण्यांसाठी आमरण उपोषणाला बसलेल्या मनोज जरांगे पाटील यांनी उपोषणाच्या आठव्या दिवसापासून पाणी आणि सलाईन घेणे बंद केले. तसेच वैद्यकीय उपचार घेण्यासही नकार दिला. आज त्यांच्या आंदोलनाचा दहावा दिवस आहे. आपल्या सर्व मागण्यांची अंमलबजावणी झाल्याशिवाय कोणताही पर्याय स्वीकारणार नसल्याची ठाम भूमिका जरांगे पाटील यांनी घेतली आहे. त्यामुळे सरकार आणि आंदोलकांमधील चर्चेला पुन्हा वेग येण्याची शक्यता निर्माण झाली आहे.
काही दिवसांपूर्वी मंत्र्यांच्या शिष्टमंडळाने जरांगे पाटील यांची भेट घेतली होती. प्रमुख मागण्यांपैकी काही मागण्यांवर दोन दिवसांत कार्यवाही केली जाईल, असे आश्वासन देण्यात आल्यानंतर त्यांनी पाणी आणि सलाईन घेण्यास संमती दिली होती. मात्र, अपेक्षित प्रगती होत नसल्याचे सांगत त्यांनी पुन्हा पाणी घेण्यास नकार दिला.
मनोज जरांगे पाटील हे २९ ऑगस्ट २०२६ पासून जालना जिल्ह्यातील अंतरवाली सराटी येथे बेमुदत उपोषणाला बसले आहेत. आज, सोमवार ७ सप्टेंबर रोजी त्यांच्या आंदोलनाचा दहावा दिवस आहे. ५ सप्टेंबरपासून त्यांनी पाणी तसेच कोणत्याही प्रकारचे वैद्यकीय उपचार घेण्यास नकार दिला आहे. दीर्घकाळ सुरू असलेल्या उपोषणामुळे त्यांच्या प्रकृतीबाबत चिंता व्यक्त केली जात आहे. मात्र, जरांगे पाटील आपल्या मागण्यांवर ठाम आहेत. सरकारने मागण्यांवर निर्णय न घेतल्यास १२ सप्टेंबर रोजी मुंबईत मोठे आंदोलन करण्याचा इशारा त्यांनी दिला आहे.
जरांगे पाटील यांच्या प्रमुख मागण्यांमध्ये निवृत्त न्यायमूर्ती शिंदे समितीला सापडलेल्या ५८ लाख कुणबी नोंदींच्या आधारे पात्र व्यक्तींना तातडीने कुणबी प्रमाणपत्र देण्याची मागणी आहे. याशिवाय मराठा विद्यार्थ्यांसाठी काम करणाऱ्या ‘सारथी’ संस्थेला निधी उपलब्ध करून देणे, हैदराबाद गॅझेटियरची अंमलबजावणी करणे, मराठा आरक्षण आंदोलनादरम्यान आंदोलकांवर दाखल झालेले गुन्हे मागे घेणे आणि ‘मराठा व कुणबी’ यांच्यासाठी स्वतंत्र मंत्रालय स्थापन करणे, अशा विविध मागण्याही त्यांनी सरकारसमोर ठेवल्या आहेत. आता सरकार या मागण्यांबाबत काय निर्णय घेते आणि १२ सप्टेंबरपूर्वी आंदोलनावर तोडगा निघतो का, याकडे संपूर्ण राज्याचे लक्ष लागले आहे.
मराठा आरक्षणाच्या मागणीसाठी उद्या ‘सातारा बंद’चे आवाहन; राजधानी मराठा क्रांती मोर्चाचा निर्णय
.png "Videos"){kind=small}
