शुक्रवार, 9 ऑक्टोबर 2026
(Photo - X)
MLC Election 2026 : राज्यात विधानपरिषदेच्या पाच जागांसाठी निवडणुकांची रणधुमाळी आता सुरु झाली आहे. आज (शुक्रवार, 9 ऑकटोबर) उमेदवारी अर्ज मागे घेण्याचा शेवटचा दिवस होता. त्या पार्श्वभूमीवर बंडखोरी करून अर्ज दाखल केलेल्या उमेदवारांनी तसेच अपक्ष उमेदवारी अर्ज दाखल केलेल्यांनी आपले अर्ज माघारी घेतले आहेत. अश्यातच पुणे शिक्षक मतदारसंघातून मोठी बातमी समोर येत असून शिवसेनेचे उमेदवार मंगेश चिवटे यांनी आपला उमेदवारी अर्ज मागे घेतला आहे. पुण्यातून चिवटेंनी उमेदवारी अर्ज दाखल केल्याने महायुतीत तणावाचे वातावरण होते. मात्र आता त्यांनी आपला अर्ज मागे घेतल्याचे स्पष्ट झाले आहे.
यासोबतच, पुणे पदवीधर मतदारसंघातून राष्ट्रवादीच्या प्रताप भैया माने यांनीदेखील आपला उमेदवारी अर्ज मागे घेतला आहे. त्यामुळे या जागांवरून महायुती निर्माण झालेला तिढा आता संपुष्टात आल्याचे चित्र दिसत आहे.
पुणे शिक्षक मतदारसंघातून भाजपने कौस्तुभ गावडे यांना उमेदवारी दिली होती. मात्र, शिवसेनेकडून मंगेश चिवटे यांनीही अर्ज दाखल केल्याने महायुतीसमोर अडचण निर्माण झाली होती. एकाच आघाडीतील दोन उमेदवार मैदानात असल्याने मतविभाजनाची शक्यता व्यक्त केली जात होती.
अखेर पक्षातील वरिष्ठांच्या आदेशानंतर मंगेश चिवटे यांनी आपला उमेदवारी अर्ज मागे घेतला. अर्ज माघारीनंतर चिवटेंना माध्यमांनी याबाबत प्रश्न विचारला असता त्यांनी थोडक्यात प्रतिक्रिया देत, “पक्षाचे वरिष्ठ नेते यावर भाष्य करतील, मी लहान कार्यकर्ता आहे,” असे विधान केले.
चिवटे यांच्या या प्रतिक्रियेमुळे आता शिवसेनेचे मुख्य नेते आणि उपमुख्यमंत्री एकनाथ शिंदे यांच्यासह पक्षातील वरिष्ठ नेते या घडामोडींवर काय भूमिका मांडतात, याकडे राजकीय वर्तुळाचे लक्ष लागले आहे.
भाजपने महायुतीकडून पुणे पदवीधर मतदारसंघातून स्मिता जाधव यांना उमेदवारी दिली होती. मात्र, राष्ट्रवादी काँग्रेसचे प्रताप उर्फ भैय्या माने यांनीही अर्ज दाखल केल्याने महायुतीमध्ये पेच निर्माण झाला होता. अखेर वैद्यकीय शिक्षणमंत्री हसन मुश्रीफ यांनी मानेंची भेट घेऊन त्यांची समजूत काढली. जनसुराज्य शक्ती पक्षाचे नेते विनय कोरे आणि सुमित कदम यांनीही माघार घेण्याची विनंती केल्याचे मानेंनी सांगितले.
माघारीबाबत बोलताना भैय्या माने म्हणाले की, कार्यकर्त्यांनी केलेले शक्तिप्रदर्शन हे त्यांच्या भावना व्यक्त करण्यासाठी होते. आपल्यावर कोणताही दबाव नव्हता. मात्र, महायुतीच्या नेत्यांनी केलेल्या आवाहनाला प्रतिसाद देत आपण उमेदवारी मागे घेतली.
“मी माघार घेतल्याने नक्कीच महायुतीला फायदा होईल,” असेही त्यांनी स्पष्ट केले. विशेष म्हणजे, माघारीच्या बदल्यात कोणतेही आश्वासन मिळाले नसल्याचेही माने यांनी सांगितले.
महायुतीतील दोन्ही उमेदवारांनी माघार घेतल्याने पुणे शिक्षक आणि पुणे पदवीधर मतदारसंघांतील राजकीय समीकरणे बदलली आहेत. मात्र, निवडणुकीतील लढत अद्याप महत्त्वाची ठरणार आहे. माजी आमदार दत्तात्रय सावंत यांनीही पुणे शिक्षक मतदारसंघातून उमेदवारी अर्ज दाखल केला आहे. त्यामुळे महायुती, महाविकास आघाडी आणि अपक्ष उमेदवारांमध्ये कशी लढत रंगते, याबाबत उत्सुकता आहे. सचिन सानप यांच्या भूमिकेकडेही राजकीय वर्तुळाचे लक्ष लागले आहे.
एकीकडे महायुतीने अंतर्गत मतभेद दूर करण्याचा प्रयत्न केला आहे, तर दुसरीकडे उर्वरित उमेदवारांच्या भूमिकेमुळे निवडणुकीतील चुरस कायम राहण्याची शक्यता आहे.
Ans: पक्षातील वरिष्ठांच्या आदेशानंतर मंगेश चिवटे यांनी पुणे शिक्षक मतदारसंघातून आपला उमेदवारी अर्ज मागे घेतला.
Ans: महायुतीतील नेते हसन मुश्रीफ, विनय कोरे आणि सुमित कदम यांच्या विनंतीला प्रतिसाद देत आपण माघार घेतल्याचे भैय्या माने यांनी सांगितले.
Ans: “पक्षाचे वरिष्ठ नेते यावर भाष्य करतील, मी लहान कार्यकर्ता आहे,” अशी प्रतिक्रिया मंगेश चिवटे यांनी माध्यमांशी बोलताना दिली.
