नगरपरिषद-नगरपंचायती निवडणुकीच्या प्रचाराला उरला फक्त एकच दिवस; रविवार ठरणार ‘सुपर संडे’

एक दिवसाची मुदतवाढ दिल्याने प्रत्यक्ष मतदानाचा एक दिवसाआधीपर्यंत प्रचार करता येईल. मात्र, सर्वाधिक लक्ष रविवार या सुटीचा दिवशी असून, खऱ्या अर्थात सर्वच उमेदवारांसाठी तो 'सुपर संडे' असणार आहे. 

नागपूर : राज्यातील अनेक भागांत नगरपरिषद आणि नगरपंचायतींच्या निवडणुका घेतल्या जात आहेत. या निवडणुकीसाठीचे मतदान 2 डिसेंबरला घेतले जाणार असून, त्याचे निकाल 3 डिसेंबर रोजी जाहीर केले जाणार आहेत. तत्पूर्वी नागपूर जिल्ह्यातील 15 नगरपालिका व 12 नगर पंचायतीसाठी येत्या मंगळवारी (दि. २) मतदान होणार आहे.

यंदा निवडणूक आयोगाने कमी दिवस मिळाल्याने प्रचारात एक दिवसाची मुदतवाढ दिल्याने प्रत्यक्ष मतदानाचा एक दिवसाआधीपर्यंत प्रचार करता येईल. मात्र, सर्वाधिक लक्ष रविवार या सुटीचा दिवशी असून, खऱ्या अर्थात सर्वच उमेदवारांसाठी तो ‘सुपर संडे’ असणार आहे. रविवार हा सुट्टीचा दिवस असल्याने सबंध जिल्ह्यात प्रचाराचा अक्षरक्षः धूमधडाका असेल. सर्वत्र सकाळपासूनच सभा, रॅली, कॉर्नर बैठकांची गदीं असेल. जिल्ह्यातील एकूण २७ ठिकाणी गेल्या काही दिवसांपासून प्रचाराची धूम सुरू आहे. ५४६ नगरसेवकांना या सर्व नगरपंचायत व नगरपालिकांमधून निवडून द्यायचे आहेत.

हेदेखील वाचा : ‘पंतप्रधान नरेंद्र मोदी, मुख्यमंत्री देवेंद्र फडणवीस यांच्या सक्षम नेतृत्त्वावर जनतेचा विश्वास’; शिवेंद्रसिंहराजेंचं विधान

प्रत्येक प्रभागातील राजकीय पक्ष त्यांचे नगराध्यक्ष व नगरसेवकपदाच्या उमेदवारांसाठी प्रचाराची राळ उठवत आहे. अपक्षांनीही जोर मारण्याचा प्रयत्न केला आहे. रविवारी (दि.३०) नोव्हेंबर हा त्यांच्यासाठी ‘मोठा दिवस’ ठरेल. शक्य तेवढी सर्व शक्ती पणाशी लावून आपल्या कुवतीप्रमाणे सारेच उमेदवार मतदारांना मतांचा जोगवा मागतील. यात विविध पध्दतीने प्रचार रॅली काढतील.

दरम्यान, सोमवारी (दि.1) रात्री १० वाजता प्रचारतोफा थंडावतील. त्यामुळे दोन दिवसात शक्य तेवढा प्रचार करून मतदारांना आकर्षित करण्याची कुठलीही संधी उमेदवार सोडतांना दिसत नाही. १० नोव्हेंबरपासून नगरपालिका व नगर पंचायतीच्या निवडणुकींच्या प्रक्रियेला सुरुवात झाली. २६ नोव्हेंबरला चिन्ह वाटपानंतर प्रचाराला खरी रंगत आली. राजकीय पक्षांनी २१ नोव्हेंबरपासूनच आपल्या प्रचाराचा धडाका लावला. जिल्ह्यात राज्याचे मुख्यमंत्री देवेंद्र फडणवीस, उपमुख्यमंत्री अजित पवार आणि दुसरे उपमुख्यमंत्री एकनाथ शिंदे यांच्या प्रचार सभांनी रंगत आणली.

रविवारी प्रचारतोफा अधिक धडाडणार

रविवारी (दि. ३०) प्रचारतोफा अधिक धडाडणार असून आरोप-प्रत्यारोपांच्या फैरी झडणार आहेत. अफवांचाही बाजार गरम असून सर्वच राजकीय पक्ष, अपक्ष संपूर्ण ताकदीने कामाला लागले आहेत. प्रत्येक पक्ष स्वबळावर निवडणुकीच्या रिंगणात उतरला असून, आपली ताकद आजमावत आहे. रविवार हा अनेक भागातील बाजाराचा अन् सुटीचा दिवस असल्याने या दिवशी मतदारांना गाठण्यासाठी उमेदवारांची धावपळ सुरू आहे.

सोशल मीडियाचा जोरदार वापर

बहुतांश उमेदवारांकडून सोशल मीडियाचा प्रचाराकरिता पुरेपुर वापर करण्यात येत असल्याचे दिसून येत आहे. निवडणुकीच्या रिंगणात असलेले उमेदवार व त्यांच्या कार्यकर्त्यांनी वेगवेगळे ग्रुप तयार करून त्या माध्यमातून मतदारांशी संवाद सुरू केला आहे. आपण आजवर काय केले आणि निवडून दिल्यास काय करणार आहे.

हेदेखील वाचा : Dharashiv News: धाराशिवमध्ये ८ नगरपरिषद निवडणुका: २८७ केंद्रांवर होणार मतदान, ३ डिसेंबरला निकाल