Raj Thackeray on Sanjay Raut : ‘बाळासाहेबांनी मुलाखतीतच शिव्या दिल्या, तरी राऊतांनी छापल्या,’ राज ठाकरेंनी सांगितला जुना किस्सा!

Raj Thackeray on Sanjay Raut : संजय राऊत यांच्या 'बोध कीर्तन' पुस्तक प्रकाशन सोहळ्यात राज ठाकरे यांनी जुन्या आठवणींना उजाळा दिला. बाळासाहेब ठाकरे यांच्या मुलाखतीत त्यांनी दिलेल्या शिव्याही संजय राऊत यांनी प्रसिद्ध केल्या होत्या. त्यानंतर बाळासाहेबांनी 'बंदे में दम है' अशी प्रतिक्रिया दिल्याचा किस्सा राज ठाकरेंनी सांगितला.

• ‘बोध कीर्तन’ पुस्तक प्रकाशनाला राज ठाकरे यांची उपस्थिती
• संजय राऊत आणि राज ठाकरे यांच्या जुन्या मैत्रीचे किस्से
• बाळासाहेब ठाकरे यांच्या मुलाखतीचा राज ठाकरेंनी सांगितला किस्सा

 

मुंबई : शिवसेना ठाकरे गटाचे खासदार संजय राऊत यांच्या ‘बोध कीर्तन’ पुस्तकाचा प्रकाशन सोहळा नुकताच पार पडला. या कार्यक्रमाला मनसे अध्यक्ष राज ठाकरे आणि शिवसेना पक्षप्रमुख उद्धव ठाकरे यांची उपस्थिती होती. यावेळी राज ठाकरे यांनी संजय राऊत यांच्यासोबतच्या जुन्या आठवणींना उजाळा दिला. (Raj Thackeray on Sanjay Raut)

राज ठाकरे यांनी बोलताना बाळासाहेब ठाकरे यांच्या एका जुन्या मुलाखतीचा किस्सा सांगितला. संजय राऊतांच्या पत्रकारितेतील धाडसाचं कौतुकदेखील राज ठाकरे यांनी केलं.

संजय राऊत आणि राज ठाकरेंची जुनी मैत्री

राज ठाकरे म्हणाले की, संजय राऊत यांच्यासोबतचे आपले संबंध खूप जुने आहेत. दिलीप ठाकूर आणि संजय राऊत हे आपल्या वडिलांकडे तासन्तास बसायचे. एवढंच नाही, तर त्यांनी वडिलांच्या शिव्याही खाल्ल्या आहेत. संजय राऊत यांचा पहिला संबंध आपल्या वडिलांशी आला आणि त्यानंतर बाळासाहेब ठाकरे यांच्याशी आला, असं राज यांनी सांगितलं.

Sanjay Raut : ‘अधूनमधून लेखकांना तुरुंगात पाठवायला पाहिजे’; संजय राऊतांची फटकेबाजी, ‘बोध कीर्तन’ पुस्तकाचे प्रकाशन

बाळासाहेबांच्या मुलाखतीत नेमकं काय घडलं?

१९८६ ते १९८८ या काळात राज ठाकरे ‘मार्मिक’साठी व्यंगचित्र काढत होते. त्यावेळी संजय राऊत ‘लोकप्रभा’मध्ये काम करत होते आणि गँगवॉरवरील कथा लिहिण्यासाठी ओळखले जात होते. याच काळात संजय राऊत यांनी बाळासाहेब ठाकरे यांची ‘लोकप्रभा’साठी मुलाखत घेण्याची इच्छा व्यक्त केली. त्यासाठी त्यांनी राज ठाकरेंना विचारणा केली. राज यांनीही त्यांना मुलाखतीसाठी मदत केली. मात्र, मुलाखतीदरम्यान राऊतांनी बाळासाहेबांना काही वेडेवाकडे प्रश्न विचारले. त्यावर बाळासाहेबांनी त्यांना चांगल्याच शिव्या दिल्या. विशेष म्हणजे, राऊतांनी मुलाखत प्रसिद्ध करताना त्या शिव्याही काढून टाकल्या नाहीत.

मुलाखत शिव्यांसह प्रसिद्ध झाल्यानंतर बाळासाहेबांनी संजय राऊत यांच्याबद्दल ‘बंदे में दम है’ अशी भावना व्यक्त केली होती, असा किस्सा राज ठाकरेंनी सांगितला. पुढे १९९२ मध्ये राज ठाकरेंनी बाळासाहेबांना संजय राऊत चांगलं लिहितात, असं सांगितलं. त्याच वर्षी राऊत ‘सामना’चे संपादक झाले, अशी आठवणही त्यांनी सांगितली.

‘बोधनकरांपासून बोध कीर्तनापर्यंतचा प्रवास’

संजय राऊत यांच्या पत्रकारितेपासून सुरू झालेला प्रवास आज पुस्तक प्रकाशनापर्यंत पोहोचला आहे. ‘बोधनकरांपासून सुरू झालेला प्रवास बोध कीर्तनापर्यंत येईल, असं वाटलं नव्हतं,’ अशी मिश्किल टिप्पणी करत राज ठाकरेंनी आपल्या भाषणाचा समारोप केला.

Maharashtra Politics : महायुतीत नेमकं चाललंय काय? धंगेकर – बन यांच्यात सोशल मीडिया वॉर, एकनाथ शिंदेंनी दिला महत्त्वाचा सल्ला