बुधवार, 23 सप्टेंबर 2026
शिवसेनेची सुनावणी स्थगित
मुंबई : शिवसेना पक्ष आणि धनुष्यबाण या निवडणूक चिन्हाचा हा वाद गेल्या अनेक महिन्यांपासून प्रलंबित आहे. सध्या राज्याचे उपमुख्यमंत्री एकनाथ शिंदे यांच्या शिवसेना पक्षाकडे हे चिन्ह आहे. मात्र, त्याला माजी मुख्यमंत्री उद्धव ठाकरे यांनी आव्हान दिले आहे. त्यामुळे यावर निर्णय येणे अद्याप बाकी आहे. शिवसेना पक्षाचे नाव आणि निवडणूक चिन्हाच्या वादावरील सुनावणी मंगळवारी होऊ शकली नाही. मिळालेल्या माहितीनुसार, तीन सदस्यीय खंडपीठाला बैठक बोलावता न आल्याने सुनावणी पुढे ढकलण्यात आली.
आता या याचिकेवर बुधवारी सरन्यायाधीश सूर्यकांत, न्यायमूर्ती जॉयमाल्य बागची आणि न्यायमूर्ती व्ही. मोहना यांचा समावेश असलेल्या तीन सदस्यीय खंडपीठासमोर सुनावणी होणार आहे. यापूर्वी, १६ आणि १७ सप्टेंबर रोजी झालेल्या सुनावणीदरम्यान, एकनाथ शिंदे गटाचे प्रतिनिधित्व करणारे ज्येष्ठ वकील नीरज किशन कौल यांनी निवडणूक आयोगाच्या निर्णयाचे समर्थन करणारा युक्तिवाद सादर केला होता. शिंदे गटाने एकनाथ शिंदे यांना शिवसेनेचे नाव आणि चिन्ह देण्याच्या निवडणूक आयोगाच्या निर्णयाचे समर्थन केले होते.
दरम्यान, ठाकरे गटाचे प्रतिनिधित्व करणारे ज्येष्ठ वकील कपिल सिब्बल आणि देवदत्त कामत यांनी असा युक्तिवाद केला की, निवडणूक आयोगाचा निर्णय संविधानातील कायद्यांचे उल्लंघन करतो.
दोन गटांना स्वतंत्र चिन्हे का दिली नाहीत?
मागील सुनावणीत, सर्वोच्च न्यायालयाने निवडणूक आयोगाच्या निर्णय प्रक्रियेवर प्रश्नचिन्ह उपस्थित केले आणि विचारले की दोन गटांना (ठाकरे आणि शिंदे) स्वतंत्र चिन्हे देण्याच्या पर्यायाचा विचार का केला गेला नाही. शिंदे गटाच्या वकिलांनी असाही युक्तिवाद केला की, मागील निवडणुकीत शिंदे गटाला उद्धव ठाकरे गटापेक्षा जास्त मते मिळाली होती, जे जनतेचा पाठिंबा दर्शवते.
मते शिवसेनेसाठी होती
सर्वोच्च न्यायालयाने स्पष्टपणे सांगितले की ही मते कोणत्याही एका व्यक्तीसाठी नसून शिवसेनेसाठी होती. न्यायालयाने असेही म्हटले की, दोन्ही गटांनी शिवसेनाप्रमुख बाळासाहेब ठाकरे यांच्या वारशावर अवलंबून न राहता, स्वतःच्या ताकदीवर मते मिळवण्याची आपली क्षमता दाखवायला हवी होती. ठाकरे गटाने शिवसेनेचे निवडणूक चिन्ह, धनुष्यबाण, गोठवण्याची मागणी केली आहे.
