‘शिवसेना ठाकरेंची, शिंदेंची होऊ शकत नाही’; धनुष्यबाण गोठवण्याची कपिल सिब्बलांची सुप्रीम कोर्टात मागणी
कपिल सिब्बल यांनी सर्वोच्च न्यायालयात युक्तिवाद करताना एकनाथ शिंदे यांनी राज्यपालांची भेट घेतल्याने त्यांचा स्वतंत्र राजकीय पक्ष निर्माण होत नाही, असा मुद्दा मांडला. शिवसेना हा मूळ पक्ष असून केवळ काही आमदार वेगळे झाल्याने पक्षाची मालकी किंवा पक्षाचे स्वरूप बदलत नाही, असा ठाकरे गटाचा युक्तिवाद आहे. ‘शिवसेना ठाकरेंचा पक्ष आहे, शिवसेना शिंदेंची होऊ शकत नाही,’ असा दावा सिब्बल यांनी केला.
या सुनावणीदरम्यान कपिल सिब्बल यांनी धनुष्यबाण हे शिवसेनेचे पारंपरिक निवडणूक चिन्ह गोठवावे, अशी मागणी सर्वोच्च न्यायालयाकडे केली. पक्षाच्या मालकीचा वाद न्यायालयीन प्रक्रियेत असताना चिन्हाबाबत अंतिम निर्णय होईपर्यंत ते गोठवण्याची भूमिका ठाकरे गटाने मांडली आहे.
सिब्बल यांनी आपल्या युक्तिवादात २०१८ मध्ये झालेल्या पक्षाच्या ठरावाचा संदर्भ दिला. त्या ठरावानुसार उद्धव ठाकरे यांना पक्षातील मोठा पाठिंबा होता, असा दावा त्यांनी केला. तसेच तत्कालीन विधानसभा गटनेते सुनील प्रभू यांनी बजावलेल्या व्हीपचे उल्लंघन करून काही आमदार बैठकीला गैरहजर राहिले. त्यामुळे संबंधित आमदार त्याच वेळी अपात्र ठरायला हवे होते, असा युक्तिवाद सिब्बल यांनी केला. त्यांच्या मते, आमदारांच्या अपात्रतेचा निर्णय वेळेत झाला असता तर त्यानंतर निर्माण झालेल्या राजकीय परिस्थितीचा प्रश्नच निर्माण झाला नसता.
कपिल सिब्बल यांनी ठाकरे गटाच्या वतीने केलेला युक्तिवाद पूर्ण केल्यानंतर आता देवदत्त कामत सर्वोच्च न्यायालयात युक्तिवाद करत आहेत. या प्रकरणातील पुढील सुनावणीकडे महाराष्ट्राच्या राजकीय वर्तुळाचे लक्ष लागले आहे. शिवसेना पक्षावरील दावा, आमदारांची अपात्रता आणि धनुष्यबाण चिन्हावर कोणाचा अधिकार राहणार, या तीनही मुद्द्यांच्या पार्श्वभूमीवर सर्वोच्च न्यायालयातील सुनावणी महत्त्वाची ठरणार आहे.
.png "Videos"){kind=small}
