Supriya Sule Meets PM Modi: सुप्रिया सुळेंच्या नेतृत्वाखाली राष्ट्रवादीचे ८ खासदार आज पंतप्रधान मोदींना भेटणार

सुप्रिया सुळे यांनी यापूर्वीच परिसीमनाबाबत पक्षाची भूमिका स्पष्ट करण्याचे संकेत दिले आहेत. प्रस्तावित बदलांमध्ये देशातील सर्व राज्यांच्या लोकसभा जागांमध्ये समान पद्धतीने वाढ करण्यात आली, तरच राष्ट्रवादी शरद पवार गटाकडून परिसीमन प्रक्रियेला पाठिंबा देण्याचा विचार केला जाऊ करू शकतो, असे सुप्रिया सुळेनी आधीच स्पष्ट केलं आहे.

• केंद्र सरकारने महाराष्ट्रातील दुष्काळग्रस्त भागाला तातडीने मदत पुरवावी
• देशातील सर्व राज्यांमध्ये लोकसभा जागांची वाढ समान पद्धतीने झाल्यासच समर्थन देणार
• देशभरातील एकूण लोकसभा मतदारसंघांची संख्या किमान ५० टक्क्यांनी वाढवण्याची अट

Maharashtra Politics: संसदेच्या पावसाळी अधिवेशनादरम्यान, राष्ट्रवादी काँग्रेस पक्षाच्या शरद पवारांच्या राष्ट्रवादीच्या खासदार सुप्रिया सुळे सोमवारी पंतप्रधान नरेंद्र मोदी यांची भेट घेणार असल्याची माहिती आहे. यावेळी त्यांच्यासोबत शरद पवार गटाचे आठ खासदारदेखील उपस्थित राहणार आहेत. सुप्रिया सुळे यांच्या नेतृत्वाखालील शिष्टमंडळाची आज सकाळी 11 वाजता संसदेत ही भेट होणार असल्याचे बोलले जात आहे. राज्यातील काही भागातील गंभीर दुष्काळी परिस्थिती, शेतकऱ्यांच्या अडचणी आणि केंद्राकडून मिळणाऱ्या मदतीबाबत या भेटीत चर्चा केली जाणार अल्याची प्राथमिक माहिती शरद पवारांच्या राष्ट्रवादीकडून देण्यात आली आहे. दरम्यान या भेटीमध्ये राजकीय चर्चा होणार का याकडेही लक्ष लागलं आहे

मतदारसंघातील प्रश्नांवरही होणार चर्चा

या बैठकीत NCP (SP)चे खासदार महाराष्ट्रातील आपल्या मतदारसंघातील समस्या आणि विकासाशी संबंधित मुद्दे पंतप्रधानांसमोर मांडणार असल्याचे सांगितले जात आहे. मात्र, सध्या केंद्र सरकारच्या प्राधान्यक्रमात असलेला परिसीमनाचा मुद्दाही या चर्चेत महत्त्वाचा ठरू शकतो. संसदेच्या पावसाळी अधिवेशनाचा शेवटचा आठवडा सुरू होत असल्याने या बैठकीकडे राजकीय वर्तुळाचे लक्ष लागले आहे.

सुप्रिया सुळेंच्या भूमिकेमुळे चर्चेला उधाण

दरम्यान, सुप्रिया सुळे यांनी यापूर्वीच परिसीमनाबाबत पक्षाची भूमिका स्पष्ट करण्याचे संकेत दिले आहेत. प्रस्तावित बदलांमध्ये देशातील सर्व राज्यांच्या लोकसभा जागांमध्ये समान पद्धतीने वाढ करण्यात आली, तरच राष्ट्रवादी शरद पवार गटाकडून परिसीमन प्रक्रियेला पाठिंबा देण्याचा विचार केला जाऊ करू शकतो, असे सुप्रिया सुळेनी आधीच स्पष्ट केलं आहे. तसेच,
देशभरातील लोकसभा मतदारसंघांची संख्या 50 टक्क्यांनी वाढवण्याची तरतूद विधेयकात करण्यत आली तरच प्रस्तावाला पाठिंबा देण्याचा विचार करू, असे सुळे यांनी माध्यमांशी बोलताना सांगितले होते.

महिला आरक्षण आणि परिसीमन विधेयकावर सरकारचा भर

केंद्र सरकारकडून महिला आरक्षण विधेयक आणि परिसीमन विधेयक या दोन्ही मुद्द्यांचा प्राधान्याने समावेश करणार असल्याचे सांगत आहे. परिसीमनाच्या माध्यमातून लोकसभा मतदारसंघांची पुनर्रचना झाल्यानंतर महिला आरक्षणाच्या तरतुदी लागू करण्याच्या दिशेने पुढे जाण्याची शक्यता वर्तवली जात आहे. पण या मुद्द्यांवरून संसदेत सरकार आणि विरोधकांमध्ये सातत्याने मतभेद उफाळून येत आहेत. त्यामुळे विविध पक्षांच्या खासदारांशी चर्चा करून सहमती निर्माण करण्याचे प्रयत्न केंद्राकडून सुरू असल्याचे दिसत आहे.

‘NDAकडे पुरेसे संख्याबळ’ – पंतप्रधान मोदी

दरम्यान, महिला आरक्षण आणि परिसीमन विधेयक मंजूर करण्यासाठी लोकसभेत NDAकडे आवश्यक संख्याबळ असल्याचा विश्वास पंतप्रधान नरेंद्र मोदी यांनी व्यक्त केला आहे. सरकारला आतापर्यंत सुमारे 366 खासदारांचा पाठिंबा मिळाल्याचे बोलले जात आहे. मात्र, संसदेतील विरोधी पक्षांचा विरोध कायम राहिल्यास आणि सध्याच्या पावसाळी अधिवेशनात या विधेयकांवर चर्चा न झाल्यास, केंद्र सरकार महिन्याच्या अखेरीस संसदेचे विशेष अधिवेशन बोलावण्याच्या पर्यायावरही विचार करू शकते, अशीही माहिती आहे.

NCP (SP)च्या भूमिकेकडे लक्ष

शरद पवार गटाच्या खासदारांनी पंतप्रधान कार्यालयाकडे भेटीसाठी वेळ मागितल्याची माहिती असून, आज 10 ऑगस्ट रोजी ही भेट होण्याची शक्यता व्यक्त केली जात आहे. या भेटीत मतदारसंघातील प्रश्नांसोबतच परिसीमन प्रक्रिया आणि महिला आरक्षणासारख्या महत्त्वाच्या राजकीय मुद्द्यांवरही चर्चा होण्याची शक्यता आहे. त्याआधी सुप्रिया सुळे यांनी परिसीमनाबाबत दिलेल्या संकेतांमुळे या संभाव्य भेटीचे राजकीय महत्त्व आणखी वाढले आहे. आता पंतप्रधान नरेंद्र मोदी यांच्यासोबतच्या चर्चेनंतर NCP (SP)चा परिसीमन विधेयकाबाबत नेमका काय निर्णय होतो, याकडे राजकीय वर्तुळाचे लक्ष लागले आहे.