चाफ्याच्या फुलाने राजकीय ‘गुलदस्ता’; उदयनराजे-रामराजेंच्या भेटीने जिल्हा बँक सभेला रंग
सातारा : सातारा जिल्हा मध्यवर्ती सहकारी बँकेची वार्षिक सर्वसाधारण सभा बँकेच्या आर्थिक विषयांपेक्षा राजकीय संकेतांमुळे अधिक चर्चेत आली. खासदार श्रीमंत छत्रपती उदयनराजे भोसले आणि विधान परिषदेचे माजी सभापती रामराजे नाईक निंबाळकर यांची एकत्रित उपस्थिती आणि त्यांच्यातील दिलखुलास संवादाने सभागृहातील राजकीय चर्चांना चांगलेच उधाण आले.
सभेच्या ठिकाणी उदयनराजे आणि रामराजे यांची लिफ्टमधून एकत्रित एन्ट्री झाली. व्यासपीठावर आल्यानंतर उदयनराजे यांनी जवळील चाफ्याचे फुल रामराजे यांना देत संवाद साधला. त्यानंतर दोघेही शेजारी बसले. सभेच्या सुरुवातीपासून अखेरपर्यंत दोघांमध्ये अधूनमधून हास्यविनोद आणि चर्चा सुरू असल्याने उपस्थितांचे लक्ष त्यांच्याकडे वेधले गेले.
जिल्हा बँकेच्या आगामी निवडणुकीच्या पार्श्वभूमीवर या भेटीचे राजकीय अर्थ काढले जात आहेत. विशेष म्हणजे, रामराजे यांनी आपल्या भाषणात उदयनराजेंचा उल्लेख करत मिश्कील टिप्पणी केली.
बँकेचे सरव्यवस्थापक सरकाळे यांनी खासदार उदयनराजे यांच्याकडून बँकेला कोणताही त्रास नसल्याचे सांगितल्याचा संदर्भ देत रामराजे म्हणाले, “त्यांचा बँकेला त्रास नसला तरी ते नुसते दिसले तरी त्रास होतो.” त्यांच्या या वक्तव्याने सभागृहात हास्याची लहर उमटली.
दरम्यान, आगामी जिल्हा बँक निवडणुकीबाबत रामराजे यांनी आपली भूमिका स्पष्ट केली. “जिल्हा बँकेच्या निवडणुकीची मला भीती नाही,” असे सांगत त्यांनी बँक ही देशातील ‘ब्रँड बँक’ असल्याचे नमूद केले. निवडणुकीच्या काळात सभासदांची पळवापळवी होऊ नये, अशी अपेक्षाही त्यांनी व्यक्त केली.
काही सभासदांनी विद्यमान संचालक मंडळ कायम राहावे, अशी इच्छा व्यक्त केल्याचेही रामराजे यांनी सांगितले. त्यामुळे बँकेच्या निवडणुकीपूर्वी झालेल्या या सभेत उदयनराजे-रामराजे यांच्यातील संवादाने अनेक राजकीय समीकरणांवर नव्याने चर्चा सुरू झाली आहे. बँकेची सभा एक; पण चर्चेचा विषय मात्र उदयनराजे आणि रामराजे यांची ‘जोडी’ ठरल्याचे चित्र दिवसभर पाहायला मिळाले.
.png "Videos"){kind=small}
