Champions Trophy 2025 : भारतविरुद्धच्या सामन्यापूर्वी पाकिस्तानला मोठा धक्का; फखर झमान चॅम्पियन्स ट्रॉफीमधून बाहेर

पाकिस्तानचा सलामीवीर फलंदाज फखर झमान भारताविरुद्धच्या सामन्यातून बाहेर पडला आहे. भारत आणि पाकिस्तान यांच्यातील सामना २३ फेब्रुवारी रोजी दुबई येथे होणार आहे. पहिल्या सामन्यात पाकिस्तानचा दारुण पराभव झाला.

Champions Trophy 2025 Fakhar Zaman : चॅम्पियन्स ट्रॉफीच्या पहिल्या सामन्यातील दारुण पराभवानंतर पाकिस्तानला आणखी एक मोठा धक्का बसला आहे. पाकिस्तानचा सलामीवीर फखर झमान चॅम्पियन्स ट्रॉफीमधून बाहेर पडला आहे. न्यूझीलंडविरुद्ध क्षेत्ररक्षण करताना फखर झमानला दुखापत झाली. त्या सामन्यात त्याने कशी तरी फलंदाजी केली पण तो काही खास कामगिरी करू शकला नाही. आता हा खेळाडू संपूर्ण स्पर्धेतून बाहेर आहे. पाकिस्तानसाठी ही खूप वाईट बातमी आहे कारण या संघाला आपला पुढचा सामना भारताविरुद्ध खेळायचा आहे. फखर हा पाकिस्तानचा स्फोटक फलंदाज आहे आणि आता जर तो नसेल तर पाकिस्तानी संघावर अधिक दबाव असेल.
फखर झमानला अशी दुखापत झाली
चॅम्पियन्स ट्रॉफीच्या पहिल्या सामन्यात न्यूझीलंडविरुद्ध क्षेत्ररक्षण करताना फखर झमानला दुखापत झाली होती. सामन्याच्या दुसऱ्या चेंडूवर, हा खेळाडू चेंडूमागे धावला आणि यादरम्यान त्याच्या पायाला दुखापत झाली. फखर बराच वेळ मैदानाबाहेर राहिला आणि जेव्हा तो मैदानात परतला तेव्हा त्याची प्रकृती ठीक दिसत नव्हती. पाकिस्तानने फखर झमानला फलंदाजीसाठी पाठवले तेव्हा त्याची दुखापत आणखी वाढली. फखर झमान शॉट्स खेळताना अनेक वेळा वेदनेने तडफडत असल्याचे दिसून आले, परिणामी त्याची दुखापत अधिक गंभीर झाली.
पाकिस्तानला चॅम्पियन्स ट्रॉफीमधून बाहेर पडण्याचा धोका
फखर झमानला वगळल्यानंतर पाकिस्तानला चॅम्पियन्स ट्रॉफीमधून बाहेर पडण्याचा धोका अधिकच वाढला आहे. खरं तर, पाकिस्तानने आधीच आपला पहिला सामना गमावला आणि जर २३ फेब्रुवारी रोजी भारताविरुद्ध पराभव झाला तर चॅम्पियन्स ट्रॉफीमधून त्यांचे बाहेर पडणे जवळजवळ निश्चित झाले. अशा परिस्थितीत, भारत आणि न्यूझीलंड संघांना गट अ मध्ये उपांत्य फेरीत प्रवेश मिळेल. आता प्रश्न असा आहे की पाकिस्तान या सर्व प्रतिकूल परिस्थितीवर कसा मात करेल. पाकिस्तान २९ वर्षांनंतर ICC स्पर्धेचे आयोजन करत आहे आणि जर ते गट टप्प्यातूनच बाहेर पडले तर रिझवान आणि त्याच्या संघासाठी ते लाजिरवाणे ठरणार आहे.