Ravindra Jadeja Won Player Of the match
भारतीय क्रिकेट संघाचे सुपरस्टार खेळाडू सध्या रणजी ट्रॉफी २०२६-२७ मध्ये मैदानात उतरले आहेत. ही न्यूझीलंडविरुद्धच्या कसोटी मालिकेसाठीची तयारी मानली जात आहे. त्यामुळे टीम इंडियाच्या अनेक स्टार खेळाडूंवर निवड समितीची नजर असणार आहे. त्यातच आता भारताचा फिरकी अष्टपैलू रवींद्र जडेजा याने सौराष्ट्र आणि छत्तीसगड यांच्यातील सामन्यात फलंदाजी आणि गोलंदाजी दोन्हीमध्ये उत्कृष्ट कामगिरी केली. हा सामना अनिर्णित राहिला. मात्र, नंतर रवींद्र जडेजाला सामनावीर म्हणून गौरविण्यात आले.
सौराष्ट्र आणि छत्तीसगड यांच्यातील सामन्यात रवींद्र जडेजाने उत्कृष्ट कामगिरी केली. पहिल्या डावात त्याने २०९ चेंडूंमध्ये सात शानदार चौकारांसह १०२ धावा केल्या. त्याचा स्ट्राईक रेट ४८.८० होता. जडेजाने गोलंदाजीतही उत्कृष्ट कामगिरी केली. त्याने १७ षटकांत केवळ ४० धावा देत तीन विकेट्स घेतले. यामध्ये तीन मेडन षटकांचा समावेश होता. यावेळी त्याचा इकॉनॉमी रेट फक्त २.४० होता. अनुभवी फिरकी अष्टपैलू रवींद्र जडेजाला दुसऱ्या डावात खेळण्याची संधी मिळाली नाही. सामना अनिर्णित राहिल्यानंतर, जडेजाच्या फलंदाजी आणि गोलंदाजीतील प्रभावी कामगिरीमुळे त्याला सामनावीर म्हणून गौरवण्यात आले. न्यूझीलंडविरुद्धच्या कसोटी मालिकेत जडेजाची भूमिका महत्त्वपूर्ण असेल. त्यामुळे टीम इंडियासाठी ही दिलासादायक बातमी आहे.
छत्तीसगडने नाणेफेक जिंकून प्रथम गोलंदाजी करण्याचा निर्णय घेतला. सौराष्ट्रने ११०.४ षटकांत गमावून ३९२ धावा केल्या. जडेजा व्यतिरिक्त, प्रेरक मांकडनेही १२९ धावांची शानदार खेळी केली. सलामीवीर चिराग जानीनेही ८३ धावा केल्या. देव आदित्य सिंगनेही छत्तीसगडसाठी पाच विकेट्स घेतले. पहिल्या डावात छत्तीसगडने १२१.५ षटकांत ३१२ धावा केल्या.
या सामन्यात छत्तीसगडच्या एकाही फलंदाजाने शतक झळकावले नाही. कर्णधार अनुज तिवारी ७२ धावांवर दुखापतग्रस्त होऊन निवृत्त झाला. सौराष्ट्रकडून रवींद्र जडेजा, जयदेव उनाडकट, चेतन साकरिया आणि अनुज पनवार यांनीही प्रत्येकी दोन विकेट्स घेत चांगली गोलंदाजी केली. दुसऱ्या डावात सौराष्ट्रने एक विकेट गमावून २२९ धावा केल्या आणि सामना अनिर्णित राहिला. चिराग जानीनेही दुसऱ्या डावात १२७ धावांची नाबाद खेळी केली.
.png "Videos"){kind=small}
