मंगळवार, 11 ऑगस्ट 2026
सौरव गांगुली आणि पत्नी डोनाला धमकीची पत्रं (फोटो सौजन्य - सोशल मीडिया)
मिळालेल्या वृत्तानुसार, सौरव गांगुलीला गेल्या काही महिन्यांपासून आक्षेपार्ह टिप्पणी असलेली पत्रे मिळत आहेत. मात्र, सुरुवातीला या पत्रांकडे गांभीर्याने पाहिले गेले नाही. गांगुलींच्या सचिवांच्या म्हणण्यानुसार, सुरुवातीला असे मानले जात होते की, गांगुलींना नापसंत करणाऱ्या आणि आपला राग व्यक्त करणाऱ्या कोणाच्यातरी वैयक्तिक द्वेषातूनच हे घडले आहे. मात्र, सोमवारी जीवे मारण्याच्या स्पष्ट धमक्या असलेली दोन नवीन पत्रे आल्यानंतर या परिस्थितीकडे अत्यंत गांभीर्याने घेतले गेले आणि पोलिस ठाण्यात तक्रारही दाखल करण्यात आली आहे.
वाढत्या धोक्याची शक्यता लक्षात घेऊन सौरव गांगुलीच्या कार्यालयाने मंगळवारी दक्षिण कोलकाता येथील ठाकूरपुकुर पोलीस ठाण्यात लेखी तक्रार दाखल केली. तक्रारीत म्हटले आहे की, पत्रे पाठवणाऱ्याचे नाव अरुण असल्याचे निष्पन्न झाले आहे. प्राथमिक माहितीनुसार, ही पत्रे उत्तर २४ परगणा जिल्ह्यातील बेलघरिया भागातून कुरिअरमार्फत पाठवण्यात आल्याचा संशय आहे. मात्र अजूनही त्यावर शिक्कामोर्तब झालेले नाही
हे प्रकरण अत्यंत संवेदनशील मानून पोलिसांनी तात्काळ तपास सुरू केला आहे. पत्र नेमके कोठे पोहोचले याचा मागोवा घेण्यासाठी अधिकाऱ्यांचे एक विशेष पथक कुरिअर एजन्सीच्या नेटवर्कची तपासणी करत आहे. संशयिताशी संबंधित मोबाईल नंबर आणि सिम कार्डच्या ठिकाणाचाही शोध घेतला जात आहे. गेल्या काही महिन्यांत मिळालेली सर्व पत्रे एकाच व्यक्तीने पाठवली आहेत की यात एखाद्या टोळीचा सहभाग आहे, याचाही तपास अधिकारी करत आहेत.
आरोपीला लवकरात लवकर शोधून काढण्यासाठी सर्व तांत्रिक आणि क्षेत्रीय बाबींवर काम करत असल्याचे पोलिसांनी सांगितले. दुसरीकडे, या संपूर्ण घटनेवर आणि धमकीच्या पत्रांवर सौरव गांगुली किंवा त्यांच्या पत्नी डोना गांगुली यांनी अद्याप कोणतेही अधिकृत निवेदन जारी केलेले नाही.
काय फालतूगिरी! सोशल मिडियावर ‘दादा’ची बदनामी; Sourav Ganguly ने ‘त्या’ पेजविरुद्ध केली तक्रार
