शनिवार, 12 सप्टेंबर 2026
‘स्पोर्ट्सफिल्ड मान्सून लीग’ (फोटो- सोशल मिडिया)
पहिल्या सामन्यात आर्यष तिवारीच्या अचूक आणि भेदक गोलंदाजीच्या जोरावर स्पार्क स्पोर्टीव्ह क्रिकेट ॲकॅडमीने फॅन्टम क्रिकेट क्लबचा ४४ धावांनी पराभव केला. प्रथम फलंदाजी करताना स्पार्क स्पोर्टीव्ह क्रिकेट ॲकॅडमीने २५ षटकांत ९ गडी गमावून १४८ धावा केल्या. आरव पांडेने ४५ धावा, तर हित कारीयाने ३७ धावांची उपयुक्त खेळी करत संघाच्या डावाला आकार दिला.
फॅन्टम क्रिकेट क्लबकडून असिम मुजावरने प्रभावी गोलंदाजी करत २२ धावांत ४ गडी बाद केले. मात्र, लक्ष्याचा पाठलाग करताना फॅन्टमचा डाव २३.१ षटकांत १०४ धावांवर आटोपला. असिम मुजावरने ४६ धावांची झुंजार खेळी करत एकहाती लढा दिला. त्याला जयेश वर्माने २५ धावांची साथ दिली. स्पार्ककडून आर्यष तिवारीने भेदक गोलंदाजी करत २ षटके निर्धाव टाकली. त्याने अवघ्या ७ धावांत ४ गडी बाद केले. हित कारीयाने ३ गडी बाद करत संघाच्या विजयावर शिक्कामोर्तब केले. या कामगिरीसाठी आर्यष तिवारीची सामनावीर म्हणून निवड करण्यात आली.
दुसऱ्या सामन्यात भुजंग धुलगूंडेने केलेल्या आक्रमक फलंदाजीच्या जोरावर अवधुत विभुते क्रिकेट ॲकॅडमीने मिलेनीयम नॅशनल स्कूलचा ४ गडी राखून पराभव केला. प्रथम फलंदाजी करताना मिलेनीयम नॅशनल स्कूलने ३० षटकांत ७ गडी बाद १५१ धावा केल्या. आर्यन एस. याने अर्धशतकी खेळी करत ५० धावा फटकावल्या. त्याच्या खेळीत ८ चौकारांचा समावेश होता. रूद्र देशपांडेने १८ धावा केल्या.अवधुत विभुते क्रिकेट ॲकॅडमीकडून सार्थ बदाडेने २ गडी, तर यज्ञेश मोहितेने १ गडी बाद केला.
विजयासाठी मिळालेले १५२ धावांचे लक्ष्य अवधुत विभुते ॲकॅडमीने अवघ्या १९.१ षटकांत ६ गडी गमावून पूर्ण केले. भुजंग धुलगूंडेने आक्रमक फलंदाजी करत २९ चेंडूंत ६५ धावा फटकावल्या. त्याच्या खेळीत तब्बल १० चौकार आणि ३ षटकारांचा समावेश होता. मेधांश अगरवालने ३१ धावांची, तर यज्ञेश मोहितेने नाबाद १७ धावांची खेळी करत संघाला सहज विजय मिळवून दिला. मिलेनीयम नॅशनल स्कूलकडून शार्व दळवी आणि कैवल्य खोंडे यांनी प्रत्येकी २ गडी बाद केले. भुजंग धुलगूंडेची सामनावीर म्हणून निवड करण्यात आली.
