हवेत विमान उलटं झालं तरी चेहऱ्यावर हास्य! 10 हजार फुटांवर विमानाच्या पंखावर Sydney Sweeney चा थरारक स्टंट
Viral Video : हॉलिवूड अभिनेत्री सिडनी स्वीनीने आपल्या अभिनयासोबतच आता धाडसी अंदाजाने चाहत्यांचे लक्ष वेधून घेतले आहे. हजारो फूट उंचीवर उडणाऱ्या विमानाच्या पंखावर उभे राहून तिने ‘विंगवॉकिंग’ स्टंट केला. या स्टंटचा व्हिडिओ सोशल मीडियावर शेअर करण्यात आल्यानंतर तो चर्चेचा विषय ठरला आहे. विशेष म्हणजे व्हिडिओ शेअर करताना सिडनीने हॉलिवूडमधील धाडसी स्टंटसाठी प्रसिद्ध असलेल्या टॉम क्रूजचाही उल्लेख केला.
व्हिडिओमध्ये सिडनी एका बायप्लेनच्या वरच्या पंखावर असल्याचे दिसते. सुरक्षेसाठी तिला सेफ्टी हार्नेसच्या सहाय्याने विमानाला बांधण्यात आले आहे. उंची आणि हवेचा प्रचंड वेग असतानाही तिच्या चेहऱ्यावर भीतीपेक्षा उत्साह दिसून येतो. तिने या संपूर्ण अनुभवाचे दृश्य 360-डिग्री कॅमेऱ्याच्या माध्यमातून टिपले आहे. त्यामुळे विमानाच्या पंखावरून दिसणारा परिसर आणि स्टंटचा थरार व्हिडिओमध्ये पाहायला मिळतो.
स्टंटचा सर्वाधिक थरारक क्षण विमान हवेत उलटे झाल्यानंतर पाहायला मिळतो. सिडनी विमानाच्या पंखावर सेफ्टी हार्नेसने बांधलेली असतानाच बायप्लेन हवेत फिरते. या क्षणीही सिडनी शांत आणि हसतमुख दिसते. विमानाची हालचाल सुरू असतानाही ती कॅमेऱ्याकडे पाहताना आणि आजूबाजूचा नजारा अनुभवताना दिसते.
सिडनीने हा व्हिडिओ आपल्या अधिकृत Instagram अकाउंटवर शेअर करताना ‘Watch Out Tom Cruise’ असे लिहिले. तिच्या या मजेशीर प्रतिक्रियेमुळे व्हिडिओची आणखी चर्चा झाली. टॉम क्रूज हा स्वतः अनेक धोकादायक स्टंट करण्यासाठी प्रसिद्ध आहे. विशेषतः ‘Mission: Impossible’ चित्रपट मालिकेतील त्याचे विमान आणि हवेत केलेले अनेक स्टंट जगभरात चर्चेत आले आहेत. त्यामुळे सिडनीची ही प्रतिक्रिया टॉम क्रूजच्या स्टंट्सकडे केलेला मजेशीर इशारा मानली जात आहे.
सिडनीचा विंगवॉकिंग स्टंट पाहून सोशल मीडिया युजर्स आश्चर्य व्यक्त करत आहेत. अनेक चाहत्यांनी तिच्या धाडसाचे कौतुक केले असून तिला भविष्यात एखाद्या मोठ्या ॲक्शन चित्रपटात पाहण्याची इच्छाही व्यक्त केली आहे. काही चाहत्यांनी तर सिडनीला आगामी ॲक्शन किंवा ‘Mission: Impossible’सारख्या चित्रपटात संधी मिळायला हवी, अशा प्रतिक्रियाही दिल्या आहेत.
‘विंगवॉकिंग’ हा विमानाशी संबंधित अत्यंत जोखमीचा एरियल स्टंट आहे. यामध्ये व्यक्ती विशेष सुरक्षा उपकरणांच्या सहाय्याने विमानाच्या पंखावर निश्चित केलेल्या जागी राहते. विमान हवेत असताना विविध हालचाली करत असल्यामुळे या स्टंटसाठी प्रशिक्षित पायलट, सुरक्षा उपकरणे आणि तज्ज्ञांची देखरेख अत्यंत महत्त्वाची असते.
सिडनी स्वीनीच्या या स्टंटने तिच्या चाहत्यांना तिचा वेगळाच धाडसी अंदाज पाहायला मिळाला आहे. त्यात ‘Watch Out Tom Cruise’ या कॅप्शनने आणखी रंग भरल्याने तिचा व्हिडिओ सोशल मीडियावर चर्चेचा विषय बनला आहे.
.png "Videos"){kind=small}
