Airbus H130 crash : इंडोनेशियामध्ये मोठा विमान अपघात! बोर्नियोच्या जंगलात हेलिकॉप्टर कोसळले; 8 जणांचा मृत्यू, पाहा VIDEO

Indonesia बोर्नियो बेटावर झालेल्या एका भीषण हेलिकॉप्टर अपघातात त्यातील सर्व आठ जणांचा मृत्यू झाला आहे. एअरबस एच१३० हे हेलिकॉप्टर उड्डाणानंतर अवघ्या पाच मिनिटांतच कोसळले.

• भीषण दुर्घटना
• ५ मिनिटांत संपर्क तुटला
• सुरक्षेचा प्रश्न

Indonesia helicopter crash Borneo 2026 : इंडोनेशियाच्या (Indonesia) बोर्नियो बेटावरून एक अत्यंत दुःखद आणि धक्कादायक बातमी समोर आली आहे. पश्चिम कालीमंतन प्रांतात एका खाजगी कंपनीचे हेलिकॉप्टर कोसळून भीषण अपघात झाला असून, यामध्ये हेलिकॉप्टरमधील सर्व ८ जणांना आपले प्राण गमवावे लागले आहेत. या दुर्घटनेने केवळ इंडोनेशियाच नव्हे, तर संपूर्ण जगाचे लक्ष वेधून घेतले आहे. शुक्रवारी सकाळी बचाव पथकाने घनदाट जंगलातून मृतांचे अवशेष बाहेर काढले, तेव्हा या अपघाताची भीषणता स्पष्ट झाली.

नेमकी घटना काय?

मिळालेल्या माहितीनुसार, ‘पीटी मॅथ्यू एअर नुसंतारा’ या कंपनीचे ‘एअरबस H130’ मॉडेलचे हेलिकॉप्टर गुरुवारी मेलावी जिल्ह्यातून पाम तेलाच्या मळ्याकडे जाण्यासाठी निघाले होते. या हेलिकॉप्टरमध्ये ६ प्रवासी आणि २ कर्मचारी असे एकूण ८ जण स्वार होते. मात्र, उड्डाण केल्यानंतर अवघ्या पाच मिनिटांतच हेलिकॉप्टरचा रडारशी असलेला संपर्क तुटला. वैमानिकाकडून कोणताही संकटाचा इशारा (Distress Signal) मिळण्यापूर्वीच हेलिकॉप्टर गायब झाल्याने यंत्रणेची धावपळ उडाली.

जागतिक घडामोडी संबंधित बातम्या वाचण्यासाठी येथे क्लिक करा : Lebanon Ceasefire : ट्रम्प निमित्त मात्र, किंगमेकर सलमान! सौदीच्या एका फोनने इस्रायलची बंदूक म्यान; लेबनॉनमध्ये शांतता

घनदाट जंगलात शोधकार्य आणि मदतकार्य

हवाई वाहतूक नियंत्रणाने तात्काळ शोध मोहीम राबवण्याचे आदेश दिले. नॅशनल सर्च अँड रेस्क्यू एजन्सी आणि परिवहन मंत्रालयाने अनेक पथके तैनात केली. बोर्नियोचे जंगल हे जगातील सर्वात घनदाट जंगलांपैकी एक मानले जाते, त्यामुळे शोधकार्यात अनेक अडथळे येत होते. अखेर सेकाडाऊ जिल्ह्यातील दुर्गम भागात हेलिकॉप्टरचा चक्काचूर झालेला ढिगारा सापडला. दुर्दैवाने, या ढिगाऱ्यात एकाही व्यक्तीचा जीव वाचू शकला नाही. मृतांमध्ये एका मलेशियन नागरिकाचाही समावेश असल्याची माहिती समोर आली आहे.

See more

All eight people on board a helicopter were killed after it crashed in a remote region of Indonesia’s West Kalimantan province, authorities confirmed on Friday. The aircraft, identified as an Airbus H130, went down in Sekadau regency after losing contact with air traffic control… pic.twitter.com/AiLEDGfE6u — News.Az (@news_az) April 17, 2026

credit – social media and Twitter

अपघाताचे कारण अद्याप गुलदस्त्यात

इंडोनेशिया सरकारने या प्रकरणाच्या सखोल चौकशीचे आदेश दिले आहेत. तांत्रिक बिघाडामुळे इंजिन निकामी झाले की खराब हवामानामुळे हेलिकॉप्टर कोसळले, याचा तपास सध्या सुरू आहे. तज्ज्ञांच्या मते, बोर्नियोसारख्या भागात हवामान क्षणात बदलते आणि डोंगराळ भागामुळे कमी उंचीवर उडणाऱ्या हेलिकॉप्टरला अनेकदा धोका निर्माण होतो. एअरबस H130 हे आधुनिक हेलिकॉप्टर मानले जात असतानाही ही दुर्घटना घडल्याने आश्चर्य व्यक्त केले जात आहे.

जागतिक घडामोडी संबंधित बातम्या वाचण्यासाठी येथे क्लिक करा : Uranium Crisis: ट्रम्पचा ‘युरेनियम दावा’ अवास्तव कल्पना; इराणने पुन्हा उघडपणे उडवली अमेरिकेची खिल्ली, कराराचेही केले खंडन

इंडोनेशिया: अपघातांचे केंद्र बनतोय का?

सुमारे २७ कोटी लोकसंख्या असलेला हा देश १७ हजारांहून अधिक बेटांचा समूह आहे. त्यामुळे हवाई वाहतूक ही येथील जीवनवाहिनी आहे. मात्र, गेल्या काही वर्षांतील आकडेवारी पाहिली तर इंडोनेशियात विमान आणि सागरी अपघातांचे प्रमाण चिंताजनक आहे. पायाभूत सुविधांची दुरवस्था, जुनाट यंत्रणा आणि कमकुवत देखरेख यामुळे हजारो प्रवाशांचे प्राण धोक्यात येत आहेत. या ताज्या अपघातामुळे सरकारवर सुरक्षा मानके अधिक कडक करण्यासाठी दबाव वाढला आहे.