गुरुवार, 17 सप्टेंबर 2026
Boeing 737 : हवेत थरार! इराणमध्ये बोईंग विमान प्रचंड हादरले, केबिनमध्ये किंकाळ्या आणि आक्रोश; घटनेचा VIDEO VIRAL ( फोटो सौजन्य : सोशल मीडिया )
इराणमध्ये (प्रवासी विमानाचा एक अत्यंत भयानक आणि अंगावर काटा आणणारा प्रकार समोर आला आहे. ईशान्य इराणमधील मशहद शहरातून केरमानशाहकडे जाण्यासाठी उड्डाण भरलेल्या सेपहरान एअरलाइन्सच्या बोईंग ७३७ (Boeing 737) विमानाचा हवेत अचानक मोठा अपघात टळला. उड्डाण घेतल्यानंतर काही मिनिटांतच विमानातील एका चाकाचे टायर निखळले. या तांत्रिक बिघाडामुळे विमानाचे इंजिन निकामी झाले आणि संपूर्ण विमान हवेत तीव्र गतीने हादरू लागले.
हवेत अचानक निर्माण झालेल्या या जोरदार कंपनांमुळे विमानाच्या केबिनच्या आतील भागाची मोठी मोडतोड झाली. डोक्यावरील सामानाचे कप्पे (overnead luggage bins) आपोआप उघडले आणि त्यातील भारी सामान, बॅगा थेट खाली बसलेल्या प्रवाशांच्या अंगावर व कॉरिडॉरमध्ये कोसळू लागल्या. वरून पडणाऱ्या वस्तूंमुळे काही प्रवाशांना किरकोळ दुखापती झाल्याचे वृत्त आहे. या अत्यंत बिकट आणि भीतिदायक प्रसंगी प्रवाशांना जणू प्रत्यक्ष मृत्यूच समोर दिसत होता.
जागतिक घडामोडी संबंधित बातम्या वाचण्यासाठी येथे क्लिक करा : Nepal Flood : देशाच्या पुनर्बांधणीसाठी नेपाळचे अर्थमंत्री स्वर्णिम वागळे भारताच्या दौऱ्यावर; 1399 मृत्यू, कोट्यवधींचे नुकसान
सोशल मीडियावर सध्या या थरारक घटनेचा व्हिडिओ तुफान व्हायरल होत आहे. या व्हिडिओमध्ये विमानातील प्रवासी अत्यंत घाबरलेल्या अवस्थेत दिसत असून, काही जण देवाचा धावा करताना तर काही जण भीतीने किंचाळताना ऐकू येत आहेत. विमान इतक्या वेगाने हादरत होते की प्रवाशांचे स्वतःवरील नियंत्रण सुटले होते. विमानातील कर्मचाऱ्यांनी परिस्थिती हाताळण्याचा प्रयत्न केला, परंतु हवेतील प्रचंड भूकंपसदृश धक्का पाहून सर्वांचीच घाबरगुंडी उडाली होती.
विमानाच्या चाकाचे टायर फुटल्याचे व इंजिनमध्ये समस्या निर्माण झाल्याचे लक्षात येताच वैमानिकाने त्वरित मशहद विमानतळावरील हवाई वाहतूक नियंत्रण कक्षाशी (ATC) संपर्क साधला. प्रवाशांना विमानातील तांत्रिक बिघाडाची कल्पना देण्यात आली आणि वैमानिकाने उड्डाण पुढे न नेता तात्काळ मशहद विमानतळावर परतण्याचा धाडसी निर्णय घेतला.
जागतिक घडामोडी संबंधित बातम्या वाचण्यासाठी येथे क्लिक करा : Russia Ukraine War : युक्रेनमध्ये रशियाचा धुमाकूळ सुरूच, FPV ड्रोनने प्रवासी बसवर केला हल्ला; दुर्दैवाने 5 जणांचा मृत्यू
वैमानिकाच्या प्रसंगावधानामुळे आणि तांत्रिक कौशल्यामुळे बोईंग ७३७ विमान मशहद विमानतळावर सुखरूप उतरवण्यात यश आले. विमानतळावर आधीच रुग्णवाहिका आणि आपत्कालीन यंत्रणा सज्ज ठेवण्यात आल्या होत्या. प्राथमिक माहितीनुसार, या घटनेत कोणतीही जीवितहानी झाली नसून सर्व प्रवासी आणि विमान कर्मचारी सुरक्षित आहेत. मात्र, सामान अंगावर पडल्यामुळे आणि घाबरल्यामुळे काही प्रवाशांना वैद्यकीय मदत द्यावी लागली.
नागरी उड्डाण प्राधिकरणाच्या अधिकाऱ्यांनी अद्याप या दुर्घटनेच्या नेमक्या कारणाबाबत अधिकृत माहिती दिलेली नाही. परंतु, चाकातील टायर निखळल्यामुळे इंजिन बंद पडले की इंजिनच्या बिघाडामुळे टायरवर अतिरिक्त ताण आला, याचा शोध घेण्यासाठी तज्ज्ञांचे पथक विमानाची कसून पाहणी करत आहे. विशेष म्हणजे, मशहद विमानतळावरून उड्डाण करणाऱ्या सेपहरान एअरलाइन्सच्या विमानाबाबत घडलेली ही मागील काही दिवसांतील दुसरी आपत्कालीन घटना असल्याने हवाई सुरक्षेचा प्रश्न गंभीर बनला आहे.
