शुक्रवार, 13 नोव्हेंबर 2026
फोटो सौजन्य सोशल मीडिया
अमेरिकेच्या CENTCOM नुसार, इराणच्या इस्लामिक रिव्होल्यूशनरी गार्ड कॉर्प्सने (IRGC) बहरीनच्या दिशेने दोन एकमार्गी हल्लेखोर ड्रोन पाठवले होते. मात्र, अमेरिकन सैन्याने लक्ष्यापर्यंत पोहोचण्यापूर्वीच दोन्ही ड्रोन पाडले. या कारवाईत कोणत्याही अमेरिकी सैनिकाला दुखापत झाली नाही किंवा लष्करी मालमत्तेचे नुकसान झाले नाही, असे अमेरिकेने सांगितले. ड्रोन कोणत्या ठिकाणाहून उडवण्यात आले होते आणि त्यांचे नेमके लक्ष्य काय होते, याबाबत अधिक तपशील समोर आलेला नाही. मात्र, बहरीनच्या दिशेने झालेल्या या हालचालीकडे अमेरिकेने संभाव्य सुरक्षाधोका म्हणून पाहिले आहे.
या घटनेच्या पार्श्वभूमीवर इराणच्या रिव्होल्यूशनरी गार्डने बहरीनमधील अमेरिकेच्या अर्ली-वॉर्निंग रडार यंत्रणेवर हल्ला करून ती नष्ट केल्याचा दावा केला होता. दक्षिण इराणमधील सिरिक परिसरातील दूरसंचार टॉवरवर अमेरिकेने हल्ला केल्याच्या प्रत्युत्तरात ही कारवाई केल्याचे इराणने म्हटले. मात्र, अमेरिकेच्या CENTCOM ने बहरीनमधील रडार यंत्रणेवर हल्ला झाल्याचा दावा फेटाळला आहे. त्यामुळे या दाव्यांबाबत दोन्ही देशांच्या भूमिकांमध्ये स्पष्ट विरोधाभास दिसत आहे.
World News : युक्रेनला ड्रोन पुरवणाऱ्या जर्मन कंपनीवर सायबर हल्ला; जर्मन सैन्याने ड्रोन वापर थांबवला
बहरीनमध्ये अमेरिकेच्या नौदलाच्या पाचव्या ताफ्याचे मुख्यालय आहे. आखाती प्रदेशातील समुद्री मार्गांची सुरक्षा, लष्करी हालचाली आणि होर्मुझ सामुद्रधुनीतील परिस्थितीवर लक्ष ठेवण्यासाठी हे केंद्र महत्त्वाचे मानले जाते. त्यामुळे बहरीनच्या दिशेने होणाऱ्या ड्रोन हालचालींना विशेष सामरिक महत्त्व प्राप्त झाले आहे.
अमेरिका आणि इराण यांच्यातील संघर्षामुळे आखाती देशांमधील सुरक्षाव्यवस्था अधिक सतर्क झाली आहे. ड्रोन हल्ले, लष्करी तळांवरील संभाव्य धोके आणि समुद्री मार्गांवरील तणाव यामुळे या भागातील परिस्थिती संवेदनशील बनली आहे. आगामी काळात दोन्ही देशांकडून कोणती भूमिका घेतली जाते, याकडे आंतरराष्ट्रीय समुदायाचे लक्ष लागले आहे.
