
फोटो सौजन्य सोशल मीडिया
सोसा यांचा जन्म नायजेरियात झाला असून त्यांचे बालपण ब्रिटनमध्ये गेले . लहान वयातच त्यांची आई त्यांच्यापासून दूर झाली . त्यानंतर आईशी संपर्क तुटल्याने तिच्याबाबतची माहिती मिळवणे कठीण झाले आहे . ज्यांची आई युरोपमध्ये जाण्याचा प्रयत्नात असताना बेपत्ता झाली असल्याचे समोर आले आहे .
त्यामुळे तिच्यासोबत नेमके काय घडले , ती गेली कुठे आणि तिचे पुढे काय झाले , असे अनेक प्रश्न आजही विना उत्तराचे राहिले आहेत .आता नायजेरियात परतल्यानंतर ते आईकडील नातेवाईकांची भेट घेऊन जुन्या आठवणी आणि उपलब्ध माहितीच्या आधारे तिचा मागोवा घेण्याचा प्रयत्न करत आहे .
सोसा यांचा स्वतःचा प्रवासही संघर्षांनी भरलेला आहे . ब्रिटनमध्ये बालपणी त्यांना अत्याचार , टोळ्यांकडून होणारे शोषण आणि हिंसाचाराचा सामना करावा लागला आहे . किशोरवयात ते गुन्हेगारी टोळ्यांच्या संपर्कात आले आणि त्यांना तुरुंगात ही जावे लागले . पुढे त्यांची मानवी तस्करी आणि शोषणाचे बळी म्हणून ओळख पटली .
या कटू अनुभवातून बाहेर पडत त्यांनी आपले आयुष्य बदलले . आज ते मानवी तस्करी आणि बालशोषणविरोधात जनजागृती करणारे कार्यकर्ते म्हणून काम करतात . शोषणाला बळी पडलेल्या मुलांच्या संरक्षणासाठी ते आता आवाज उठवत आहेत .
सोसा यांच्या या प्रवासावर Where Roots Lie; Surviving Child Grooming and Exploitation हा माहितीपट तयार करण्यात आला आहे . दिग्दर्शक समीर मोदी यांनी या माहितीपटातून सोसा यांचा आईच्या शोधाचा प्रवास मांडला आहे . हा केवळ एका मुलाने आपल्या आईचा शोध घेण्याचा प्रयत्न नाही तर मानवी तस्करी , बालशोषण , स्थलांतर आणि स्वतःच्या मुळांचा शोध घेणारी कहाणी आहे .
आईचा शोध घेताना सोसा यांना आपल्या कुटुंबाशी पुन्हा जोडले जाण्याची आशा आहे . मात्र त्यांच्या आईबाबत नेमकी माहिती मिळाली आहे कि नाही , याचा खुलासा उपलब्ध माहितीमध्ये झालेला नाही . त्यामुळे त्यांच्या शोधाचा पुढील प्रवास महत्वाचा ठरणार आहे .