गुरुवार, 12 नोव्हेंबर 2026
विमा वितरणाला डिजिटल बळ! झुरिच कोटक जनरल इन्शुरन्स आणि फटकसिक्युअरमध्ये महत्त्वपूर्ण करार
या सहकार्यामुळे विमा उत्पादने खरेदी करण्याची प्रक्रिया अधिक सुलभ आणि सोयीस्कर करण्याचा दोन्ही कंपन्यांचा प्रयत्न आहे. फटकसिक्युअर आपल्या डिजिटल प्लॅटफॉर्म आणि ग्राहकांपर्यंत पोहोचण्याच्या क्षमतेचा वापर करेल, तर झुरिच कोटक जनरल इन्शुरन्स विमा उत्पादनांमधील नावीन्य आणि अंडररायटिंगमधील कौशल्य उपलब्ध करून देईल.
या भागीदारीअंतर्गत फटकसिक्युअर आपल्या डिजिटल प्लॅटफॉर्मवरून झुरिच कोटक जनरल इन्शुरन्सची ॲफिनिटी आणि मोटर विमा उत्पादने वितरित करेल. यासाठी फटकसिक्युअर कॉर्पोरेट एजंट म्हणून काम पाहणार आहे. तसेच ग्राहकांच्या गरजा लक्षात घेऊन विमा उपाययोजना विकसित करण्यासाठी दोन्ही कंपन्या एकत्रितपणे काम करतील.
याशिवाय किरकोळ (Retail) आणि एम्बेडेड (Embedded) विमा क्षेत्रात विस्तार करण्याच्या संधीही शोधल्या जाणार आहेत. डिजिटल माध्यमातून अधिकाधिक ग्राहकांपर्यंत पोहोचण्यासाठी दोन्ही कंपन्या परस्पर पूरक व्यावसायिक संधींचा शोध घेतील.
या भागीदारीबाबत बोलताना फटकसिक्युअरचे मुख्य कार्यकारी अधिकारी विकास चौधरी म्हणाले की, अखंड डिजिटल अनुभवाच्या माध्यमातून आर्थिक सुरक्षा उपाययोजना अधिक सुलभ करणे हे कंपनीचे उद्दिष्ट आहे. झुरिच कोटक जनरल इन्शुरन्ससोबतची भागीदारी विमा उत्पादनांची उपलब्धता वाढवण्याच्या दृष्टीने महत्त्वाचा टप्पा आहे. ग्राहकांच्या बदलत्या गरजा पूर्ण करणाऱ्या आणि दीर्घकालीन मूल्य निर्माण करणाऱ्या उपाययोजना विकसित करण्यावर भर दिला जाणार आहे.
झुरिच कोटक जनरल इन्शुरन्सचे मुख्य व्यवसाय अधिकारी वीरेंद्र मोहंती यांनीही या भागीदारीचे स्वागत केले. ग्राहकांच्या दैनंदिन जीवनातील व्यवहार आणि डिजिटल सहभागाच्या माध्यमातून विमा सुरक्षा उपलब्ध करून देण्याचा कंपनीचा प्रयत्न असल्याचे त्यांनी सांगितले. झुरिच कोटकचे जोखीम व्यवस्थापनातील कौशल्य आणि उत्पादनांमधील नावीन्य फटकसिक्युअरच्या डिजिटल प्लॅटफॉर्मसोबत जोडल्याने ग्राहकांना अधिक चांगल्या विमा उपाययोजना देता येतील, असा विश्वास त्यांनी व्यक्त केला.
२०४७ पर्यंत ‘सर्वांसाठी विमा’ (Insurance for All) हे व्यापक उद्दिष्ट साध्य करण्यासाठी डिजिटल वितरण व्यवस्था महत्त्वाची ठरणार आहे. या पार्श्वभूमीवर झुरिच कोटक जनरल इन्शुरन्स आणि फटकसिक्युअर यांच्यातील भागीदारीकडे विमा सेवा अधिकाधिक लोकांपर्यंत पोहोचवण्याच्या दिशेने उचललेले पाऊल म्हणून पाहिले जात आहे.
