मंगळवार, 3 नोव्हेंबर 2026
रश्मिका मंदानाच्या 'मैसा' चित्रपटातील पहिलं धमाकेदार गाणं रिलीज ( सौजन्य - सोशल मीडिया )
चित्रपटाच्या नुकत्याच प्रदर्शित झालेल्या टीझरला देशभरातून जबरदस्त प्रतिसाद मिळाला आहे. प्रेक्षकांपासून समीक्षकांपर्यंत सर्वांनीच चित्रपटातील रॉ एनर्जी, भव्य दृश्यरचना आणि उत्कंठावर्धक वातावरणाचे कौतुक केले आहे. विशेष म्हणजे, या सर्व गोष्टींमुळे ‘मैसा’ने एका वेगळ्या आणि अनोख्या सिनेमॅटिक अनुभवाची झलक दाखवली आहे. भारतीय चित्रपटसृष्टीतील अनेक भव्य ॲक्शनपटांमध्ये ‘बाहुबली’ आणि ‘KGF’ यांसारख्या चित्रपटांतून आई-मुलाच्या नात्याचे प्रभावी चित्रण पाहायला मिळाले आहे. मात्र, ‘मैसा’ या पारंपरिक चौकटीपलीकडे जात एक वेगळा आणि भावनिक पैलू सादर करणार आहे. आदिवासी प्रदेशाच्या पार्श्वभूमीवर बाप-लेकीच्या नात्यातील घट्ट बंध या चित्रपटातून उलगडणार आहेत.
गाण्याचा टीझर प्रदर्शित झाल्यानंतर सर्वत्र उत्सुकतेचे वातावरण निर्माण झाले होते. प्रेक्षकांची वाढती उत्सुकता लक्षात घेऊन निर्मात्यांनी आता चित्रपटातील बहुप्रतीक्षित ‘ओ मैसा रे’ हे गाणे प्रदर्शित केले आहे. घोषणेनुसार, निर्मात्यांनी एक अत्यंत दमदार आणि जोशपूर्ण गाणे प्रेक्षकांच्या भेटीला आणले आहे. हे गाणे उत्साह आणि रोमांचाची पातळी आणखी उंचावणारे आहे.
या गाण्यात रश्मिका मंदाना निर्भय आणि अत्यंत आक्रमक अंदाजात दिसत असून, तिची उच्च ऊर्जा असलेली तांडवशैलीतील दमदार प्रस्तुती लक्ष वेधून घेते. तिच्या अभिनयातील रांगडेपणा, तीव्र हावभाव आणि प्रभावी नृत्यदिग्दर्शनामुळे हे गाणे एका वेगळ्याच उंचीवर पोहोचले आहे. आदिवासी संस्कृतीची पार्श्वभूमी या गाण्याला एक वेगळी ओळख देते. रश्मिकाचा हा अवतार पाहिल्यानंतर अशा दमदार आणि वेगळ्या धाटणीच्या चित्रपटाचे नेतृत्व करण्यासाठी ती योग्य निवड का आहे, हे स्पष्ट होते.
या गाण्याला जेक्स बिजॉय यांनी संगीतबद्ध केले आहे. त्यांच्या पार्श्वसंगीताची आधीपासूनच चर्चा होत आहे. चित्रपटाच्या मातीशी जोडलेल्या कथेला आणि अस्सल देशी बाजाला हे गाणे प्रभावीपणे अधोरेखित करते. दमदार ठेक्यांसोबत आदिवासी संगीताचा केलेला सुरेख मेळ या गाण्याला एक वेगळी ऊर्जा देतो. गाणे संपल्यानंतरही त्याचे सूर आणि ठेका मनात रेंगाळत राहतात.
अनफॉर्मुला फिल्म्सच्या बॅनरखाली निर्मित आणि रवींद्र पुल्ले यांच्या दिग्दर्शनाखाली साकारलेला ‘मैसा’ हा एक भावनिक ॲक्शन थ्रिलर चित्रपट आहे. आदिवासी प्रदेशाच्या पार्श्वभूमीवर बेतलेल्या या चित्रपटात भव्य दृश्ये, उत्कंठावर्धक कथा आणि रश्मिका मंदानाची प्रभावी भूमिका पाहायला मिळणार आहे. ‘मैसा’ हा चित्रपट २७ नोव्हेंबर २०२६ रोजी चित्रपटगृहांमध्ये प्रदर्शित होणार आहे.
