शनिवार, 22 ऑगस्ट 2026
संग्रहित फोटो
नांदेड : राज्यासह देशभरात गुन्हेगारी वाढली असून, वाढत्या गुन्हेगारीमुळे नागरिकांमध्ये भिती निर्माण होत आहे. अशातच आता एक मोठी बातमी समोर आली आहे. लातूर जिल्ह्यात दाखल झालेल्या बलात्काराच्या गुन्ह्याचा राग मनात धरून तरुणाने साथीदारांच्या मदतीने तरुणीच्या वडिलांचा खून केल्याची गंभीर घटना मुखेड तालुक्यातील लादगा शिवारात घडली आहे. या प्रकरणातील पसार झालेल्या तीन प्रमुख आरोपींना स्थानिक गुन्हे शाखा, नांदेड आणि मुखेड पोलिसांच्या पथकाने अवघ्या पाच तासांत ताब्यात घेतले आहे.
दापका राजा येथील किशन राजकुमार जोगदंड (वय २२) याच्याविरुद्ध काही दिवसांपूर्वी लातूर जिल्ह्यात बलात्काराचा गुन्हा दाखल झाला होता. या प्रकरणाचा राग मनात धरून किशन जोगदंड याने आपल्या दोन साथीदारांसह संगनमत केले. त्यानंतर २० ऑगस्ट रोजी रात्री सुमारे ११ वाजता लादगा शिवारातील शेतात फिर्यादीचे वडील बाबूपुंडलिक गायकवाड (वय ६०) यांच्यावर हल्ला करून त्यांचा जागीच खून केल्याचे पोलिसांनी सांगितले. हल्ल्यावेळी आरोपींनी फिर्यादीच्या आईच्या तोंडावर चाकूने वार करून तिलाही गंभीर जखमी केले. या घटनेप्रकरणी मुखेड पोलिस ठाण्यात गुन्हा क्रमांक २८८/२०२६ अन्वये भारतीय न्याय संहितेतील कलम १०३ (१), १०९(१), ३५१ तसेच अनुसूचित जाती-जमाती अत्याचार प्रतिबंधक कायद्यानुसार गुन्हा दाखल करण्यात आला.
हे सुद्धा वाचा : नाशिकमध्ये तरुणाची गळफास घेऊन आत्महत्या; धक्कादायक कारणही समोर
शोध मोहीमेला यश
घटना गंभीर असल्याने पोलिस अधीक्षक डॉ. निलाभ रोहन यांनी आरोपींना तातडीने अटक करण्याचे निर्देश दिले. अपर पोलिस अधीक्षक सुरज गुरव, उपविभागीय पोलिस अधिकारी शाम पानेगावकर व वैभव पडवळ यांच्या मार्गदर्शनाखाली स्थानिक गुन्हे शाखा आणि मुखेड पोलिसांनी तांत्रिक माहितीच्या आधारे आरोपींचा शोध सुरू केला. विविध ठिकाणी शोधमोहीम राबवून अवघ्या पाच तासांत किशन जोगदंड, सोहम सुंदरसिंह बयास ऊर्फ सोन्या (वय १९, मुखेड) आणि मंगेश निवृत्ती लिंगे (वय ५०, मुखेड) यांना ताब्यात घेण्यात आले. पुढील कायदेशीर कारवाई मुखेड पोलिस करीत आहेत.
