मुलाकडून आईला कड्याने मारहाण; ओठाला पडले ८ टाके; गोकुळनगर परिसरातील धक्कादायक प्रकार

मुलाने कोणतेही कारण नसताना जन्मदात्या आईला बेदम मारहाण केल्याचा संतापजनक प्रकार समोर आला आहे. हातातील गोल कड्याने तोंडावर प्रहार केल्याने संबंधित ज्येष्ठ महिला गंभीर जखमी झाली आहे.

• मुलाकडून आईला कड्याने मारहाण
• ओठाला पडले ८ टाके
• गोकुळनगर परिसरातील धक्कादायक प्रकार

पुणे : राज्यासह देशभरात दररोज मारहाण, खून, खुनाचा प्रयत्न यासारख्या घटना घडत आहेत. अशातच आता पुण्यातून एक मोठी बातमी समोर आली आहे. वडिलांकडून मुलाचा खून अन् मुलाकडून आईचा खून झाल्याच्या दोन वेगवेगळ्या घटना पुणे शहरात ताज्या असतानाच, मुलाने कोणतेही कारण नसताना जन्मदात्या आईला बेदम मारहाण केल्याचा संतापजनक प्रकार समोर आला आहे. हातातील गोल कड्याने तोंडावर प्रहार केल्याने संबंधित ज्येष्ठ महिला गंभीर जखमी झाली असून त्यांच्या ओठाला तब्बल ८ टाके पडले आहेत.

याप्रकरणी आशा राजेंद्र सरोदे (वय ६०, रा. गोकुळनगर) यांनी येवलेवाडी पोलिस ठाण्यात फिर्याद दिली आहे. त्यावरून पोलिसांनी त्यांचा मुलगा राहुल राजेंद्र सरोदे (वय ३३, रा. गोकुळनगर) याच्याविरुद्ध गुन्हा दाखल केला आहे. ही घटना २९ ऑगस्ट रोजी रात्री ८:३० वाजण्याच्या सुमारास गोकुळनगर येथील राहत्या घरात घडली आहे.

पोलिसांनी दिलेल्या माहितीनुसार,  आरोपी राहुल याने शुल्लक किंवा कोणतेही ठोस कारण नसताना आईला शिवीगाळ करत हाताने मारहाण करण्यास सुरुवात केली. त्यानंतर त्याने स्वतःच्या उजव्या हातातील लोखंडी गोल कड्याने आईच्या तोंडावर जोरदार प्रहार केला. या हल्ल्यात फिर्यादी यांच्या ओठाला गंभीर दुखापत झाली असून उपचारादरम्यान डॉक्टरांना ८ टाके घालावे लागले. या प्रकरणाचा पुढील तपास पोलिस उपनिरीक्षक काळे करत आहेत. दरम्यान, गेल्याच आठवड्यात वारजे परिसरात दारूच्या व्यसनाला बळी पडलेल्या मुलाशी झालेल्या वादानंतर पित्याने मुलाचा खून केल्याची घटना घडली होती.

हे सुद्धा वाचा : नोकरीला निघाले अन् काळाने घातली झडप; खासगी बस-कंटेनरच्या धडकेत एकाचा मृत्यू

मारहाण करून बापाने मुलाला संपवलं

दारूच्या आहारी गेलेला मुलगा दररोज वाद घालत असल्याच्या रागातून वडिलांनी मुलाचा गळा आवळून तसेच मारहाण करून खून केल्याची धक्कादायक घटना उघडकीस आली आहे. वारजे माळवाडी परिसरात ही घटना घडली असून, याप्रकरणी वडिल तसेच आईला पोलिसांनी अटक केली आहे.  महेश भागवत गायकवाड (वय ३०) असे खून झालेल्या तरुणाचे नाव आहे. याप्रकरणी भाऊ गणेश भागवत गायकवाड (वय ३४) यांनी पोलिसांकडे तक्रार दिली आहे. त्यानुसार भागवत सूर्यभान गायकवाड (वय ६४), पार्वती भागवत गायकवाड (वय ६०) आणि आणखी एका व्यक्तीविरोधात गुन्हा दाखल करण्यात आला आहे. वडिल भागवत व आई पार्वती यांना अटक केली आहे.