कौटुंबिक वादातून पत्नीचा गळा आवळून खून, मुलावरही चाकूने वार; खेड शहरातील घटनेनं खळबळ

राजगुरुनगर शहरातील वाडा रोड परिसरातील संगम गार्डन येथे कौटुंबिक वादातून पतीने पत्नीचा गळा आवळून खून केल्याची धक्कादायक घटना रविवारी (दि. ३०) सकाळी घडली आहे.

चांडोली : राजगुरुनगर शहरातील वाडा रोड परिसरातील संगम गार्डन येथे कौटुंबिक वादातून पतीने पत्नीचा गळा आवळून खून केल्याची धक्कादायक घटना रविवारी (दि. ३०) सकाळी घडली आहे. आईला वाचवण्यासाठी धावून आलेल्या १७ वर्षीय मुलावरही आरोपीने ओढणीने गळा आवळण्याचा प्रयत्न करून चाकूने वार केल्याचे समोर आले आहे. या घटनेमुळे खेड शहरात खळबळ उडाली आहे.  दीपा महेंद्र दौंडकर (वय ४०) असे खून झालेल्या महिलेचे नाव आहे. तर महेंद्र शिवाजी दौंडकर (वय ४५) असे आरोपी पतीचे नाव आहे. या प्रकरणी मृत महिलेच्या १७ वर्षीय मुलाने खेड पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, रविवारी सकाळी साडेसात ते साडेअकरा वाजण्याच्या दरम्यान संगम गार्डन, वाडा रोड येथील राहत्या घरी हा प्रकार घडला आहे. पत्नी आपल्याशी बोलत नसल्याच्या कारणावरून महेंद्र दौंडकर यांचा तिच्याशी वाद झाला. या वादातून त्यांनी पत्नी दीपा यांचा गळा आवळून खून केला.

खेड पोलीस ठाण्यात गुन्हा दाखल

दरम्यान, मुलगा आईला उठवण्यासाठी बेडरूममध्ये गेला असता आरोपीने त्याचाही ओढणीने गळा दाबण्याचा प्रयत्न केला. त्याने आरडाओरड करत घराबाहेर पळण्याचा प्रयत्न केला. त्यावेळी आरोपीने त्याला चाकूने भोसकून ठार करण्याची धमकी दिली. तसेच त्याच्या उजव्या हाताच्या अंगठ्यावर चाकूने वार केल्याचे फिर्यादीत नमूद करण्यात आले आहे. या प्रकरणी खेड पोलीस ठाण्यात सोमवारी (दि. ३१) सकाळी आरोपीविरुद्ध खून, खुनाचा प्रयत्न आणि धमकी दिल्याचे गुन्हे दाखल करण्यात आले आहेत. पुढील तपास खेड पोलीस ठाण्याचे पोलीस निरीक्षक सुभाष चव्हाण करीत आहेत.

हे सुद्धा वाचा : वराळेत जुन्या भांडणाच्या रागातून तरुणावर हल्ला, कोयत्याने सपासप वार करुन संपवलं; आठ जणांवर गुन्हा दाखल

मारहाण करून बापाने मुलाला संपवलं

दारूच्या आहारी गेलेला मुलगा दररोज वाद घालत असल्याच्या रागातून वडिलांनी मुलाचा गळा आवळून तसेच मारहाण करून खून केल्याची धक्कादायक घटना उघडकीस आली आहे. वारजे माळवाडी परिसरात ही घटना घडली असून, याप्रकरणी वडिल तसेच आईला पोलिसांनी अटक केली आहे.  महेश भागवत गायकवाड (वय ३०) असे खून झालेल्या तरुणाचे नाव आहे. याप्रकरणी भाऊ गणेश भागवत गायकवाड (वय ३४) यांनी पोलिसांकडे तक्रार दिली आहे. त्यानुसार भागवत सूर्यभान गायकवाड (वय ६४), पार्वती भागवत गायकवाड (वय ६०) आणि आणखी एका व्यक्तीविरोधात गुन्हा दाखल करण्यात आला आहे. वडिल भागवत व आई पार्वती यांना अटक केली आहे.