Dombivali Crime: डोंबिवली सुटकेस मर्डरचा उलगडा, १२ तासात पोलिसांनी केले उघड; कोणी केली हत्या? कारण काय?

डोंबिवलीत सुटकेसमध्ये सापडलेल्या तरुणीच्या हत्येचा १२ तासांत उलगडा झाला. प्रियंका विश्वकर्माची तिच्या लिव्ह-इन पार्टनर विनोद विश्वकर्माने किरकोळ वादातून गळा दाबून हत्या केली आणि पुरावा लपवण्यासाठी मृतदेह खाडीत फेकला.

• सुटकेसमध्ये सडलेला मृतदेह आढळताच पोलिसांनी तपास सुरू केला.
• सीसीटीव्ही फुटेजमधून आरोपी विनोद विश्वकर्माची ओळख पटली.
• वादातून प्रियंकाची हत्या करून सुटकेसमध्ये मृतदेह ठेवून खाडीत फेकल्याची कबुली विनोदने दिली.

डोंबिवली: डोंबिवली येथे खाडी जवळ सुटकेशमध्ये एका तरुणीचा सडलेला मृतदेह आढळला होता.ही घटना पलावा उड्डाणपुलाच्या खाली देसाई खाडी जवळ सोमवारी दुपारी जवळपास 1.45 वाजता समोर आली. ही घटना समोर आल्यानंतर लगेचच पोलिसांनी घटनास्थळी धाव घेतली. प्राथमिक तपासात या महिलेवर लैंगिक अत्याचार करून तिची निर्घृण हत्या केली असा संशय व्यक्त करण्यात आला आहे. डायघर पोलिसांनी या प्रकरणाचा १२ तासात उलगडा केला आहे. या हत्येमागचं कारण काय, कोणी केली हत्या, कसा झाला उलगडला? जाणून घ्या.

लग्नाच्या आमिषाने अल्पवयीन मुलीला पळविले; फुरसूंगी पोलिसांनी आरोपीला घेतले ताब्यात

कोणी केली हत्या?

पोलिसांनी दिलेल्या माहितीनुसार, सापडलेला मृतदेह हा एका तरुणीचा आहे. या प्रकरणातील मृतक तरुणीचे नाव प्रियंका विश्वकर्मा असे आहे. तिची हत्या करणारा लिव्ह-इन पार्टनरनेच केल्याचे समोर आले आहे. हत्या करणाऱ्याचं नाव विनोद विश्वकर्मा असे आहे.

का केली हत्या?

मृतक प्रियंका आणि आरोपी विनोद हे दोघेही लिव्ह-इन रिलेशनशिपमध्ये राहत होते. त्यांच्यात किरकोळ वाद झाला आणि याच वादातून विनोदने संतापाच्या भरात प्रियांकाचा गळा दाबून तिची हत्या केली. हत्येनंतर पुरावा नष्ट करण्याच्या उद्देशाने विनोदने तिचा मृतदेह एका मोठ्या सुटकेस बॅग मध्ये भरला. त्यानंतर सुटकेस देसाई खाडीजवळ आणून फेकून दिला.

कसा केला उलगडा?

पोलिसांना जेव्हा खाडी जवळ सुटकेसमध्ये मृतदेह सापडल्याची माहिती मिळाली तेव्हा पोलीस घटनास्थळी दाखल झाले. अत्यंत निर्घृणपणे महिलेचा मृतदेह कोंबलेल्या अवस्थेत आढळला. पोलिसांनी मृतदेह शवविच्छेदनासाठी पाठवला. पोलिसांनी या प्रकरणाच्या तपासाला तातडीने सुरुवात केली. मृत तरुणीची ओळख पटवण्यासाठी आसपासच्या पोलीस ठाण्यामधील मिसिंग तक्रारींची आणि खाडी परिसरातील सीसीटीव्ही फुटेजची कसून तपासणी सुरू केली. सीसीटीव्ही तपासणी दरम्यान पोलिसांना या सुटकेसचा उलगडा झाला.

विनोद विश्वकर्मा हा सुटकेस घेऊन जाताना सीसीटीव्हीमध्ये दिसला. सीसीटीव्ही फुटेज आणि तांत्रिक पुराव्यांच्या आधारावर पोलिसांनी विनोदला ताब्यात घेतले. त्याने चौकशीत आपल्या गुन्ह्याची कबुल दिली. किरकोळ वादातून त्याने प्रियंकाची गळा दाबून हत्या केल्याचे त्याने सांगितले. या जलद कारवाईमुळे, डायघर पोलिसांनी गंभीर गुन्ह्याचा 12 तासांत छडा लावून आरोपीला अटक केली. पोलिसांनी आधी अज्ञातांविरुद्ध खुनाचा गुन्हा नोंदवून तपासाला सुरुवात केली होती.
आता पोलिसांनी विनोद विश्वकर्मा याच्यावर खुनाचा गुन्हा नोंदवला आहे.

शेअरमध्ये गुंतवणुकीच्या आमिषाने ज्येष्ठाची फसवणूक; तब्बल लाखो रुपयांना घातला गंडा