बुधवार, 26 ऑगस्ट 2026
सौजन्य फोटो - सोशल मि़डीया
हैदराबाद : तेलंगणातील सूर्यापेट जिल्ह्यात बुधवारी पहाटे खासगी बस आणि लोखंडी सळ्या घेऊन जाणाऱ्या ट्रकची भीषण धडक झाली. या दुर्घटनेत सहा जणांचा मृत्यू झाला असून अनेक प्रवासी जखमी झाले आहेत. मृतांमध्ये पाच महिलांचा समावेश असल्याची माहिती पोलिसांनी दिली. हैदराबादहून विजयवाड्याच्या दिशेने जाणाऱ्या या खासगी बसमध्ये सुमारे ४२ प्रवासी होते. पहाटेच्या सुमारास बस सूर्यापेट जिल्ह्यातून जात असताना तिची ट्रकला जोरदार धडक झाली. धडक इतकी भीषण होती की बसच्या पुढील भागाचे मोठ्या प्रमाणात नुकसान झाले. अपघातानंतर बसमधील प्रवाशांमध्ये एकच खळबळ उडाली. काही प्रवासी बसमध्ये अडकले होते. घटनास्थळी उपस्थित नागरिकांनी तातडीने मदतीसाठी धाव घेतली आणि पोलिसांना तसेच बचाव पथकाला माहिती दिली.
जखमींना तातडीने रुग्णालयात दाखल
अपघाताची माहिती मिळताच पोलिस आणि बचाव पथक घटनास्थळी दाखल झाले. जखमी प्रवाशांना बसमधून बाहेर काढून तातडीने जवळच्या रुग्णालयात दाखल करण्यात आले. जखमींवर उपचार सुरू असून काहींची प्रकृती गंभीर असल्याचे सांगण्यात येत आहे. सुरुवातीच्या माहितीनुसार किमान १२ जण जखमी झाल्याचे सांगण्यात आले आहे. मात्र, काही वृत्तांमध्ये जखमींची संख्या अधिक असल्याचे नमूद करण्यात आले आहे. त्यामुळे अधिकृत आकडेवारीनंतर जखमींची संख्या स्पष्ट होणार आहे.
तेलंगाना के सूर्यापेट में आज एक भीषण सड़क हादसा हुआ जिसका अंदाजा आपको ये वीडियो देखकर लग जाएगा.. हैदराबाद से एलुरु जा रही एक निजी ट्रैवल बस पीछे से लोहे की बड़ी रॉड से लदे कंटेनर में जा घुसी. टक्कर इतनी भयानक थी कि कंटेनर निकली लोहे की भारी-भरकम रॉड बस का अगला हिस्सा और शीशा… pic.twitter.com/SS9A0R9gTl — Kishor Joshi (@KishorJoshi02) August 26, 2026
अपघाताचे नेमके कारण काय?
बसने ट्रकला नेमकी कोणत्या परिस्थितीत धडक दिली, याचा तपास पोलिसांकडून सुरू आहे. बसचा वेग, चालकाचे वाहनावरील नियंत्रण, ट्रकची रस्त्यावरील स्थिती आणि पहाटेच्या वेळी दृश्यमानता यांसह विविध बाबींची चौकशी केली जात आहे. अपघातस्थळाचा पंचनामा करून वाहनांची तपासणीही करण्यात येत आहे. दरम्यान, या दुर्घटनेमुळे महामार्गावरील वाहतूक काही काळ विस्कळीत झाली होती. अपघातग्रस्त वाहने बाजूला करून वाहतूक सुरळीत करण्यात आली.
धक्कादायक ! एसटी बसमध्ये गुंडाची महिलेवर लघुशंका; महिलेच्या मुलीसमोरच घडला प्रकार
मुख्यमंत्री रेवंत रेड्डींकडून दुःख व्यक्त
तेलंगणाचे मुख्यमंत्री रेवंत रेड्डी यांनी या भीषण दुर्घटनेबद्दल दुःख व्यक्त केले. मृतांच्या कुटुंबीयांप्रती त्यांनी संवेदना व्यक्त केली असून जखमींना तातडीने आणि आवश्यक वैद्यकीय उपचार मिळावेत, यासाठी प्रशासनाला निर्देश दिले. या दुर्घटनेमुळे पुन्हा एकदा महामार्गावरील अवजड वाहनांची वाहतूक, वाहनांचा वेग आणि पहाटेच्या प्रवासातील सुरक्षेचा प्रश्न ऐरणीवर आला आहे. अपघातामागील नेमके कारण पोलिसांच्या तपासानंतर स्पष्ट होणार असून, त्यानुसार पुढील कारवाई केली जाणार आहे.
