Nagpur News: नागपूर RSS मुख्यालयाजवळ जिलेटिनच्या कांड्या आणि डेटोनेटर सापडले; शहरात हाय अलर्ट
मिळालेल्या माहितीनुसार, सीए रोडवरील दोसर भवन चौक परिसरातील एका घराच्या छोट्या बागेत (गार्डन) एक संशयास्पद बॅग पडून होती. या बॅगेची तपासणी केली असता त्यात खालील स्फोटके आढळून आली. यात १५ जिलेटिन कांड्या (Gelatin Sticks), ५० डेटोनेटर्स (Detonators), ८ कनेक्टर्स (Connectors) यांचा समावेश आहे.
सकाळी घराच्या मालकाच्या नजरेस ही बॅग पडताच त्यांनी तातडीने पोलिसांना पाचारण केले. बॉम्ब शोधक व नाशक पथक (BDDS) आणि फॉरेन्सिक टीमने घटनास्थळी धाव घेत ही स्फोटके सुरक्षितपणे जप्त केली आहेत.
प्राथमिक तपासानुसार, ही स्फोटके गेल्या दीड महिन्यांपासून या ठिकाणी पडून असावीत, असा संशय पोलिसांनी व्यक्त केला आहे. काही दिवसांपूर्वी काटोल परिसरातील एका स्फोटक कंपनीत झालेल्या दुर्घटनेशी या साठ्याचा काही संबंध आहे का, याचाही शोध पोलीस घेत आहेत. मात्र, अद्याप याला अधिकृत दुजोरा मिळालेला नाही.
परिसराची संवेदनशीलता आणि सुरक्षेत वाढ करण्यात आली आहे. ज्या ठिकाणी ही स्फोटके सापडली, तो परिसर अत्यंत संवेदनशील मानला जातो. दोसर भवन चौक परिसरापासून जामा मशीद अवघ्या २०० मीटर अंतरावर आहे, तर पोद्दारेश्वर राम मंदिर ५०० मीटर अंतरावर आणि RSS मुख्यालय १.५ ते २ किलोमीटर अंतरावर. या पार्श्वभूमीवर नागपूरचे सह पोलीस आयुक्त नवीनचंद्र रेड्डी यांनी सांगितले की, “आम्ही सर्व बाजूंनी तपास करत आहोत. ही स्फोटके तिथे कोणी ठेवली आणि त्यांचा उद्देश काय होता, याचा शोध घेतला जात आहे.” सध्या परिसरात मोठा पोलीस बंदोबस्त तैनात करण्यात आला असून संशयितांची धरपकड सुरू आहे.
