Metro stations Renaming राज्यातील मेट्रो स्थानकांचे होणार नामांतर, राज्य सरकारकडून विशेष समिती स्थापन
मिळालेल्या माहितीनुसार, मुख्यमंत्री देवेंद्र फडणवीस यांच्या अध्यक्षतेखाली ही समिती काम करणार आहे. तर उपमुख्यमंत्री एकनाथ शिंदे आणि सुनेत्रा पवार हे यासमितीचे सह-अध्यक्ष म्हणून काम करतील.या समितीत संबंधित भागातील खासदार, आमदार आणि स्थानिक स्वराज्य संस्थांचे प्रतिनिधी यांचा समावेश असेल. तसेच, संबंधित शहरांमध्ये मेट्रो प्रकल्प राबवणाऱ्या संस्थांचे प्रशासकीय प्रमुख या समितीचे सदस्य सचिव म्हणून काम पाहतील.
मेट्रो स्थानकांना नावे देताना केवळ नामांतरावर भर न देता संबंधित परिसराची ओळख आणि ऐतिहासिक वारसा जपण्याला प्राधान्य दिले जाणार आहे. यासाठी त्या भागाचे सांस्कृतिक महत्त्व, ऐतिहासिक पार्श्वभूमी आणि भौगोलिक वैशिष्ट्ये विचारात घेतली जाणार आहेत. तसेच स्थानिक नागरिकांच्या भावना आणि त्यांच्या सूचनांनाही महत्त्व दिले जाणार आहे.
स्थानकांची नावे सर्वसामान्यांना सहज समजणारी आणि उच्चारायला सोपी असावीत, याचीही काळजी घेतली जाणार आहे. एकाच नावामुळे वेगवेगळ्या ठिकाणांबाबत प्रवाशांमध्ये संभ्रम निर्माण होऊ नये, यासाठी विशेष खबरदारी घेतली जाईल. नामकरण प्रक्रियेतून राजकीय किंवा धार्मिक वाद निर्माण होणार नाहीत, याची दक्षता घेण्याचे निकषही निश्चित करण्यात आले आहेत.
Mumbai Local: लोकलमधील विचित्र प्रकार समोर! गोरेगाव स्थानकात महिला मोटरमन केबिनच्या दरवाज्यावर
या प्रक्रियेत सर्वप्रथम मेट्रो व्यवस्थापन संस्था संबंधित स्थानकांच्या नामकरणाबाबतचा प्रस्ताव राज्य सरकारकडे सादर करणार आहे. त्यानंतर नगरविकास विभाग हा प्रस्ताव समितीसमोर मांडेल. समिती प्रस्तावाचा अभ्यास करून योग्य नावांबाबत केंद्र सरकारला शिफारस करेल. त्यानंतर अंतिम निर्णयासाठी प्रस्ताव केंद्र सरकारकडे पाठवला जाणार आहे.
दरम्यान, सध्या कोणत्या मेट्रो स्थानकांची नावे बदलली जाणार, याबाबत कोणतीही अंतिम घोषणा झालेली नाही. समितीच्या शिफारशी आणि केंद्र सरकारच्या निर्णयानंतरच स्थानकांच्या नामकरणाबाबतचे चित्र स्पष्ट होणार आहे.






