फोटो सौजन्य सोशल मीडिया
हिवाळी अधिवेशनाच्या पार्श्वभूमीवर शहरातील अनधिकृत बॅनर, पोस्टर आणि होर्डिंग्जचा प्रश्न पुन्हा ऐरणीवर आला आहे. उच्च न्यायालयाच्या आदेशांचे पालन करण्यासाठी महानगरपालिका प्रशासनाने आता कठोर पवित्रा घेतला असून, शहरातील अनधिकृत जाहिरातबाजीविरोधात विशेष मोहीम राबविण्याची तयारी केली आहे. स्काय साइन, जाहिरात फलक, कटआउट, स्वागत कमानी, तोरण आणि पताका लावणाऱ्यांवर कारवाईचा बडगा उगारला जाणार आहे.
अवैध होर्डिंग्ज आणि पोस्टरप्रकरणी उच्च न्यायालयात मनपाविरुद्ध अवमानना याचिका सुरू आहे. शुक्रवारी या प्रकरणावर सुनावणी झाली. दोन्ही बाजूंचा युक्तिवाद ऐकल्यानंतर न्यायालयाने २५ नोव्हेंबरपर्यंत अहवाल सादर करण्यासाठी पुढील सुनावणी ठेवली आहे. त्यामुळे न्यायालयीन कारवाईची टांगती तलवार लक्षात घेऊन मनपा प्रशासनाने हालचाली सुरू केल्या आहेत.
Nagpur News : ईडीकडून रेती माफियांची १६ कोटींची मालमत्ता जप्त; नागपूर-भंडाऱ्यात मोठी कारवाई
विधिमंडळाचे हिवाळी अधिवेशन ७ डिसेंबरपासून सुरू होत आहे. सरकार नागपुरात दाखल होणार आहे. अशा वेळी शहरातील रस्ते, चौक आणि सार्वजनिक परिसर स्वच्छ व आकर्षक ठेवण्याची जबाबदारी मनपावर आहे. बॅनर आणि पोस्टरमुळे सार्वजनिक मालमत्तेचे होणारे विद्रुपीकरण थांबविण्यासाठी प्रशासनाने विशेष दक्षता घेण्याचे आवाहन केले आहे.
मनपाचे अतिरिक्त आयुक्त मिलिंद मेश्राम यांनी नागरिकांसह सामाजिक, व्यावसायिक संस्था आणि राजकीय पक्षांच्या पदाधिकारी व कार्यकर्त्यांना नियमांचे पालन करण्याचे आवाहन केले आहे. अनधिकृत जाहिरात लावणाऱ्यांसोबतच ज्या व्यक्तीचा, संस्थेचा किंवा राजकीय पक्षाचा प्रचार करण्यासाठी ती लावण्यात आली आहे, त्यांनाही जबाबदार धरले जाणार आहे. थेट कायदेशीर कारवाई केली जाईल, असा इशारा मेश्राम यांनी दिला.
उच्च न्यायालयात दाखल जनहित याचिका आणि अवमानना याचिकेतील आदेशांची अंमलबजावणी करणे मनपासाठी बंधनकारक आहे. त्यामुळे नियम मोडणाऱ्यांविरुद्ध न्यायालयाच्या अवमाननेची कारवाई होऊ शकते.
याशिवाय महाराष्ट्र महानगरपालिका अधिनियमाचे कलम २४५, महाराष्ट्र महानगरपालिका (आकाशचिन्ह व जाहिरात प्रदर्शनाचे विनियमन आणि नियंत्रण) नियम २०२२ आणि महाराष्ट्र मालमत्ता विदूपीकरण प्रतिबंधक अधिनियम १९९५ मधील तरतुर्दीनुसार गुन्हा दाखल करून कठोर कारवाई केली जाणार आहे.
मनपाच्या परवानगीशिवाय शहरातील कोणत्याही सार्वजनिक जागेचा जाहिरातींसाठी वापर करता येणार नाही. रस्ते, पदपथ, वीज खांब, वाहतूक सिग्नल, ट्रैफिक आयलँड, मेट्रोचे खांब आणि अन्य सार्वजनिक ठिकाणी बॅनर, पोस्टर, कटआउट, जाहिरात फलक, स्वागत कमानी किंवा पताका लावण्यास मनाई करण्यात आली आहे.






