Crime News: नशा करताना वाद; मित्राच्या डोक्यात सिमेंटचा गट्टू घालून खून, आरोपी स्वतःच पोलिसांत हजर

नशा करताना मित्रासोबत वाद झाला अन् काही वेळातच त्याचा रक्ताच्या थारोळ्यात मृतदेह पडला. धक्कादायक म्हणजे खून केल्यानंतर आरोपी घरी गेला, कपडे बदलले आणि थेट खडक पोलीस ठाण्यात पोहोचला; ‘मीच खून केला’ अशी कबुली देत त्याने पोलिसांसमोर आत्मसमर्पण केले.

• नशा करताना वाद; मित्राच्या डोक्यात सिमेंटचा गट्टू घालून खून
• काशेवाडीत रक्ताच्या थारोळ्यात आढळला आकाश पाटोळे
• खून केल्यानंतर कपडे बदलून आरोपी स्वतःच पोलिसांत हजर

पुणे : नशा करताना झालेल्या वादातून मित्राच्या डोक्यात सिमेंटचा गट्टू घालून खून केल्याची धक्कादायक घटना भवानी पेठेतील काशेवाडी परिसरात घडली. खून केल्यानंतर आरोपी घरी गेला, कपडे बदलले आणि त्यानंतर स्वतःहून खडक पोलीस ठाण्यात हजर झाला. पोलिसांनी त्याला अटक केली आहे. आकाश उर्फ अक्क्या उर्फ झुरळ्या विठ्ठल पाटोळे (३०, रा. महात्मा फुले मित्र मंडळाजवळ, काशेवाडी, भवानी पेठ) असे खून झालेल्या तरुणाचे नाव आहे. याप्रकरणी त्याचा मित्र अजय उर्फ चोर राजा सुखदेव शिंदे (३०, रा. काशेवाडी) याला अटक करण्यात आली आहे. रुपाली प्रमोद पाटोळे (३०) यांनी खडक पोलिस ठाण्यात फिर्याद दिली आहे.

हेही वाचा: Crime News: मालमत्तेसाठी आधी सासरच्यांना मारहाण; सुटकेनंतर दोनच दिवसांत पत्नीची भररस्त्यात हत्या!

मित्रांसोबत घराबाहेर पडला

पोलिसांनी दिलेल्या माहितीनुसार, रुपाली पाटोळे या जुन्या मोटार स्टँड परिसरात शेंगा आणि कणीस विक्रीची गाडी लावतात. शुक्रवारी (२ ऑक्टोबर) सायंकाळी आकाश घरी झोपला होता. झोपेतून उठल्यानंतर आंघोळ करून तो घरात बसला होता. त्याचवेळी त्याचे मित्र शंभू आणि अबिद घरी आले. त्यांच्यासोबत आकाश घराबाहेर पडला.

रक्ताच्या थारोळ्यात आढळला

रात्री साडेआठच्या सुमारास काशेवाडीतील वजनकाट्याजवळील एका सोसायटीच्या प्रवेशद्वारासमोर आकाश रक्ताच्या थारोळ्यात बेशुद्धावस्थेत पडल्याचे एका स्थानिकाच्या निदर्शनास आले. त्याने याची माहिती रुपाली यांना दिली. रुपाली घटनास्थळी पोहोचल्या असता आकाश गंभीर जखमी अवस्थेत आढळला. त्याला तातडीने ससून रुग्णालयात नेण्यात आले. मात्र, उपचार सुरू करण्यापूर्वीच त्याचा मृत्यू झाल्याचे वैद्यकीय तज्ज्ञांनी सांगितले.

हेही वाचा: कर्ज फेडण्यासाठी जमीन विकली, वावर गहाण अन् पत्नीचे मंगळसूत्रही ठेवले; अखेर तरुण शेतकऱ्याने जीवन संपवले

खून केल्यानंतर स्वतःच पोलिसांत

घटनेची माहिती देण्यासाठी रुपाली खडक पोलीस ठाण्यात गेल्या असता, त्याचवेळी आकाशचा मित्र अजय उर्फ चोर राजा स्वतःहून पोलीस ठाण्यात आला. नशा करताना आकाशसोबत वाद झाल्याचे आणि त्या वादातून त्याच्या डोक्यात सिमेंटचा गट्टू घालून खून केल्याची कबुली त्याने पोलिसांना दिल्याचे सांगण्यात आले. खून केल्यानंतर घरी जाऊन कपडे बदलले आणि त्यानंतर पोलीस ठाण्यात हजर झाल्याचे अजयने पोलिसांना सांगितले. या प्रकरणाचा पुढील तपास सहायक निरीक्षक राकेश जाधव करत आहेत.