रविवार, 4 ऑक्टोबर 2026
सौजन्य फोटो - सोशल मिडीया
बुलढाणा : दुष्काळसदृश परिस्थिती, हातातून गेलेले खरिपाचे पीक आणि वाढत्या कर्जाच्या ओझ्यामुळे शेतकरी कुटुंबांसमोरील आर्थिक संकट किती गंभीर झाले आहे, याची जाणीव करून देणारी घटना बुलढाणा जिल्ह्यातील संग्रामपूर तालुक्यातील चोंडी येथे घडली. कर्जबाजारीपणामुळे तरुण शेतकरी शंकर भारसाकडे यांनी जीवन संपवल्याची घटना समोर आली आहे. कर्ज फेडण्यासाठी केलेले प्रयत्न आणि शेतीतून उत्पन्नाची आशा मावळल्याने ते आर्थिक विवंचनेत होते, अशी माहिती समोर आली आहे.
शंकर भारसाकडे यांनी कर्जाचा भार कमी करण्यासाठी आपली एक जमीन विकल्याचे सांगण्यात येते. आणखी एक वावर गहाण ठेवण्यात आला होता. कुटुंबाच्या आर्थिक अडचणी दूर करण्यासाठी पत्नीचे मंगळसूत्रही गहाण ठेवण्यात आल्याची माहिती आहे. मात्र, या प्रयत्नांनंतरही कर्जाचा भार कमी झाला नसल्याचे कुटुंबीयांकडून सांगण्यात येत आहे.
घटनेपूर्वी शंकर भारसाकडे यांनी सहा ओळींची चिठ्ठी लिहिल्याची माहिती समोर आली आहे. त्यामध्ये आर्थिक परिस्थिती आणि कर्जाच्या संकटाचा उल्लेख असल्याचे सांगण्यात येत आहे. कर्ज फेडण्यासाठी केलेले प्रयत्न करूनही परिस्थितीत सुधारणा होत नसल्याची व्यथा त्यांनी मांडल्याचे कुटुंबीयांकडून सांगण्यात आले.
संग्रामपूर तालुक्यात यंदा पावसाने ओढ दिल्याने खरीप पिकांवर मोठा परिणाम झाला आहे. तब्बल ६० दिवसांपासून पावसाची प्रतीक्षा असल्याने अनेक शेतकऱ्यांच्या पिकांचे नुकसान झाले आहे. हातातोंडाशी आलेले पीक पावसाअभावी वाया जाण्याची परिस्थिती निर्माण झाली असून, त्याचा थेट परिणाम शेतकऱ्यांच्या उत्पन्नावर झाला आहे. चोंडी येथील या घटनेमुळे दुष्काळसदृश परिस्थिती, कर्जबाजारीपणा, वाढता शेतीखर्च आणि अनिश्चित उत्पन्न यामुळे शेतकरी कुटुंबांसमोरील आर्थिक संकट पुन्हा अधोरेखित झाले आहे. अशा संकटात सापडलेल्या शेतकरी कुटुंबांना वेळेत आर्थिक तसेच मानसिक आधार आणि आवश्यक शासकीय मदत मिळण्याची गरज व्यक्त होत आहे.
