Pune Crime: विसर्जन मिरवणुकीच्या गर्दीत चोरट्यांचा डाव; बंद घरातून ३० लाखांचे दागिने लंपास
पुणे : शहरात गणेश विसर्जन मिरवणुकीची धामधूम आणि कडेकोट पोलीस बंदोबस्त सुरू असतानाच मध्यवर्ती शनिवार पेठेतील हसबनीस बखळ परिसरात चोरट्यांनी बंद फ्लॅट फोडून तब्बल ३० लाख रुपयांचे सोन्याचे दागिने लंपास केले. कुटुंबीय गणेश विसर्जनाच्या दिवशी नातेवाईकांकडे गेले असल्याची संधी साधत चोरट्यांनी मुख्य दरवाजाचे कुलूप तोडून घरात प्रवेश केला. याप्रकरणी विश्रामबाग पोलिस ठाण्यात अज्ञात चोरट्यांविरोधात गुन्हा दाखल करण्यात आला आहे. मिळालेल्या माहितीनुसार, तक्रारदार नागरिक शुक्रवारी (२५ सप्टेंबर) गणेश विसर्जनाच्या दिवशी सकाळी कुटुंबीयांसह नातेवाईकांकडे गेले होते. घर बंद असल्याचे पाहून चोरट्यांनी डाव साधला. मुख्य दरवाजाचे कुलूप तोडून घरात प्रवेश केल्यानंतर कपाटाची झडती घेतली. कपाटातील सोन्याचे सुमारे ३० लाख रुपयांचे दागिने चोरून चोरटे पसार झाले.
शनिवारी पहाटे कुटुंबीय घरी परतले. त्यावेळी घराच्या दरवाजाचे कुलूप तुटलेले दिसले. घरात प्रवेश केल्यानंतर सामान अस्ताव्यस्त पडलेले आढळले. कपाटातील सोन्याचे दागिने चोरीला गेल्याचे लक्षात येताच कुटुंबीयांना मोठा धक्का बसला. त्यांनी तातडीने पोलिसांना घटनेची माहिती दिली. घटनेची माहिती मिळताच विश्रामबाग पोलिसांचे पथक घटनास्थळी दाखल झाले. पोलिसांनी घराची पाहणी करून चोरीचा पंचनामा केला. तसेच परिसरातील सीसीटीव्ही कॅमेऱ्यांचे फुटेज तपासण्यास सुरुवात केली आहे.
गणेश विसर्जन मिरवणुकीमुळे मध्यवर्ती पुण्यात मोठ्या प्रमाणावर नागरिकांची गर्दी आणि पोलिसांचा बंदोबस्त होता. अनेक भागांत वाहतूक व्यवस्था आणि मिरवणुकीच्या नियोजनासाठी पोलिसांची मोठी यंत्रणा तैनात होती. याच काळात बंद फ्लॅट हेरून चोरट्यांनी घरफोडी केल्याने परिसरातील नागरिकांमध्ये चिंता व्यक्त होत आहे. चोरी करणाऱ्या आरोपींची ओळख पटवण्यासाठी पोलिसांकडून सीसीटीव्ही फुटेज तपासले जात असून, संशयितांच्या हालचालींचा माग काढण्याचे काम सुरू आहे. चोरीतील सोन्याचे दागिने आणि आरोपींचा शोध घेण्यासाठी पोलिसांनी तपासाची चक्रे वेगाने फिरवली आहेत.
.png "Videos"){kind=small}
