पापा जाधव हत्याकांड प्रकरणात मोठी अपडेट; पोलिसांच्या तपासातून धक्कादायक माहिती समोर

राजुरा शहरातील चर्चित विनोद जाधव उर्फे पापा हत्याकांडाचा तपास जसजसा पुढे सरकत आहे, तसतसे धक्कादायक खुलासे समोर येत आहेत. या प्रकरणात पोलिसांनी आतापर्यंत चार आरोपींना अटक केली आहे.

• पापा जाधव हत्याकांड प्रकरणात मोठी अपडेट
• पोलिसांच्या तपासातून धक्कादायक माहिती समोर
• चार आरोपींना अटक केली

राजुरा : राजुरा शहरातील चर्चित विनोद जाधव उर्फे पापा हत्याकांडाचा तपास जसजसा पुढे सरकत आहे, तसतसे धक्कादायक खुलासे समोर येत आहेत. या प्रकरणात पोलिसांनी आतापर्यंत चार आरोपींना अटक केली असून, तपासादरम्यान चार देशी कट्टे, आठ काडतुसे आणि चार रिकाम्या मॅगझिन असा शस्त्रसाठा जप्त करण्यात आला. दरम्यान, हत्येच्या वेळी मुख्य आरोपी कार्तिक खामनकर हा नागपूरला गेल्याचे भासवले होते. मात्र प्रत्यक्षात घटनास्थळीच उपस्थित असल्याची माहिती पोलिस तपासातून समोर आल्याचे सांगण्यात येत आहे.

कार्तिक यापूर्वी पापा जाधव याच्यासोबत आयपीएल सट्टेबाजीच्या व्यवसायात सहभागी होता. नंतर दोघांमध्ये वाद निर्माण झाला. आपल्या विरोधात होणाऱ्या कारवाईची माहिती जाधव याच्याकडून दिली जात असल्याचा कार्तिकला संशय असल्याचे तपासात पुढे आले आहे. तसेच त्याच्या मुलांना त्रास दिल्याचा आणि काही दिवसांपूर्वी धमकी दिल्याचाही आरोप तपासात समोर आला आहे. या कथित रागातून आणि भीतीच्या भावनेतून कार्तिकने करण मेकलवार व करण बाविस्कर यांना जाधवच्या हत्येची कथित सुपारी दिल्याची माहिती पोलिस तपासात समोर आली आहे.

हत्येची जबाबदारी स्वीकारल्यानंतर आत्मसमर्पण केल्यास दोन्ही आरोपींच्या कुटुंबियांची आर्थिक जबाबदारी घेण्याचे आश्वासन कार्तिकने दिल्याचा तपासात दावा आहे. त्यासाठी मनीऑर्डरच्या माध्यमातून पैसे पाठविण्याचेही सांगितल्याचे समोर आले आहे. त्यानंतर हत्येचा कट प्रत्यक्षात राबविण्यात आल्याचे पोलिस तपासात निष्पन्न झाल्याचे सांगण्यात येत आहे. या प्रकरणाचा पुढील तपास पोलिसांकडून सुरू असून हत्येचा नेमका कट, शस्त्रांची उपलब्धता, आरोपींच्या परस्पर संबंधांसह प्रत्येक आरोपीची भूमिका तपासली जात आहे. तपासातून आणखी महत्त्वाचे धागेदोरे हाती लागण्याची शक्यता पोलिसांकडून व्यक्त केली जात आहे.

हे सुद्धा वाचा : पोलिसाच्या मारहाणीनंतर थेट कोमात, शुद्धीवर आल्यानंतर गुन्हा दाखल; नेमकं काय घडलं?

नागपूरला गेल्याचे भासविले

हत्येच्या दिवशी पोलिसांचा संशय येऊ नये म्हणून कार्तिक नागपूरला गेल्याचे समोर आले होते. मात्र, तपासादरम्यान हत्येच्या वेळी तो घटनास्थळीच उपस्थित असल्याची माहिती पोलिसांच्या हाती लागल्याचे सांगण्यात येत आहे. हत्येत सहभागी असल्याचे सांगितल्या जाणाऱ्या आरोपींच्या चौकशीत मुख्य आरोपी म्हणून कार्तिकचे नाव समोर आल्यानंतर त्याची भूमिका पोलिसांच्या तपासाच्या केंद्रस्थानी आली आहे.

हे सुद्धा वाचा : बनावट पदव्यांचा मास्टरमाईंड ताब्यात, नागपूर येथून केली अटक; महत्त्वाच्या बाबी उघड होण्याची शक्यता