2013 च्या लैंगिक अत्याचार प्रकरणात तरुण तेजपालांच्या अडचणी वाढल्या; सुप्रीम कोर्टाचे सरेंडरचे आदेश
Tarun Tejpal: माजी तहलका संपादक तरुण तेजपाल यांना सुप्रीम कोर्टाकडून मोठा धक्का बसला आहे. 2013 मधील महिला सहकाऱ्याच्या लैंगिक अत्याचार प्रकरणात बॉम्बे हायकोर्टाने सुनावलेल्या 10 वर्षांच्या शिक्षेला आव्हान देणाऱ्या तेजपाल यांना सुप्रीम कोर्टाने दोन आठवड्यांच्या आत आत्मसमर्पण करण्याचे निर्देश दिले आहेत.
तेजपाल यांनी आत्मसमर्पण केल्यानंतर 22 सप्टेंबर रोजी त्यांच्या याचिकेवर सुनावणी करण्यात येईल, असे सुप्रीम कोर्टाने स्पष्ट केले आहे. त्यामुळे हायकोर्टाच्या निर्णयाविरोधात सर्वोच्च न्यायालयात गेलेल्या तेजपाल यांच्या अडचणी वाढल्या आहेत.
हे प्रकरण नोव्हेंबर 2013 मधील आहे. गोव्यातील एका लक्झरी हॉटेलच्या लिफ्टमध्ये तरुण तेजपाल यांनी आपल्या कनिष्ठ महिला सहकाऱ्याचे लैंगिक शोषण आणि तिच्यावर अत्याचार केल्याचा आरोप करण्यात आला होता. महिलेच्या तक्रारीनंतर गोवा पोलिसांनी तेजपाल यांच्याविरोधात बलात्कारासह विविध कलमांनुसार गुन्हा दाखल केला होता. त्यानंतर नोव्हेंबर 2013 मध्ये तेजपाल यांना अटक करण्यात आली होती.
लोणी काळभोरमध्ये सव्वा किलोचा गांजा जप्त; 95 हजारांचा मुद्देमालही हस्तगत, दोघांना अटक
या प्रकरणाची दीर्घकाळ न्यायालयीन प्रक्रिया सुरू होती. मे 2021 मध्ये मापुसा येथील सत्र न्यायालयाने पुराव्यांचा अभाव असल्याचे नमूद करत तरुण तेजपाल यांची सर्व आरोपांतून निर्दोष मुक्तता केली होती. मात्र, सत्र न्यायालयाच्या या निर्णयाला गोवा सरकारने विरोध केला. त्यानंतर सरकारने तेजपाल यांच्या निर्दोष मुक्ततेविरोधात बॉम्बे हायकोर्टात अपील दाखल केले.
6 ऑगस्ट 2026 रोजी बॉम्बे हायकोर्टाने सत्र न्यायालयाचा निर्णय उलटवत तरुण तेजपाल यांना प्रकरणात दोषी ठरवले. हायकोर्टाने विविध कलमांनुसार दोषी ठरवत त्यांना 10 वर्षांच्या कठोर कारावासाची शिक्षा आणि दंड सुनावला. या निर्णयामुळे 2021 मध्ये मिळालेला दिलासा संपुष्टात आला आणि तेजपाल यांनी हायकोर्टाच्या निकालाविरोधात सुप्रीम कोर्टात धाव घेतली.
तरुण तेजपाल यांनी 20 ऑगस्ट रोजी सुप्रीम कोर्टात याचिका दाखल करत बॉम्बे हायकोर्टाच्या दोषसिद्धीच्या निर्णयाला आणि 10 वर्षांच्या शिक्षेला आव्हान दिले. दुसरीकडे, गोवा सरकारनेही 18 ऑगस्ट रोजी सुप्रीम कोर्टात अर्ज दाखल केला. प्रकरणाचे गांभीर्य लक्षात घेता हायकोर्टाने सुनावलेली शिक्षा अपुरी असल्याचा दावा करत ती वाढविण्याची मागणी सरकारने केली आहे.
आता सुप्रीम कोर्टाने तेजपाल यांना दोन आठवड्यांच्या आत आत्मसमर्पण करण्यास सांगितले आहे. तेजपाल यांनी या आदेशाचे पालन करून आत्मसमर्पण केल्यास 22 सप्टेंबर रोजी प्रकरणाची पुढील सुनावणी केली जाणार असल्याचे न्यायालयाने स्पष्ट केले. त्यामुळे या प्रकरणात आता तेजपाल आत्मसमर्पण केल्यानंतर सुप्रीम कोर्ट त्यांच्या दोषसिद्धी आणि 10 वर्षांच्या शिक्षेविरोधातील याचिकेवर काय भूमिका घेते, तसेच शिक्षा वाढविण्याच्या गोवा सरकारच्या मागणीवर काय निर्णय देते, याकडे लक्ष लागले आहे.
भाजप आमदाराच्या मुलीचा मंदिरात राडा; पीएसआय च्या कानशिलात लगावल्याचा व्हिडीओ व्हायरल
.png "Videos"){kind=small}
