वर्षभरापासून फरार झालेला गुंड संतोष धुमाळ पोलिसांच्या जाळ्यात; खिडकीतून उडी मारताना थरारकरित्या पकडले

गंभीर गुन्ह्यातील तसेच महाराष्ट्र संघटित गुन्हेगारी नियंत्रण कायद्यान्वये (मकोका) कारवाई तसेच गेल्या वर्षभरापासून पोलिसांना गुंगारा देणाऱ्या कुविख्यात गुन्हेगाराला कोथरूड पोलिसांनी बेड्या ठोकल्या आहेत.

पुणे : गंभीर गुन्ह्यातील तसेच महाराष्ट्र संघटित गुन्हेगारी नियंत्रण कायद्यान्वये (मकोका) कारवाई तसेच गेल्या वर्षभरापासून पोलिसांना गुंगारा देणाऱ्या कुविख्यात गुन्हेगाराला कोथरूड पोलिसांनी बेड्या ठोकल्या आहेत. एक वर्षांपासून पोलिस त्याचा शोध घेत होते. पत्नीला भेटण्यास आल्यानंतर त्याला पकडण्यात यश आले आहे. खिडकीतून उडी मारून पळून जाताना थरारकरित्या त्याला पकडण्यात आले. संतोष अनंत धुमाळ (रा. इंदिरा शंकर नगरी, पौड रोड, कोथरूड) असे अटक करण्यात आलेल्या आरोपीचे नाव आहे.

कोथरूड पोलिस ठाण्यात भारतीय न्याय संहितेतील कलम ३०८(४), ३५१(३), ३५२, ३(५) तसेच आर्म्स अॅक्ट आणि महाराष्ट्र संघटित गुन्हेगारी नियंत्रण कायद्यातील कलमांनुसार गुन्हा दाखल आहे. ही कारवाई पोलिस उपायुक्त डॉ. सागर कवडे आणि सहाय्यक पोलिस आयुक्त सुजाता तानवडे यांच्या मार्गदर्शनाखाली वरिष्ठ निरीक्षक अरुण घोडके, पोलिस निरीक्षक अनिल माने, सहायक निरीक्षक सुधीर घुले तसेच पोलिस हवालदार लांडगे यांच्या पथकाने केली.

संतोष धुमाळ हा मागील वर्षभरापासून पोलिसांना गुंगारा देत फरार होता. दरम्यान, आरोपी आपल्या पत्नीला भेटण्यासाठी कोथरूड गावठाण येथील गुलमोहर सोसायटीत येणार असल्याची गुप्त माहिती पोलिस हवालदार लांडगे यांना मिळाली. त्यानूसार या माहितीची खातरजमा करण्यात आली. नंतर वरिष्ठ पोलिस निरीक्षक अरुण घोडके यांनी योग्य ते मार्गदर्शन करून पथकाला आरोपीला पकडण्याबाबत सूचना दिल्या. पोलिसांनी गुलमोहर सोसायटी परिसरासह ये-जा करण्याच्या मार्गावर सापळा रचला. सोसायटीमध्ये प्लॅटची चौकशी करताना आरोपी पोलिसांना पाहून पळून जाण्याचा प्रयत्न करू लागला. त्याने खिडकीतून बाहेर पडण्याचा प्रयत्न केला; मात्र पोलिसांनी तत्काळ त्याला ताब्यात घेतले.

दरम्यान, त्याच्याकडे चौकशी केल्यानंतर साथीदार विपुल उत्तम माजिरे याच्याबाबतही माहिती दिली. विपुल माजिरे बालगंधर्व चौकातील जोशी वडेवाले यांच्या दुकानाच्या मागे भेटण्यासाठी येणार असल्याचे समोर आले. त्यानुसार पोलिसांनी तेथेही सापळा रचला. काही वेळातच विपुल माजिरे तेथे आल्यानंतर त्यालाही पोलिसांनी ताब्यात घेतले.

खिडकीतून पळण्याचा प्रयत्न फसला

पोलिसांच्या सापळ्याची चाहूल लागताच संतोष धुमाळ खिडकीतून बाहेर पडून पसार होण्याचा प्रयत्न केला. मात्र, पोलिसांनी प्रसंगावधान राखत त्याला जागीच पकडले. नंतर त्याच्याकडून मिळालेल्या माहितीच्या आधारे दुसऱ्या आरोपीलाही ताब्यात घेण्यात आले.

हे सुद्धा वाचा : चाकणमधील उद्योजक आक्रमक; 15 ते 30 दिवसांत एमआयडीसीतील रस्ते दुरुस्तीची मागणी

कोण आहे संतोष धुमाळ?

संतोष धुमाळ सराईत गुन्हेगार असून, त्याची कोथरूड भागात दहशत देखील आहे. संतोष धुमाळ हा एके काळी नीलेश घायवळच्या टोळीचा सक्रिय सदस्य होता. त्याच्याविरुद्ध खून, खुनाचा प्रयत्न, खंडणी व इतर गंभीर स्वरूपाचे गुन्हे विविध पोलिस ठाण्यांमध्ये दाखल आहेत. धुमाळ मूळचा मुळशी तालुक्यातील असून, सध्या तो कोथरूड परिसरात वास्तव्यास आहे. मात्र, कालांतराने तो घायवळची टोळी सोडून बाहेर पडला. त्यानंतर त्याचे घायवळ टोळीशी वाद सुरू झाले. काही महिन्यांपूर्वी जमिनीच्या वादातून दोघांमध्ये तणाव निर्माण झाला. त्यातून घायवळ टोळीने संतोष धुमाळवर हल्ला करण्याचे नियोजन देखील केले होते.