महिन्याला 10 हजार रुपये हप्ता दे, नाहीतर…; साताऱ्यातील वडापाव सेंटरच्या मालकाला धमकी

वडापाव सेंटरच्या मालकाला महिन्याला दहा हजार रुपये हप्ता द्यावा, अन्यथा दुकान चालू देणार नाही, तसेच ‘एकेकाला जिवंत सोडणार नाही’ अशी धमकी देत तिघांनी दहशत माजवल्याचा प्रकार उघडकीस आला आहे.

• महिन्याला 10 हजार रुपये हप्ता दे
• अन्यथा दुकान चालू देणार नाही
• वडापाव सेंटरच्या मालकाला धमकी

सातारा : राज्यासह देशभरात गुन्हेगारी वाढली आहे. खून, हाणामाऱ्या, लुटमार, दरोडे यासारख्या घडणाऱ्या घटनांमुळे नागरिक त्रस्त होत आहेत. अनेक गुंड व्यवसायिकांना धमक्या देऊन हाप्ते घेत असतात. असाच एक प्रकार सातारा जिल्ह्यात घडला आहे. गोडोली, अजंठा चौक सातारा येथे साईनाथ वडापाव सेंटरच्या मालकाला महिन्याला दहा हजार रुपये हप्ता द्यावा, अन्यथा दुकान चालू देणार नाही, तसेच ‘एकेकाला जिवंत सोडणार नाही’ अशी धमकी देत तिघांनी दहशत माजवल्याचा प्रकार उघडकीस आला आहे.

दरम्यान, दुकानातील खुर्च्या, टेबल, भांडी फोडून नुकसान करण्यात आले आहे. याबाबतच्या गुन्ह्याची नोंद सातारा शहर पोलिसात करण्यात आली आहे. याबाबत पोलिसांनी दिलेल्या माहितीनुसार, या वडापाव सेंटरच्या गल्ल्यातील ४५०० रुपये जबरदस्तीने काढून घेऊन दुकान मालक व कामगाराला शिवीगाळ करत धक्काबुक्की करण्यात आली आणि आरोपी दुचाकीवरून पसार झाले. याप्रकरणी सरिता जगदीश जाधव (रा. निशिगंधा कॉलनी, देगाव फाटा) यांनी इंदिरानगर झोपडपट्टी येथील रसिक धोत्रे व त्याच्या दोन साथीदारांविरोधात सातारा शहर पोलिसात तक्रार दिली आहे. पोलिसांनी खंडणी, शिवीगाळ व मारहाणीचा गुन्हा दाखल केला आहे. अधिक तपास पोलिस उपनिरीक्षक जायपत्रे करत आहेत.

पुण्यात तरुणावर कोयत्याने सपासप वार

कासारवाडी परिसरात एका तरुणावर किरकोळ कारणावरून तिघांनी कोयत्याने जीवघेणा हल्ला केल्याची धक्कादायक घटना बुधवारी (दि. २६) रात्री पावणे बारा वाजण्याच्या सुमारास घडली आहे. “आमच्याकडे रागाने का बघतोस?” असा जाब विचारत आरोपींनी पीडित तरुणाला मारहाण करून गंभीर जखमी केले आहे. याप्रकरणी दापोडी पोलीस ठाण्यात तीन जणांविरुद्ध गुन्हा दाखल करण्यात आला आहे. संकेत सचिन भोसले (वय २१, रा. बाराथे वस्ती, आंबेडकर चौक, बौद्ध विहार शेजारी, भाऊ पाटील रोड, बोपोडी) असे जखमी तरुणाचे नाव असून त्यांनी गुरुवारी (दि. २७) पोलिसांकडे तक्रार दिली आहे. विक्रम देवकुळे, गणेश बावधाने उर्फ ‘काचडी गण्या’ आणि निलेश शिवगण (सर्व रा. पडाळवस्ती, भाऊ पाटील रोड, औंध रोड, बोपोडी) अशी आरोपींची नावे आहेत.