कौटुंबिक वादातून पत्नीची हत्या
नागपूर : कौटुंबिक वादातून संतापलेल्या पतीने पत्नी यामिनी यादव (वय ३८, रा. झिंगाबाई टाकळी) हिला बेदम मारहाण केली. या मारहाणीत पत्नीचा मृत्यू झाल्याची घटना झिंगाबाई टाकळी परिसरात घडली. पतीने पत्नीच्या गळ्यावर तसेच पोटावर केलेल्या मारहाणीत गंभीर दुखापत झाली. मात्र, महिलेच्या शरीरावर बाहेरून गंभीर मारहाणीच्या स्पष्ट खुणा न दिसल्याने मानकापूर पोलिसांनी आकस्मिक मृत्यूची नोंद केली होती.
शवविच्छेदनाच्या अहवालात मणक्याचे हाड तुटल्याचे तसेच पोटात रक्तस्राव झाल्याचे समोर आले. पोलिसांनी हत्येचा गुन्हा दाखल करून पती कृष्णलाल यादव (वय ४१) याला अटक केली. झिंगाबाई टाकळी परिसरातील भाड्याच्या खोलीत दाम्पत्य राहत होते. त्यांना १० वर्षांचा मुलगा आणि ४ वर्षांची मुलगी आहे. कृष्णलाल हा बँकेत खासगी नोकरी करत असल्याची माहिती आहे. यामिनीच्या मृत्यूची माहिती मिळताच मानकापूर पोलिस घटनास्थळी दाखल झाले. घटनास्थळाचा पंचनामा करून मृतदेह शवविच्छेदनासाठी रुग्णालयात पाठवला.
प्राथमिक पाहणीत यामिनीच्या शरीरावर मारहाणीच्या गंभीर खुणा आढळल्या नाहीत. चेहऱ्यावर काही व्रण होते. मात्र, कोणत्याही शस्त्राचा वापर झाल्याचेही दिसले नाही. त्यामुळे सुरुवातीला आकस्मिक मृत्यूची नोंद केली. कृष्णलालला चौकशीसाठी ताब्यात घेतले.
शवविच्छेदन अहवालाने तपासाला कलाटणी
मानकापूरचे वरिष्ठ पोलिस निरीक्षक हरीश काळसेकर यांनी तपासाला गती दिली. गुरुवारी सायंकाळी शवविच्छेदनाचा प्राथमिक अहवाल पोलिसांना प्राप्त झाला. त्यामध्ये यामिनीच्या मणक्याचे हाड तुटल्याचे तसेच पोटात रक्तस्राव झाल्याचे नमूद केले. गंभीर दुखापती मारहाणीमुळे झाल्याचे स्पष्ट झाल्यानंतर पोलिसांनी आकस्मिक मृत्यूच्या नोंदीत हत्येचे कलम वाढवले. त्यानंतर कृष्णलाल यादव याच्याविरुद्ध हत्येचा गुन्हा दाखल करून अटक केली.
बुधवारी रात्री झाला होता वाद
बुधवारी रात्री यादव दाम्पत्यामध्ये वाद झाला. सुरुवातीला शाब्दिक बाचाबाची झाल्यानंतर वाद विकोपाला गेला. संतापलेल्या कृष्णलालने यामिनीला हातबुक्क्यांनी मारहाण करण्यास सुरुवात केली. तिच्या गळ्यावर तसेच पोटावर मारहाण केली. मारहाणीत यामिनी कोसळली. काही वेळाने तिची प्रकृती गंभीर झाल्याचे लक्षात आल्यानंतर कृष्णलालने उपचारासाठी खासगी रुग्णालयात नेले. मात्र, डॉक्टरांनी यामिनीला मृत घोषित केले.
.png "Videos"){kind=small}
