Maharashtra Drought : दुष्काळाच्या मुद्द्यावर फडणवीस दिल्लीत; अमित शहांसोबतच्या भेटीत काय ठरलं?

Maharashtra Drought : मुख्यमंत्री देवेंद्र फडणवीस यांनी राज्यातील दुष्काळाबाबत गृहमंत्री अमित शहा यांची भेट घेतली. यावेळी अमित शहा यांनी होईल तितक्या मदतीचे आश्वासन दिले.

• अमित शहांकडून मदतीचे आश्वासन
• 265 तालुक्यांमध्ये दुष्काळ
• केंद्राचे पथक महाराष्ट्रात येणार

 

महाराष्ट्रातील दुष्काळाच्या (Maharashtra Drought) गंभीर परिस्थितीच्या पार्श्वभूमीवर मुख्यमंत्री देवेंद्र फडणवीस यांनी बुधवारी केंद्रीय गृहमंत्री अमित शहा यांची नवी दिल्ली (New Delhi) येथे भेट घेतली. या भेटीत राज्यातील दुष्काळाची परिस्थिती, शेतकऱ्यांना दिली जात असलेली मदत आणि केंद्राकडून आवश्यक असलेल्या आर्थिक सहाय्याबाबत चर्चा करण्यात आली.
फडणवीस यांनी केंद्राकडे राष्ट्रीय आपत्ती प्रतिसाद निधी (NDRF) अंतर्गत महाराष्ट्राला जास्तीत जास्त आर्थिक मदत देण्याची मागणी केली.

फडणवीस यांनी अमित शहा यांना महाराष्ट्रातील दुष्काळग्रस्त भागांची स्थिती आणि राज्य सरकारकडून करण्यात येत असलेल्या उपाययोजनांची माहिती दिली. तसेच राज्य सरकारच्या वतीने केंद्राला निवेदनही सादर केले.

 

265 तालुक्यांमध्ये दुष्काळ

महाराष्ट्रातील 358 पैकी 265 तालुक्यांमध्ये दुष्काळ जाहीर करण्यात आला आहे. कमी पावसामुळे अनेक भागांमध्ये शेतीचे मोठ्या प्रमाणात नुकसान झाले असून, शेतकरी अडचणीत सापडले आहेत. राज्य सरकारकडून दुष्काळग्रस्त भागांसाठी विविध सवलती आणि मदत उपाययोजना जाहीर करण्यात आल्या आहेत.

फडणवीस यांनी केंद्र सरकारकडून मिळणारी मदत दुष्काळग्रस्त शेतकरी आणि नागरिकांपर्यंत पोहोचवण्यासाठी केंद्र-राज्य समन्वयाची आवश्यकता असल्याचे सांगितले.

केंद्राचे पथक महाराष्ट्रात येणार

दरम्यान, दुष्काळग्रस्त भागांची प्रत्यक्ष पाहणी करण्यासाठी केंद्र सरकारचे पथक महाराष्ट्रात दाखल होणार आहे. हे पथक 8 ते 11 ऑक्टोबरदरम्यान राज्यातील दुष्काळग्रस्त भागांचा दौरा करून परिस्थितीचा आढावा घेणार आहे. या पाहणीच्या आधारे दुष्काळाची तीव्रता आणि नुकसानीचे मूल्यांकन करून केंद्राकडून मदतीबाबत निर्णय घेतला जाणार आहे.

Torrent Project : ‘अडाणी शेतकरी’ शब्दावरून वाद पेटला… Karjat मध्ये भूसंपादन सुनावणीत मोठा राडा! थेट जनसुनावणी बंद पाडली

अमित शहांकडून मदतीचे आश्वासन

महाराष्ट्राच्या दुष्काळी परिस्थितीत केंद्र सरकार राज्याला आवश्यक ती सर्व मदत करेल, असे आश्वासन अमित शहा यांनी दिल्याचे फडणवीस यांनी सांगितले. केंद्र आणि राज्य सरकारच्या संयुक्त प्रयत्नांतून दुष्काळग्रस्त शेतकरी आणि नागरिकांना दिलासा देण्याचा प्रयत्न केला जाईल, असेही त्यांनी स्पष्ट केले.

फडणवीस यांनी या भेटीनंतर सोशल मीडिया प्लॅटफॉर्म ‘एक्स’वर पोस्ट करत केंद्राकडे महाराष्ट्रासाठी जास्तीत जास्त मदतीची मागणी केल्याची माहिती दिली. केंद्राकडून सकारात्मक प्रतिसाद मिळाल्याचेही त्यांनी नमूद केले.

दरम्यान, राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांनीही दुष्काळग्रस्त भागांचा दौरा करून शेतकऱ्यांशी संवाद साधला आहे. त्यांनी दुष्काळग्रस्त शेतकऱ्यांना तातडीने मदत देण्याची मागणी केली आहे.