शुक्रवार, 6 नोव्हेंबर 2026
(फोटो सौजन्य- सोशल मीडिया)
Devendra Fadnavis : मनोरंजन क्षेत्रासाठी महत्त्वाची घडामोड ठरत, निर्माता नमित मल्होत्रा यांच्या ‘प्राइम फोकस स्टुडिओज फेज 1’ या अत्याधुनिक स्टुडिओ कॅम्पसचे उद्घाटन 6 ऑगस्टला महाराष्ट्राचे मुख्यमंत्री देवेंद्र फडणवीस यांच्या हस्ते करण्यात आले. मुंबईतील फिल्म सिटीमध्ये उभारलेल्या या जागतिक दर्जाच्या कॅम्पसमध्ये क्रिएटिव्ह आणि टेक्नॉलॉजी टीम्सना एकाच छताखाली आणण्यात आले असून, मीडिया आणि मनोरंजन उद्योगाच्या भविष्यातील गरजा लक्षात घेऊन त्याची उभारणी करण्यात आली आहे.
‘प्राइम वन’ या नावाने ओळखल्या जाणाऱ्या या मुख्यालयाच्या उद्घाटनावेळी नमित मल्होत्रा यांनी आपल्या प्रवासातील हा महत्त्वाचा टप्पा असल्याचे सांगितले. यावेळी त्यांनी आगामी ‘रामायणम्’ चित्रपटासाठी भारतात अकादमी पुरस्कार (ऑस्कर) आणण्याचे आपले स्वप्न आणि व्हिजनही उपस्थितांसमोर मांडले.
याआधी WAVES Summit दरम्यान प्राइम फोकस आणि महाराष्ट्र सरकार यांनी मुंबईत जागतिक दर्जाची एंटरटेनमेंट इकोसिस्टम उभारण्याची घोषणा केली होती. त्याच घोषणेची प्रत्यक्ष पूर्तता म्हणून हा स्टुडिओ कॅम्पस उभारण्यात आला आहे. कंपनीचे जागतिक मुख्यालय असलेल्या ‘प्राइम वन’मध्ये प्राइम फोकसचे 1,000 हून अधिक कर्मचारी कार्यरत असतील, तर कंपनीच्या जागतिक नेटवर्कमध्ये 10,000 पेक्षा अधिक कर्मचारी आहेत.
नमित मल्होत्रा यांच्या DNEG या व्हिज्युअल इफेक्ट्स कंपनीने जागतिक स्तरावर मोठी ओळख निर्माण केली आहे. सर्वोत्कृष्ट व्हिज्युअल इफेक्ट्ससाठी DNEG ला आतापर्यंत तब्बल 8 अकादमी पुरस्कार (ऑस्कर) मिळाले आहेत. ‘Dune: Part Two’, ‘Dune’ आणि ‘Tenet’ यांसारख्या हॉलिवूड चित्रपटांमधील व्हिज्युअल इफेक्ट्ससाठी कंपनीचे विशेष कौतुक झाले आहे.
दरम्यान, DNEG आणि यश यांच्या Monster Mind Creations यांच्या सहनिर्मितीत साकारत असलेला ‘रामायणम्’ हा भारतातील सर्वात भव्य चित्रपटांपैकी एक मानला जात आहे. या चित्रपटात रणबीर कपूर, साई पल्लवी आणि यश प्रमुख भूमिकांमध्ये झळकणार आहेत. चित्रपटाचा ट्रेलर प्रदर्शित झाल्यानंतर देशभरात मोठी चर्चा रंगली होती. विशेष म्हणजे, जागतिक प्रेक्षकांपर्यंत भारतीय महाकाव्याची कथा पोहोचवण्यासाठी चित्रपटाची इंग्रजी लिप-सिंक्ड आवृत्तीही प्रदर्शित करण्यात आली आहे.
