मंगळवार, 15 सप्टेंबर 2026
( फोटो सौजन्य- सोशल मिडिया)
सूरज पंचोलीने आपल्या पोस्टमध्ये दिशा सालियानसोबत कोणत्याही प्रकारचा संबंध असल्याचा स्पष्टपणे इन्कार केला आहे. माध्यमांमधील अनेक रिपोर्ट्स आणि वक्तव्यांमध्ये आपलं नाव दिशा यांच्या मृत्यूशी संबंधित वादात जोडलं जात असल्याचं त्याने म्हटलं.
सूरजने दावा केला की, तो आपल्या आयुष्यात दिशा सालियानला प्रत्यक्ष किंवा अप्रत्यक्षपणे कधीही भेटलेला नाही. त्यामुळे या प्रकरणाशी आपला संबंध जोडला जाणं चुकीचं आणि त्रासदायक असल्याचं त्याने म्हटलं आहे.
सूरज पंचोलीने आपल्या पोस्टमध्ये आदित्य ठाकरेंचाही उल्लेख केला. त्याने म्हटलं की, आपण आजपर्यंत आदित्य ठाकरेंनाही कधी भेटलेलो नाही. कोणत्याही पुराव्याशिवाय आपलं नाव अशा वादात ओढलं जाणं अन्यायकारक असल्याचं त्याने म्हटलं.
अशा प्रकरणात आपलं नाव जोडण्यापूर्वी संबंधित तथ्यांची पडताळणी करण्यात यावी, अशी विनंतीही सूरजने केली आहे.
Toxic OTT Release: थिएटरनंतर यशचा ‘टॉक्सिक’ ओटीटीवर; नयनताराचा सिनेमा कधी होणार रिलीज? जाणून घ्या
आपण इतका काळ या प्रकरणावर बोललो नाही, कारण प्रत्येक बातमी किंवा रिपोर्टवर प्रतिक्रिया देण्याची इच्छा नव्हती, असं सूरजने सांगितलं. मात्र, एखादी गोष्ट वारंवार समोर येत राहिली तर एका टप्प्यावर व्यक्त होणं गरजेचं ठरतं, असं त्याने म्हटलं.
सूरजच्या म्हणण्यानुसार, या प्रकरणात सीबीआय आणि पोलिसांकडून त्याची चौकशी यापूर्वीच झाली आहे आणि साधारण चार-पाच वर्षांपूर्वी त्याचा जबाब नोंदवण्यात आला होता. भविष्यात कोणत्याही तपास यंत्रणेला पुन्हा त्याची चौकशी करायची असल्यास पूर्ण सहकार्य करण्याची तयारी असल्याचं त्याने स्पष्ट केलं.
‘माझ्याकडे लपवण्यासारखं काहीही नाही’
आपल्याकडे लपवण्यासारखं काहीही नसल्याचं सूरज पंचोलीने म्हटलं आहे. कोणत्याही तपास यंत्रणेला अतिरिक्त माहिती हवी असल्यास आपण चौकशीसाठी उपलब्ध असल्याचं त्याने सांगितलं.
तसंच, दिशा सालियान यांच्या मृत्यूशी संबंधित परिस्थितीची निष्पक्ष आणि सखोल सीबीआय चौकशी व्हावी, याला आपला पाठिंबा असल्याचंही त्याने म्हटलं.
सूरजने पुढे सोशल मीडिया आणि माध्यमांमध्ये पसरवल्या जाणाऱ्या अपप्रचाराबाबतही भाष्य केलं. केवळ एखादी हेडलाईन म्हणजे पुरावा नाही, टीव्हीवरील चर्चा म्हणजे तथ्य नाही आणि सोशल मीडियावरील प्रत्येक गोष्ट खरी मानू नये, असं त्याने म्हटलं.
दिशा सालियानच्या वडिलांकडून गंभीर आरोप
दरम्यान, दिशा सालियानचे वडील सतीश सालियान यांचे वकील निलेश ओझा यांनी काही गंभीर आरोप केले आहेत. त्यांच्या दाव्यानुसार, दिशा यांच्यावर सामूहिक बलात्कार करून त्यांची हत्या करण्यात आली आणि त्यांच्याकडे कथितरित्या काही महत्त्वाचे पुरावे होते. या आरोपांमध्ये ड्रग्स आणि बाल तस्करीशी संबंधित कथित माहितीचा उल्लेख करण्यात आला आहे.
वकिलांनी दिशा यांच्या मोबाईलबाबतही दावा केला आहे. त्यांच्या म्हणण्यानुसार, ९ ते १७ जून २०२० या कालावधीत दिशा यांचा फोन काही व्यक्तींच्या ताब्यात होता. या काळात फोनमधील डेटा तपासण्यात आल्याचा आरोप त्यांनी केला आहे.
मात्र, या सर्व आरोपांची चौकशी आणि सत्यता तपासणे हे तपास यंत्रणांच्या अखत्यारीतील विषय आहेत. दरम्यान, सूरज पंचोलीने आपल्या पोस्टच्या शेवटी कायद्यावर आणि तपास यंत्रणांवर विश्वास असल्याचं सांगत “सत्य अखेर समोर येईल” असा विश्वास व्यक्त केला आहे.
