मंगळवार, 20 ऑक्टोबर 2026
( फोटो सौजन्य- सोशल मिडिया)
Manoj Bajpayee: बॉलिवूड अभिनेते मनोज बाजपेयी पहिल्यांदाच महात्मा गांधींच्या भूमिकेत मोठ्या पडद्यावर दिसणार आहेत. दिग्दर्शक सुधीर मिश्रा आणि निर्माते अनुभव सिन्हा एका नव्या ऐतिहासिक ड्रामासाठी एकत्र आले असून, हा चित्रपट भारताच्या स्वातंत्र्यलढ्यातील फारसा चर्चेत नसलेल्या २१ दिवसांच्या महत्त्वपूर्ण कालखंडाची कथा मांडणार आहे.
मनोज बाजपेयी यांनी आपल्या कारकिर्दीत विविध प्रकारच्या भूमिका साकारत स्वतःची वेगळी ओळख निर्माण केली आहे. मात्र, महात्मा गांधींची भूमिका साकारणं हा त्यांच्या कारकिर्दीतील पहिलाच अनुभव असणार आहे.
आपल्या इंटेन्स आणि सूक्ष्म अभिनयासाठी प्रसिद्ध असलेले मनोज बाजपेयी गांधीजींचं अधिक मानवी आणि जवळचं रूप पडद्यावर साकारताना दिसणार आहेत. त्यांच्या या नव्या भूमिकेची घोषणा होताच चाहत्यांची उत्सुकता वाढली आहे.
या चित्रपटात स्वातंत्र्याच्या काळातील महात्मा गांधींच्या आयुष्यातील फारसा परिचित नसलेला २१ दिवसांचा अध्याय उलगडला जाणार आहे.
दिग्दर्शक सुधीर मिश्रा यांनी सांगितलं की, देश स्वातंत्र्याकडे वाटचाल करत असताना आणि दिल्ली सत्तेचं केंद्र बनत असताना गांधीजींनी एक अनपेक्षित निर्णय घेतला. त्यांनी दिल्लीपासून दूर जाण्याचा निर्णय घेतला. मात्र, हा निर्णय म्हणजे माघार नव्हती, तर स्वतःला एका नव्या रूपात घडवण्याचा त्यांचा वैयक्तिक प्रवास होता.
इतिहासाच्या पुस्तकांमध्ये या काळातील घटनांचा उल्लेख असला तरी, त्या निर्णयामागची कारणं आणि गांधीजींच्या वैयक्तिक मनोविश्वाचा या चित्रपटातून शोध घेतला जाणार आहे.
‘मुल्क’, ‘आर्टिकल 15’ आणि ‘थप्पड’ यांसारख्या चित्रपटांमधून सामाजिक आणि संवेदनशील विषय मांडणारे अनुभव सिन्हा या चित्रपटाची निर्मिती करत आहेत. त्यांच्या बनारस मीडिया वर्क्स या बॅनरअंतर्गत या चित्रपटाची निर्मिती होत आहे.
तर सुधीर मिश्रा या चित्रपटाचं दिग्दर्शन करणार आहेत. ‘हजारों ख्वाहिशें ऐसी’, ‘धारावी’ आणि ‘इस रात की सुबह नहीं’ यांसारख्या चित्रपटांसाठी प्रसिद्ध असलेल्या सुधीर मिश्रा यांचा हा चित्रपट त्यांच्या जवळपास चार दशकांच्या कारकिर्दीतील महत्त्वाचा प्रोजेक्ट ठरणार आहे.
मनोज बाजपेयींसोबत सौरभ शुक्ला हे देखील या चित्रपटात महत्त्वाच्या भूमिकेत दिसणार आहेत. या दमदार कलाकारांच्या सहभागामुळे चित्रपटाची उत्सुकता आणखी वाढली आहे.
भारताच्या स्वातंत्र्याच्या इतिहासातील महत्त्वाच्या कालखंडाला वैयक्तिक आणि मानवी दृष्टिकोनातून मांडण्याचा प्रयत्न या चित्रपटातून केला जाणार आहे.
अनुभव सिन्हा आणि नरेंद्र हिरावत निर्माते
या चित्रपटाची निर्मिती अनुभव सिन्हा आणि नरेंद्र हिरावत करत आहेत. हा बनारस मीडिया वर्क्सचा प्रोडक्शन असून, एनएच स्टुडिओज या चित्रपटाचे सादरीकरण करत आहे.
मनोज बाजपेयी पहिल्यांदाच महात्मा गांधींच्या भूमिकेत, तर अनुभव सिन्हा आणि सुधीर मिश्रा यांचा सर्जनशील मेळ पाहायला मिळणार असल्याने हा ऐतिहासिक ड्रामा प्रेक्षकांसाठी निश्चितच वेगळा सिनेमॅटिक अनुभव ठरणार आहे.
