गुरुवार, 10 सप्टेंबर 2026
( फोटो सौजन्य- सोशल मीडिया)
Pooja Sawant: मराठी मनोरंजन विश्वातील लोकप्रिय अभिनेत्री पूजा सावंतने आपल्या अभिनयासोबतच नृत्याच्या अदाकारीनेही प्रेक्षकांच्या मनात खास स्थान निर्माण केलं आहे. मराठी सिनेसृष्टीतील ‘कलरफुल’ अभिनेत्री म्हणून ओळखल्या जाणाऱ्या पूजाने आतापर्यंत अनेक चित्रपटांमध्ये विविध भूमिका साकारल्या आहेत. तिच्या काही भूमिका आणि गाण्यांनाही प्रेक्षकांची विशेष पसंती मिळाली. यातीलच एक गाजलेलं गाणं म्हणजे ‘अधीर मन झाले’. या गाण्याच्या शूटिंगदरम्यानचा भन्नाट किस्सा पूजाने अनेक वर्षांनंतर सांगितला आहे.
पूजाने ‘एबीपी माझा’ला दिलेल्या मुलाखतीत ‘अधीर मन झाले’ या गाण्याबद्दल अनेक आठवणी शेअर केल्या. विशेष म्हणजे या गाण्यासाठी कोणतीही ठरावीक कोरिओग्राफी करण्यात आली नव्हती. याबद्दल बोलताना पूजा म्हणाली की, हे गाणं प्रत्येक मुलीला कनेक्ट होतं. गाण्याचं शूटिंग करताना कोरिओग्राफी झालीच नव्हती. दिग्दर्शक गजेंद्र सरांनी गाणं लावलं आणि ‘तुला जसं वाटेल तसा डान्स कर, तुला जमेल तसं नाच’ असं सांगितलं.
पूजाने पुढे सांगितलं की, कदाचित त्यामुळेच हे गाणं प्रत्येकाला रिलेट होत असेल. ‘मी जर पावसात डान्स केला तर मी पण अशीच नाचेन,’ अशी भावना हे गाणं पाहताना प्रेक्षकांना येत असावी. गाणं शूट करण्याच्या दोन दिवस आधीच तिला ते देण्यात आलं होतं. त्यामुळे गाण्यासाठी काय करायचं आहे, याची कल्पना तिला होती. मात्र, हे गाणं तिने अगदी मनापासून केल्याचंही पूजाने सांगितलं.
‘अधीर मन झाले’च्या शूटिंगचा आणखी एक मजेशीर किस्सा पूजाने सांगितला. या गाण्याचं शूटिंग दोन दिवस सुरू होतं. पहिल्या दिवशी पावसात शूटिंग करताना पूजा पूर्णपणे भिजली होती. मात्र, दुसऱ्या दिवशीच्या शूटिंगसाठी तिच्याकडे दुसरी साडीच नव्हती.
पहिल्या दिवशी शूटिंग संपल्यानंतर तिने तीच साडी रात्री वाळत घातली. मात्र, दुसऱ्या दिवशी सकाळी ५.३० वाजताच तिचा कॉल टाइम होता. तोपर्यंत साडी पूर्णपणे वाळली नव्हती. त्यामुळे नाईलाजाने पूजाला दुसऱ्या दिवशीही ती ओली साडीच नेसून शूटिंग करावं लागलं.
या सगळ्या परिस्थितीचा मात्र पूजाने अजिबात त्रास करून घेतला नाही. उलट या शूटिंगचा तिने मनमुराद आनंद घेतला. पूजाला पावसात भिजायला खूप आवडत असल्यामुळे दोन दिवसांचं हे शूटिंग तिच्यासाठी एखाद्या पावसाळी पिकनिकसारखंच होतं.
शूटिंगच्या ठिकाणी बेडूक आणि सापही होते. मात्र, त्यांचाही पूजाला काही त्रास झाला नाही. ‘मला पावसात भिजायला खूप आवडतं. त्यामुळे मला ना पावसाचा त्रास झाला, ना बेडूक आणि सापांचा. ही माझ्यासाठी एक पावसाळी पिकनिक होती,’ असं पूजाने सांगितलं.
पूजा सावंतच्या या आठवणींमुळे ‘अधीर मन झाले’ या गाण्याच्या शूटिंगमागची मेहनत आणि त्यावेळचा तिचा उत्साह पुन्हा एकदा समोर आला आहे. आजही या गाण्याची आठवण सांगताना पूजाच्या चेहऱ्यावर त्या शूटिंगचा आनंद दिसून येतो.
